煎鷹鯧魚 + 肉碎蒸節瓜 + 當參淮山鱷魚肉湯 ( 16-JAN-2015 )

( 16-JAN-2015  FRI )

今朝又凍凍到   所以又懶床   8 點 10 分先同里奧大人一齊出門口呀 ~

好餓呀   早餐要食芝腿治 ~

菇場唔忙   但反而有 d 眼瞓   其實有 d 手尾要做   不過唔想做囉 ~

今日要去寄收據   咁都出去食埋 lunch   食完去買節瓜   咁今晚就唔駛去街市買菜喇 ~

傾下 hea 下又放工 lu   去阿信屋買乳酪啫喱   今次又係抵   $9.8/杯   但街坊價有 7 折即係 $6.86/杯   好在之前 $7.8/杯唔買咋   不過之前買咗包綠茶 Kit Kat   今次仲抵   $25/包有 7折   即係 $17.5/包   激心啦   上次個 Cashier 話 $20 已經好抵   下次唔再信佢   哈哈 ~

里奧大人話今晚會好夜番   咁我番到屋企預備好晚餐   煲埋雪梨水就開機洗衫   再做家務 ~

煮完都 7 點半   咁自己食先 lu   反正今晚我想食米粉 ~

是日懶餐 - 煎鷹鯧魚 + 肉碎蒸節瓜 + 當參淮山鱷魚肉湯 

煎鷹鯧魚 - 媽咪尋晚買架   咁拿拿聲食埋去 lu ~  

肉碎蒸節瓜 - 尋晚食剩咗 d 肉碎   咁我話留番比我蒸節瓜   咁樣 d 節瓜就無咁寡   哈哈 ~     

當參淮山鱷魚肉湯 - 媽咪煲架   我依家都驚驚地飲鱷魚肉湯   但以前就會成日煲黎飲架噃 ~       

里奧大人 8 點放工   咁煮個白咖哩麵比佢食   佢之前自己煮黎食話好辣   咁我落調味包都覺得應該幾辣   成大嚿紅色嘢   好似 d 辣椒膏   但好香蝦米味道   不過呢隻麵唔會再買黎食   因為一包麵有 2 包味粉 + 1 包辣椒膏嘅嘢   同埋個麵又唔係大個   要落咁多包嘢   好多味精啫 ~

搞掂哂都 9 點半喇   今晚唔出去徑步喇   所以做多陣家務就即沖涼 lu ~                 

手機無啦啦 shot 咗   勁驚啦   因為頭先同朋友 whatsapp   我唔小心趺咗落碗米粉度呀   好在 d 湯唔多   不過我無吹乾部電話   仲好開心咁繼續 whatsapp   因為仲用到 ~     

咁啱里奧大人咁啱幫我 delete 手機 d apps   所以我話佢整壞我部手機呀   之後因為熄唔到機   所以要拆嚿電出黎   半個電話係濕咗   咁我咪同佢講話頭先唔知係咪煮飯嘅時候   放低咗喺濕嘅地方度呢   我仲係唔敢講真相佢知呀 ~   

之後我驚到搞肚痛呀   直頭係好暈果隻   咁我喺廁所叫里奧大人   佢問我咩事   我話我頭暈   不過佢聽唔到   所以無入黎   隔咗唔知幾耐   我好用力咁再叫里奧大人   再好用力話佢知我好暈   之後佢入黎啦   我問佢做咩咁耐先入黎   佢話以為我玩呀   依家終於狼來了喇喎 ~

咁我望下塊鏡   個咀唇完全係白哂架   勁恐怖   之得叫里奧大人幫我影張相啦   哈哈 ~

之後即上床瞓喇   因為仲有 d 暈同埋好凍呀   嚇到里奧大人呢   係咁問我駛唔駛入醫院   咁我同佢講   我下次話肚痛   之後喺廁所叫佢   實係有事先會叫佢   叫佢記住呀   因為其實我知頭先自己第 1 次叫完佢之後係暈咗架喇   因為我醒咗之後   個腦一片空白   對眼仲係 focus 唔到嘢囉 ~

仲諗住今晚想夜 d 瞓   點知 10 點半就要瞓   哈 ~