滋味館粉麵 @ 九龍灣 ( 22-MAR-2016 )

二人套餐 ($128) 
麻辣拼盤 ( 口水雞 / 金錢肚 / 青瓜 ) - 個汁都辣㗎   所以最好叫白飯   唔好嘥咗啲汁   哈哈     

香茅雞翼 - 新鮮熱辣   我都要灘一灘先食呢    

芥蘭 + 飯 & 粗麵各 1 碗 + 飲品 2 杯   只係 $128   都算抵食啦   仲要係食到好飽添呀      

( 22-MAR-2016  TUE )

今朝落毛毛雨   但可以唔駛開遮囉   懶得就懶   哈哈 ~

早餐食腿治   之後 8 卦又嚟埋   佢叫完早餐就問我封利是幾錢   我問佢咩利是呀 ?!   佢話玩遊戲果封利是   我覺得佢睇錢真係睇得好緊要   都過咗幾日啦   仲喺度問   仲要晨早流流第一樣就問錢   頂佢唔順呀 ~

菇場唔忙   咁就成日上網啦   對眼濛查查   所以呢幾日都焗杞子龍眼水飲啦   但對眼都仍然濛查查   希望之後幾日好番啲啦   話哂放假唔會上網嘛   哈哈 ~

Lunch 食酸辣米線   食咗幾啖就勁唔想食喇   但點都要食哂啦   依家開始驚驚哋酸辣米線喇 ~

仍然 Hea 等放工   今晚同高妹一齊坐小巴   差唔多到站就落毛毛雨   仲要係幾密果隻   真係唔開遮唔得 lu ~

去到媽咪又瞓   其實好無癮   探到我都無心機   但我唔會話佢   我做咗自己本份就算㗎喇 ~

咁工人話佢晏晝食咗 5 粒雲吞   夜晚食咗幾啖飯同少少蕃茄薯仔湯   咁都好   起碼食嘢 ~

今日牧師探佢嘛   我都同定牧師講話   佢全程係合埋眼   但係清醒   可以同佢傾下偈   唔係人哋以為佢咁無禮貌   人哋探妳就喺到瞓呢 ~

我差唔多 7 點走喇   真係唔想嘥時間   出面又落緊雨   都係早啲走好啲 ~

里奧大人今日去惠州見客   次次 Whatsapp 比我啲相都係坐車相   來回 6 個鐘   仲要係就咁坐去惠州嘅車程咋   真係聽見都覺得辛苦 ~

佢終於 7 點半番到九龍灣   諗住去秋月居   不過要等 3 張枱   我衰咗啦   掛住 Line   落鬼錯車呀   好在下個站係啟泰苑咋   如果直出旺角就慘   一定比里奧大人鬧死都似   哈哈 ~

急步行番轉頭   好在我依家鍾意行路   唔係人都顛   咁我去到秋月居   仍然要等 2 張枱   我話唔等喇   同埋我都想食口水雞   所以即轉場 ~ 

食完去價真棧買快熟麥皮   再幫家姐買埋保鮮紙就去買雪糕食喇   里奧大人話好辣   要食雪糕   不過一定要買番屋企食   因為背囊好重   之後佢話我知   個客比咗支中型支裝水比佢   同埋係都要佢拎埋個蘋果同埋一 Set 螺絲批   佢話本來仲有隻香蕉添㗎   不過佢食咗   我覺得個客好搞笑 ~

開機洗衫之後就沖涼   今晚好鬼飽   所以就算攰都要熨衫   當做運動   因為熨熨下都覺得熱熱哋咁㗎 ~

搞掂哂就抖陣   睇埋 "Do 姐有問題" 就瞓喇 ~