上海婆婆 360 + 滿記甜品屋 @ 九龍灣 ( 9-MAR-2016 ) ( 禁 )

宮保雞丁 - 都幾辣  

蔥花家常薄餅 - 好味喎   同埋最緊要唔油呢           

酸辣湯拉麵 - 唔熱嘅   嗚嗚  

簡稱芒黑白   我同里奧大人講明話食少少   唔駛加多兩個黑糯米   點知佢係都要加   話佢食喎   但之後話好飽食唔哂啦   搵我嚟搞   一早唔加咪得囉  

( 9-MAR-2016  WED )

感恩一覺瞓天光   不過如果可以自然醒就更好   哈哈 ~

又黎潮濕兼大霧   聽日又急降到 10 度   加上流感高峰期   真係要好小心身體呢 ~

里奧大人今朝上深圳開會   所以可以搭直通巴   咁就好喇   可以瞓下 ~

早餐食芝蛋治   其實唔想食   不過難得諗囉 ~

菇場忙咗陣   之後 Hea 過   可以慢慢 Re-size 旅行相   呵呵 ~

邪到暈   諗住開機 Re-size 就即刻有 Urgent 嘢搞 ~

Lunch Time 出去行咗半個鐘   之後再買盒炒米粉番菇場食呢 ~

里奧大人都番到公司   今日頻頻樸樸   肯定好攰   可惜呢幾晚我會探媽咪   如果唔係一定煮飯佢食   蒸下排骨都好嘛   係悶㗎喇   但好過成日出街食嘛 ~ 

實在太好   終於可以坐定定 Re-size 相   再唔整就唔想整㗎喇 ~

放工探媽咪   見佢又係食排骨啲肉汁   我話咁食真係好嘥嘢   又嘥錢   同埋姑娘話咁樣食法同唔食係無分別   我話不如唔好食啦   工人就即刻同我講話   兩個太太放工嚟醫院好辛苦   見到媽咪咁食法   唔想我哋嘥錢   佢好搞笑㗎   講咗幾次我同家姐辛苦   唔想嘥我哋錢   咁事實係嘛   醫院有得食   做咩唔食醫院啲嘢先   同埋最重要係醫院要記錄妳食過啲咩   咁先衡量開啲咩藥醫妳家嘛 ~

咁我尋晚買咗包細嘅西梅乾比媽咪   居然食剩 4 粒   係咪黐㗎   比妳食妳都咪一次過食啦   呢啲就會吞落肚   同埋工人話媽咪食出街買嘅火腿通粉會吞落肚㗎   只係自己煮嘅就唔吞囉   咁今日佢話肚屙   鬼咩   一次食咁多粒西梅   唔屙先奇啦   之後家姐都話對佢好啲都唔得   哈哈 ~

好感恩又見到阿 Sir   佢話媽咪要照電腦掃瞄   因為想 Check 下點解成日都喘氣喎   之後我閣媽咪仲有無水腫   佢就入咗病房 Check   仲有少少水腫   我當住佢同媽咪工人面前問佢   係咪食醫院飯好啲   佢笑住話梗係好啲啦   醫院飯出名難食   係因為一粒鹽都唔落   咁其實我覺得又係啱喎   瞓得醫院一定係有病㗎啦   食清啲就最好   所以我唔明點解媽咪入院次次都要食依樣食嗰樣   以為酒店咩 ~   

家姐 7 點幾嚟到   我即刻話媽咪仲有水腫   阿 Sir 話食醫院飯   唔係好難去到水腫   其實阿 Sir 無叫我咁做㗎   因為我咁講   家姐就會驚   妳話死未吖   正常人都會知道病嘅時候   一定要清清哋啦   何況媽咪身體仲有咁多問題添   又係唔用腦諗嘢   人講乜就乜   唉 ~

我同家姐講話媽咪今次都幾聽話   所以就探佢   不過聽晚真係唔嚟喇   因為開始有啲暈暈地   唔知係咪作每月一   所以要休息呢 ~

里奧大人 7 點放工   咁叫佢番屋企洗衫先   因為我同家姐差唔多要 8 點先走呀 ~

其實我超級攰   明明話上車打比里奧大人   點知當我落車嘅時候   里奧大人問我喺邊 ?!   我話番到九龍灣喇   佢即刻話做咩唔打比佢   我真係完全唔知記得呀  哈哈 ~

我話依家只係食白肉   佢話去上海婆婆食喎 ~

佢話頭先開機洗衫之後瞓着咗添呀   如果唔係陪我食嘢   佢想唔食就瞓添呀 ~

咁食完諗住去 Taste 買急凍鯖魚嘛   不過佢話喉嚨有啲唔舒服   咁我即刻話食唔食芒黑白呀   因為佢上次食完   話喉嚨唔痛呀   所以佢又話食喇 ~

今次奇境啦   有枱人居然買埋細嘅生日蛋糕同小朋友慶祝生日   仲唱埋生日歌   咁里奧大人話佢哋有食嘢嘅   但我話食嘢就梗係要啦   唔通 8 個人齋坐咁堅咩   同埋佢哋好似就咁食 2 樣嘢咋喎   我話好多食店都唔會比帶外來嘢家嘛   仲咁明目張膽買個蛋糕   仲問職員借火機 ~

之後我見到有個女仔超級瘦   里奧大人話我手臂粗過個女仔腳瓜 "long"   我話如果我一腳踢佢個肚度   佢都唔知飛咗去邊   里奧大人笑笑口話我係都要打人咁暴力嘅   哈哈   我話係因為咁樣   先知個女仔弱質纖纖得幾咁緊要嘛    呵呵 ~

番到屋企晾埋衫就即沖涼喇   呢幾晚都有睇 "Do 姐有問題"   因為想睇農夫   覺得佢哋好搞笑   咁臨瞓前睇啲笑嘢   個人都開心啲呢   哈哈 ~

又係睇完即瞓   加上依排潮濕天氣   好似瞓極唔夠咁   11 點瞓算係遲添呀   哈哈 ~