炸雞扒 + 咖哩魚蛋 + 仿鮑片油麵 (外賣) @ 屋企 ( 4-JUN-2023 )

( 4-JUN-2023  SUN )

尋晚瞓到半夜又熱醒   呢個月都差唔多係咁~

瞓到 8 點 45 分都醒咗   咁都起身沖涼洗頭喇 ~

今朝要去整啲嘢   所以食埋早餐先番教會 ~

崇拜完畢仲有事奉   所以里奧大人去商場行一陣先   我差唔多 1 點 45 分先搞掂 ~

同 Ivy 一路行一路傾   好耐無咁傾   因為次次唔係佢趕就係我趕   哈哈 ~

里奧大人睇手機   咁我又去睇下   之後先去 Foodeli 食 Lunch ~

麻辣雞絲涼麵 ($40) & 汽水 (+$2) - 唔駛同里奧大人 share 食   所以我揀涼麵   我其實鍾意食冷麵㗎   

撈埋一齊食真係勁正   但好辣   哈哈   

冬蔭功湯粉 ($75) - 豬肉丸 & 勁頸肉金邊粉 + 泰式醃扎肉沙律 (小份) + 凍百香果蜜 - 都估到里奧大人要呢個㗎喇   但味道都唔錯喎

呢個小辣都幾辣

食完去豐澤買焗爐   買完都即走喇   感恩去到巴士站就有車   今日勁焗熱   真係唔想企喺條街咁耐   哈哈 ~

最搞笑家姐知我焗爐壞咗嘛   估唔到今日佢都有去睇   仲話幫我買   我話唔要啦   同埋買完之後又特登拎比我   咁麻煩一定唔會要啦 ~

番到屋企又要執嘢   又小清潔   每日做啲唔想咁辛苦   其實以前去完旅行   番到屋企都會做大清潔先   但今次真係體力嚴重透支   所以家務要分批做呀 ~

做到 6 點都抉抖下喇   咁里奧大人沖咗涼   我就未沖   所以我話我一陣去買晚餐就得 ~

今晚 7 點半左右開餐   不過我飲珍珠奶茶都夠喇   但就要幫手食半件炸雞囉   因為里奧大人話驚熱氣喎 ~

次次去德福   里奧大人都會叫我買杯珍珠奶茶

奇怪點解咁難啜嚟飲   原來佢比多咗仙草   不過我唔食咁多涼嘢喇   所以比里奧大人食

食完抖陣就開機洗衫   之後沖涼喇 ~

今晚睇 "屍殺列車"   但韓國係叫做 "Busan Haeng"   如果就咁睇個片名  以為係睇記錄片   哈哈 ~  

因為我睇完 "怪物" 之後就愛上咗孔劉   雖然唔係靚仔   但佢做戲真係好好   特別係內心戲   一個眼神都已經表達到佢嘅情感   加上身型又勁好   次次睇佢   我都同里奧大人講話佢同對門差唔多高   哈哈 ~

估唔到結局係咁感人喎   所以我要睇番啲笑片   里奧大人話睇 "社內相親"   睇咗 1 集都覺得幾好笑 ~

今晚 11 點 45 分先瞓覺   應該會好好瞓呢   哈哈 ~