住家飯 @ 媽咪屋企 ( 13-SEP-2013 )

越式燜五花腩 - 呢個餸係媽咪跟方太學架   用魚露燜   但依家媽咪唔敢試味   所以今次鹹咗 d   我同家姐都話個賣相白雪雪   估唔到咁入味

節瓜燜素雞

白灼蝦

皮蛋酸薑 - 我同媽咪講話係咪仲有好多薑   因為食咗好多餐咁呀 @.@

牛蒡紅蘿蔔瘦肉湯

日本梨

( 13-SEP-2013  FRI )

Happy Friday 喇   今日就真係 Happy 喇   因為聽日係每月一 OFF 呀 ~

依家要朝早空肚飲中藥   之後先可以食早餐   今次煲得太大杯   飲到一大半已經胃痛   下次煲小一半算喇 ~

醫師話我肝鬱   所以呢 d 中藥係好有排毒作用架   之前睇佢又係幫我清濕毒   咁樣希望每月一到無咁痛啦 ~

早餐食芝腿治烘底   但四周圍都係食麵   真係超勁想食呀   不過飲完杯中藥已經飽咗 7 成   無可能食到囉 ~

菇場唔忙呀   hea 到 lunch time 都唔錯   因為今日實在太有 holiday mood   所以唔想做嘢呀 ~

又未餓   所以行一陣先去食粥   但我覺得食粥反而無食粉麵咁熱   可能粥舖嘅冷氣夠大呀 ~

里奧大人今日上咗大陸   放工當然係去媽咪屋企食飯啦   但家姐今晚要去灣仔拎月餅   加上又落雨塞車   所以差唔多 8 點先番到屋企   咁我同媽咪就邊食邊等囉   因為媽咪又餓   同埋要打針   我都唔想佢咁夜食飯 ~

今晚拎湯 + 梨 + 雞翼 + 薑 + 蒜頭   足足 12 磅   加埋自己個袋又成 7 磅   真係重鬼到呢 ~

同家姐一齊 9 點走喇   因為家姐趕住要番屋企叉手機電打機呀   今晚難得有 double cherry   但至到 11 點囉   所以一定要盡玩呀 ~  

番到屋企即沖涼同開機洗衫   之後即打機喇 ~

里奧大人差唔多 10 點先番到屋企   我叫佢即沖涼即幫手打機呀   里奧大人個樣好慘咁   因為佢唔太鍾意打機家嘛   打機個樣幾咁受苦咁呀   我迫佢打到 11 點先可以停   佢話打完機對眼好攰   之後真係 me 埋眼瞓咗陣呀   無鬼用   哈哈 ~

聽日 off   所以今晚差唔多 1 點先瞓呀 ~