嘉華大酒樓 @ 官塘 ( 8-JAN-2015 )

蒜香籠仔糯米蟹

蒜蓉炒豆苗

燒鴨 / 叉燒

( 8-JAN-2015  THU )

呢排都係瞓到 5 點幾就會醒一醒   唔係凍醒就熱醒   好在都瞓得番咋   唔係就大鑊喇 ~

今朝又唔係好凍咁噃   不過好似都講過今個冬天唔會太凍   咁都好嘅   對老人家都好 d 呢 ~   

早餐又食芝腿治   明明要大火   但都好似無烘過咁嘅 @@

菇場唔忙   所有大粒又唔喺度   所以盡情 load 相同上網 ~

今日只係帶咗餸   所以叮超力米粉   d 同事話勁香呀   其實尋日阿齋又係叮超力   就係比佢引到我今日想食囉 ~   

好嘢   仍然 hea 過到放工 ~

放工去媽咪屋企坐陣   6 點半先出發去嘉華   家姐今晚 6 點 15 分先放工   但好感恩佢 7 點可以到嘉華呢   咁等埋佢黎到先叫嘢食   因為天氣凍   如果早叫 d 嘢會好快凍哂 ~

食完同家姐行超市   想買海鹽   我話之前我陪佢買咗啦   咁快食完嘅   之後佢話工人同佢講   個幾月就食哂 1 樽鹽   好嚇啦   我 1 包鹽真係食好耐   仲要係只用黎浸菜   醃嘢真係好小落鹽   都唔知佢地點食   下次真係要當面問佢工人點用   食得太多鹽唔得家嘛 ~         

買完就番到媽咪屋企坐陣   媽咪好怕凍   成日將部暖風機向住自己   真係距離唔夠一尺   暖到 d 皮膚根本乾哂   塊臉嘅微絲血管都爆咗咁   臉又紅   整到間屋又熱   完全係焗呀   我坐咗一陣都覺得好眼瞓   家姐話其實咁怕凍   坐梳化嘅時候冚張厚被咪得囉   但佢又唔冚被   係咁對住部暖風機   咁對身體都唔好啦   我話等如妳開冷氣   都唔會對住冷氣機黎涼冷氣啦   不過我同家姐話咗幾百次   佢都係咁   我地話身體係妳嘅   鍾意點就點   都費事再講   所以坐多陣就拎埋湯同生果就同家姐一齊走 lu ~

里奧大人差唔多 9 點打黎   仲以為打黎問我食唔食嘢   原來係啱啱先放工   咁我話幫佢買一哥焗豬扒飯番屋企食啦 ~

番到屋企都即沖涼   之後里奧大人都番黎 lu ~

瞓得唔好   骨頭好鬼痛   唉 ~

諗住 11 點瞓   不過睇電視睇到 11 點半先捨得瞓 ~