打邊爐 @ 稻香 ( 九龍灣 ) ( 12-jan-2011 )

沙爹湯底 - 又係佢呀  一樣咁好味   加兩次水都一樣咁濃   正呀
蟹籽魚麵 - 之前無食有蟹籽嘅魚麵   有蟹籽 d 口感好得意  好味呀

雪花丁方 - 上次叫肥牛真係好肥下   所以今次叫呢個   唔錯呀   有 d 筋   我最鍾意食呢 
水餃 / 雲吞 / 魚皮餃 - 我同家姐都想試呢個呀   不過當時大家都無講   之後我話想叫多樣嘢   佢就話想呢樣囉   真係啱喇  炸魚皮 - 我喺茶餐廳買架  $13 咋   新鮮熱辣架   脆卜卜   如果喺稻香食   要 $28 架   我覺得唔抵呀   但我又好想食喎   所以自己買   我放喺環保袋入面   叫家姐如果無 waiter 喺度   就逐 d 逐 d 拎出黎派比我地食   最緊要唔好咁揚呀   嘩哈綠色一藍子 - 今次有西洋菜   都幾好味喎   不過呢   媽咪話有好多 "其乸" 架   所以我唔敢買黎食架   美國黑豚肉 - 家姐好小用豚肉打邊爐   所以叫比佢試下喇
( 12-jan-2011 wed )

好凍呀好凍呀   今朝真係好凍呀   又落毛毛雨   又濕又寒   我都要着腳指襪保暖呀   不過話時話   着咗腳指襪真係暖好多   我覺得對腳唔凍   咁成身都無咁凍咁架 ~
依家天氣凍   我都會同里奧大人一齊行去搭地鐵   但一入到車廂又好焗喎   又凍又焗又凍咁   都幾麻煩   咁好易病架 ~
無啦啦超想食扒芝腿治呀   等咗差唔多十分鐘呀   對面個女仔都同我講話等咁耐   佢見無人理我   仲幫我叫人黎添呀   之後同佢傾咗幾句   如果菇場 d 同事係咁主動就好啦 ~

忙呀忙   煩呀煩   終於到 lunch time 喇   今日有 lunch box   因為星期一煮得太多叉燒炒麵   所以可以食多餐喇 ~
今晚要出旺角睇中醫   所以探唔到媽咪喇   里奧大人做代表   其實我無叫佢去架   佢自己話去   我都好感動   因為佢咁忙都記得媽咪入院   要探媽咪   好好架喇 ~

約咗中醫 6 點   佢一見我就話我臉色唔好   打脈又叫我唔好咁緊張   我話我乜都會緊張一餐   佢話我太依賴人   oh  講仲哂噃   我真係好依賴人架   未嫁依賴屋企   嫁咗依賴里奧大人   不過我覺得依家好 d 喇   無咁依賴   希望以後更加獨立 d 就更好啦 ~

同個醫師傾下計   都差唔多 7 點先走   今次又坐亡命 van 去淘大   8 分鐘咋   仲要今次係亞叔揸車   如果唔係肯定仲快呀   8 蚊真係抵比啦   1 蚊一分鐘   又安全又快   嘩哈 ~

今晚咁凍   里奧大人晏晝打黎話想打邊爐   難得佢話打   我即 book 枱啦   家姐又一齊黎打   好開心呀 ~