燒排骨 + 蠔油燜節瓜 + 粟米蛋花湯 ( 18-SEP-2013 )

( 18-SEP-2013  THU )

話咁快又到中秋   之後又聖誕   眨下眼又過咗一年   時間過得真係快呢 ~

早餐食腿蛋治烘底   咁就可以一路睇報紙一路食喇   家姐話好想好似我咁   有咁多時間食早餐   大佬   我早半個鐘頭起身架   真係唔鍾意趕頭趕命囉   同埋最主要係我爭取時間見里奧大人咋   唔係會瞓到 8 點先起身   爽幾多呀   哈 ~

菇場忙咗陣就 hea 過   唔錯唔錯 ~

今日有 lunch box   食完就去超市買嘢   番到菇場啱啱好開工 ~

又係忙咗陣呀   之後 hea 到 4 點又忙過   差唔多 5 點搞掂   真係等放工喇 ~

今晚唔駛買餸   d 時間好用好多呢 ~   

里奧大人 8 點放工   不過我自己食先啦   我想多 d 時間消化呀   同埋想快 d 食快 d 洗哂 d 嘢呀 ~ 

是日晚餐 - 燒排骨 + 蠔油燜節瓜 + 粟米蛋花湯

燒排骨 - 里奧大人都好鍾意食燒排骨架   所以試下整囉   買咗 $65 排骨   我覺得好貴呀   今次醃咗一晚   醃得唔夠入味   下次醃兩晚先   同埋 d 肉唔得 juicy   同埋我見塊皮已經好燶   所以唔敢再焗   驚 d 肉會更加鞋   哎丫   最衰自己懶無搵食譜   唔係應該會好 d   下次再焗   我要焗到好食為止 ~        

蠔油燜節瓜 - $8 一份   仲要係細細條咋   依家節瓜又貴番   我見到有 $10 斤同 $16 斤呀   不過 $10 斤就同我買一份份果 d 差唔多 size   咁我多數買一份份果 d   要慳家呀   今晚又掛住打機   咁我煮嘅時候都好多水家嘛   之後再開蓋睇   無哂水喇   再遲 1 分鐘應該燶埋添呀   下次都係教定鬧鐘好 d ~

粟米蛋花湯 - 節瓜太小喇   所以滾粟米湯   多 d 蔬菜嘛 ~

今晚里奧大人都唔做公司嘢   佢睇報紙   我睇方太   最搞笑係方太煎雞肶有 d 燶   佢就話深色   但就唔會講個燶字   所以里奧大人話叫我學嘢喎   頭先 d 燒排骨係深色   唔係燶喎   衰 ~