住家飯 @ 姑奶屋企 ( 15-DEC-2022 )

蒜蓉蒸帶子 - 呢個好味呀

唔知係咩魚   只知道 $60咋

好耐無食白切雞   最鍾意食佢哋啲薑蓉   哈哈

今朝姑奶問我食咩 ?!   我話只想食魚   佢就話買埋燒味   之後里奧大人晏晝同我講   話姑奶叫佢買燒味   我話今朝姑奶話自己買喎   咁唔緊要啦   我去買盒叉燒   去到見到已經有盒叉燒   其實我應該再問問姑奶有無嘢買 ?!   咁就唔駛我又買多盒叉燒   所以我買嘅叉燒要拎走   留番聽晚食 lu  

蒜蓉炒菜心

鵝潤腸蒸飯

( 15-DEC-2022  THU )

感恩一覺瞓天光   鬧鐘未響都醒   今朝特登早 5 分鐘起身   因為焗熱麵包要啲時間呢 ~

今朝我食芝士夾甜餐包   里奧大人仍然係醬占麥包   佢又話個包好食   似乎好鍾意食咁噃 ~

菇場忙呀   新 System 真係煩到嘔   真係覺得新不如舊   諗住新嘢會快   點知仲慢過舊嘅   唉 ~

Lunch Time 諗住去銀行整嘢   點知太多人   所有都唔整住 lu ~

繼續周圍搵壽桃牌拉麵   但幾間超市都無   之後聽到有人方向講嘢咁   我一望完來係船頭   佢問我買咩 ?!   我話想買拉麵   咁佢話佢幫手睇下有無 ~

之後問我買咗咩   哈哈   次次第一句都咁問   阿花就會睇我個袋買咗啲咩   傾咗幾句就再行   咁買埋麵包同午餐都番菇場喇 ~

艇仔粥 + 牛脷蘇   叫牛脷蘇嘅時候腦閉塞   講咗油脷蘇   因為我多數買油炸鬼呢   哈哈

菇場唔忙   又傾住計等放工 ~

今晚去姑奶屋企做節   所以我買埋叉燒就同里奧大人一齊去姑奶屋企喇 ~

姑奶好開心話我同佢做節   因為係我約佢嘅   之後里奧大人都話姑奶同佢講今日好開心同佢食飯   咁疫情開始都好耐無去佢屋企食飯   只係多數探佢   咁下星期做冬又凍   買餸又貴   所以我約今晚囉 ~

食完又傾下偈   差唔多 7 點半就走人   番到屋企就開機洗衫   叫里奧大人拿拿聲沖個熱水涼先   佢今日著件薄褸咋   因為佢唔記得夜晚要去食飯囉   所以頭先佢都話要早啲番屋企   因為好凍呀 ~

搞掂哂就睇世界盃  法國對摩洛哥   不過都睇唔哂   因為里奧大人 10 點半瞓覺   之後我 10 點 40 分都瞓覺喇   今晚出去食餐飯啫   做咩大家都咁攰咁嘅   哈哈 ~