香菇雲耳鮮肉雲吞 & 鮮肉雲吞 & 炸魚皮 (外賣) + 學斗 ( 14-DEC-2022 )

( 14-DEC-2022  WED )

感恩瞓得唔錯   不過里奧大人話我尋晚成身好熱   因為我蓋咗兩張被   哈哈 ~

早餐食搽咗占醬嘅芝麻包同麥包   里奧大人話好味道   可能個包脆卜卜   依家都預早起身焗熱麵包   時間用多咗   但如果好食啲都值得嘅 ~

芝麻皮燶咗呀   下次都係小心啲焗呢

菇場忙呀   實在太好 ~

家姐話 Berry 凍到震同流鼻水   所以即同佢著衫   但佢勁唔鍾意   哈哈

Lunch Time 出去一田換嘢   之後再買牛肉麻辣米線番菇場食   咁凍要食麻辣驅寒   哈哈哈哈 ~

呢盒炸蟹鉗原價 ($35)   我用 300積分 + $25 換一盒   反正積分年底到期   我又只得 450 分   所以都兌換埋去喇

里奧大人今日又要睇牙醫   始終隻牙成日痺痛   但醫生話佢可能磨牙   同埋牙齒敏感   講嘅嘢都係同上次個牙醫一樣   咁都無咁驚 ~

菇場仍然忙   但放工都係準時走的   哈哈 ~

買完雲吞就即急步番屋企   因為好鬼凍呀 ~

一入屋見里奧大人未換衫   原來佢睇完牙醫都番公司做嘢   等我仲叫佢買橙添   我以為佢睇完就番屋企呀   哈哈 ~

是日懶餐 - 香菇雲耳鮮肉雲吞 & 鮮肉雲吞 & 炸魚皮 (外賣) + 學斗

香菇雲耳鮮肉雲吞 & 鮮肉雲吞 & 炸魚皮 (外賣) - 諗唔到煮咩就食雲吞啦   反正天氣咁凍   食呢啲熱辣辣最好   今晚特登買咗 2 扎韭黃   之得買多個蝦子麵   扮喺出面食咁   哈哈 ~

學斗 - 學斗真係甜好多   其實之前都係買學斗   我見有兩款白菜仔   我問菜仔有咩分別 ?!   佢只係答呢款甜啲   嗰款爽啲   無講明係學斗呢個名稱   我又唔識呢啲呢   以前買菜個女人話係林甜菜心   我話以為林甜係地方名添呀   肉酸死囉   哈哈 ~

洗埋碗就沖涼   之後同里奧大人睇波   阿根廷對克羅地亞   賽果 3:0   仲諗住爆冷添 ~

無啦啦流鼻水   即飲 Hot Lemon 啦   次次我唔舒服   里奧大人拎藥比我係特別快   哈哈   之後又迫我着長褲   因為我幾凍都好   都係只着睡裙   我覺得着睡褲好鬼熱呢 ~

今晚唔想睇 Youtube   所以睇聖經   睇咗 45 分鐘   差唔多 11 點瞓覺呢 ~