譚仔雲南米線 @ 牛頭角 ( 15-MAR-2016 )

( 15-MAR-2016  TUE )

尋晚居然發夢去泰國   仲跟沖哥報名學整泰式嘢   之後同里奧大人去搭小巴   但係去官塘   發夢真係好過癮   奇奇怪怪乜都有   哈哈 ~

終於都回復番啲氣力   所以今朝里奧大人都話我行快咗   呵呵 ~

勁塞車呀   8 點 35 分先落車   快快手手食埋早餐就番工喇 ~

菇場唔忙   全部大粒又唔喺度   正爆 ~

我習慣每日 Lunch Time 打比里奧大人   問佢食咩嘛   咁我夜晚煮飯就唔會重覆   我已經煮得唔好食架啦   重要仲覆食   講起都覺得佢好慘囉 ~

我同佢講話今日勁邪   食乜無乜   諗住食腸粉燒賣   居然無開   咁去百佳買黃蘿蔔壽司啦   居然無   實在太邪啦   次次去百佳都會經過望到   但今日想食居然無   咁算啦   食咖哩魚蛋炒米粉   因為我覺得好凍 ~

之後里奧大人叫我今晚探完媽咪   同我去上海婆婆食嘢   我心諗又會咁早講定嘅   之後佢話飲酸辣湯   想我飲啲熱嘢暖身   又記得我話夠熱好好飲   我話上次酸辣湯麵唔熱嘅   佢話叫人整熱啲喎   嘩   又令到我勁感動喇   其實佢知我真係身攰心又攰   所以樣樣都會以我行先   我開心佢就更開心   始終我都係一個比較易情緒波動嘅人   如果我一喊   佢真係驚到慌失失黐哂線咁㗎   哈 ~

好嘢   仍然 Hea 爆   可以 Load 旅行相   次次一 Load 相就覺得時間好快過咁   所以眨下眼又放工喇 ~

今晚探媽咪   最怕行條長長嘅路   因為好鬼凍呀   次次都凍到對手硬哂   鼻水又流埋 ~

咁我 Whatsapp 條路比冰姑睇啦   等佢知道香港啲醫院路喺點   同埋知道我去探媽咪係幾咁攰   哈哈   之後無啦啦問我   青山醫院係咪都係咁遠 ?!   嗰下真係大笑咗出嚟   大佬   我點知喎   我又未去過   同埋我都唔想去   哈哈 ~

我次次去邊間醫院都會第一時間走去 Counter 問姑娘   媽咪咩情況   好感恩今晚姑娘喺度   不過就做緊其他嘢   所以一陣搵我呢 ~

去到見媽咪都係坐喺度瞓   我依家唔會話佢啦   由佢瞓   始終佢唔珍惜   又或者真係依家要聞氣   所以攰   佢鍾意點就點啦   我做咗自己本份嚟探妳   我就算㗎喇   我真係好攰   無多餘氣力再勞氣喇 ~

媽咪工人聽晚開始放假   所以叫埋家姐工人嚟睇點樣照顧媽咪   咁媽咪瞓覺   我哋就傾偈   我問家姐工人   印尼多唔多華人 ?!   佢答我話屋企附近好多粉腸   我心諗   做咩話我哋華人係粉腸喎   之後我問點解妳識粉腸呢兩個字嘅 ?!   佢話係好多 "墳場" 呀   哈哈哈哈   我聽到佢真係講粉腸嘛 ~

姑娘之後嚟咗   我即問佢點解媽咪之前點解會聞 4 度氣 ?!   佢話係肺積水導致   咁我放下心頭大石   因為我好驚以為佢慣咗聞氧氣   所以唔聞就有事   不過要聞氣都係唔好㗎喇   但無計啦   懶到死   郁都唔郁   姑娘話扶佢手腳就大聲話痛   根本唔想做運動囉   同埋話佢晏晝都精神   咁都好   起碼精神   但就好奇怪我哋嚟佢就瞓   所以我唔成日嚟   我都唔覺得自己衰   其一我好攰   其二妳瞓覺   我覺得我唔會咁浪費寶貴嘅時間   山長水遠睇妳瞓囉 ~

里奧大人 7 點唔夠放工   叫佢自己買包做早餐   同埋番屋企開機洗衫先再去食飯 ~      

咁我之後都差唔多走喇   諗住同工人一齊走   點知佢哋幫媽咪整嘢又慢吞吞   我得番 14 分鐘行去巴士站咋   我明明預咗 20 分鐘家嘛   所以我話走先喇   趕住搭車   行到半路   里奧大人打嚟   我話趕路唔講住喇   去到巴士站   明明話 3 分鐘後有車   點知等咗半分鐘就有車   真係好感恩呀   如果等埋工人就一定送車尾呢 ~

今晚要食熱嘢   所以去譚仔食米線   坐我地對面嘅一對男女超級勁大食   女嘅食一碗雙拚米線   男嘅食一碗過橋米線呀   即係我同里奧大人 Share 食嗰碗呀   佢哋仲叫咗 1 客雲耳小食   1 客皮蛋同埋 1 客大嘅土匪雞翼   我哋真係比佢哋嚇到呆咗㗎   因為第一次見人咁食法囉 ~

食完去萬寧買嘢   之後去 Taste 買生果   里奧大人話要食雪糕喎   話頭先啲米線好辣   但其實只係 2 小辣   我覺得唔辣   因為平時食開小辣家嘛   咁食完就去買生果   因為我唔想拎咁重嘢呀   難得里奧大人喺度嘛 ~

番到屋企即沖涼   晾埋衫就熨衫   之後休息喇 ~

睇埋電視   11 點幾先瞓   但我完全無睡意   唔知係咪之前瞓得太多呢 ~