泰感動 @ 曼谷。泰國 DAY 1 (PART 2/2) ( 25-JUN-2016 )

( 25-JUN-2016  SUN  Day 1 ~ Part 2/2 )

原來依家唔係 Tuk Tuk 喇   改咗為 Motor Car   最慘係每半個鐘頭先一班車囉   天呀   做咩咁樣變動架   咁樣好唔方便呢 ~

我都係鍾意之前嘅 Tuk Tuk 多啲   特色啲嘛

我腳短   所以上車比較論盡   加上又着埋裙   所以更加論盡

Time Table

Emquartier 已經開張咗段時間   我相信佢啲嘢都應該唔平 lu

第 1 件事係去兌換錢   Phrom Phong BTS 站都有幾間兌換店㗎   今日 UOB 最高價 4.47 呀   所以兌換 HK$2,500 先   即係 11,175B   今日應該夠用喇啩 ~

Phrom Phong BTS 站

搭 28B 去 Chit Lom

BTS 站入面有 3 間兌換店   UOB 兌 4.47 係最高呢

    

BTS 勁多人呀   好在冷氣夠凍   所以我都鍾意坐 BTS 呢   呵呵 ~

入到車廂   我好留心睇緊 Chit Lom 係第幾個站落車   因為好多人   我驚落唔切車   咁我聽到里奧大人問我去邊 ?!   我話 Chit Lom   之後佢再問   其實我聽唔清楚佢講乜   只聽到 "去邊"   咁我話 Chit Lom   之後佢好大聲話係問妳依家喺邊呀 ?!   我好悔氣話去 Asok 呀   之後我都好火滾話都唔知你咁勞氣做咩   佢仲話我九唔搭八添呀   大佬   我鬼知到邊咩  我睇緊邊個站落車家嘛   我見到 Asok 閃閃下先知係 Asok 咋   自己唔睇又問人   發神經 ~

咁行入啲車廂啦   有個泰國人望住我   我知乜料啦   之後讓位我坐呀   其實佢已經望咗我 2 次㗎喇   次次都係望住我個肚先囉   不過我話唔駛喇 Thank You   因為過多 2 個站就落車嘛   同埋佢本身都捧住 2 大袋嘢嘛   所以我覺得喺泰國坐 BTS   係好易感受到當地人嘅風度呢   咁我肥嘛   就更加 "快" 感受到啦   哈哈 ~

經過 SuperRich   個價係 4.5 呀   所以里奧大人話兌換多 HK$500 (4,500 B)   驚我唔夠錢用   你話係咪吖   頭先咁鬧我   依家又驚我無錢用   都唔知嬲唔嬲佢好 ~

但其實放心啦   今次我唔會亂買嘢囉   我成日同里奧大人講話去 Super Sandwich 兌換錢   之後佢會問番我其實去邊度兌換錢   哈哈哈哈 ~

開始天黑 lu

行多 10 分鐘就去到 Platinum

依家起緊天橋   第時唔駛日曬雨淋咁行去 Platinum 喇   我番嚟香港無耐   呢條橋都開咗喇   做咩唔早啲開呀   哈哈

5 點半去到 Platinum Fashion Mall   7 點半關門   所以一啱就要買喇 ~

去到 Platinum 附近喇   開咗好多呢啲車仔檔

口渴呀   又唔想飲沙冰   但大杯椰子水又貴   所以我話去 7-11 買嘢飲

買到心頭好   仲只係 17B 咋

我買椰子水   都幾好飲   好似 24B

其實唔太記得行邊個 Zone 先   總知一見啱就買   因為番轉頭都唔記得係邊間 lu   呢件係我第一件買嘅 Tee   300B 抵啦

Men 係 4 樓   所以去咗 4 樓睇先   因為里奧大人想買啲裇衫

我仍然會叫里奧大人買呢啲紮染 Tee   之前 1,000B/5 件   依家 1700B/10 件   平過底衫呀   唔買唔得啦   可惜佢無女裝啦   唔係我可以買 2 件着下

見到八哥衫就最開心   因為可以買比家姐   買咗 2 件比佢咋   右上角嘅飛天八哥無貨   我又唔想要 Display 囉

呢件無要嘅 Size   唔係我都會買比家姐

里奧大人喺呢度買咗 2 件裇衫   我實會問有無得試先買㗎   因為款唔同 Cutting 又唔同   買咗唔啱真係好嘥囉

見我鬼鬼祟祟影相   所以比咗張卡片比我   哈哈

行呀行   都 7 點半 lu   見有啲已經收緊舖   咁唯有搵日再去啦 ~  

有啲餓   所以上 Food Court 食啲嘢   但原來已經熄咗冷氣添呀   不過好想食嘢   所以照食   慢慢食無咁熱 ~

最緊要記住價錢

芒果糯米飯真係好平

加辣椒粉先好味   同埋鍾意份量細細   可以食多啲唔同款嘢食嘛

仍然係好好味嘅芒果糯米飯   芒果好甜   不過手指尾濕疹   所以唔敢食咁多

8 點喇   差唔多全部店舖都關哂門喇

過多 1 分鐘   燈都熄埋   第一次見咁情況   唔知以為佢停電添呀

落到大門口   見個個企哂喺度   以為咩事   原來落好大雨呀   咁我哋都等陣先行囉   因為把遮喺個喼度   頭先又無等到行李   又無換番對 Cross   下次都係自己拎行李上房算喇 ~

好在 5 分鐘左右後開始細番啲   咁行去 Big C 喇   咁佢哋收 12 點嘛   所以我話食嘢先再買   呵呵 ~

如果行到呢啲灘檔就好啦

里奧大人唔敢喺度食嘢   因為太多車喇

人頭湧湧

炭火燒魚好吸引

勁塞車   曼谷特色也

8 點 15 分去到 Big C 喇   其實都無認真行過呢過商場   次次都只係去超市   估唔到都有啲檔口仔   咁就啱我喇   有平嘢執   咁啱我想買條長褲去大皇宮   呢條 200B 咋   質地又舒服    Last One 都要買呀 ~

去到都係 8 點半   原來 Food Hall 檔口都執緊嘢   得番雞飯咋   照殺 ~

最後衝刺

雖然係 Food Court   但地方都好闊落   正呀

40B咋   個辣汁好味道呀   仲要係油飯添   真係夠哂飽㗎

唔夠 9 點都無哂人 lu

9 點殺入 Big C   但零食區全部係香港人   同埋實在太多人   真係無乜心機買囉   所以買住少少嘢先 ~

炸豬皮好味   所以買咗先   但唔知呢包好唔好食   哈哈

平呀   所以叫里奧大人買支今晚試下   啱就再買

如果唔買箱麵   其實真係好輕鬆呢   辛苦里奧大人了   呢度買咗 707.5B

諗住打的   佢收我哋 200B   我覺得貴呀   所以都係搭 BTS 算喇 ~

今次唔等 Shuttle 喇   咁經過 7-11   我要買 A&W 飲呀   買完之後行番去 Apartment   點知落大雨   咁喺餐廳門口避一避啦   細番啲再行   點知唔夠 1 分鐘又勁大粒雨   直頭成身濕哂呀   我哋同埋 3 個女仔企喺有樹嘅地方避雨   大家望住笑啦   風雨同路嘛   之後我叫里奧大人拎啲新衫出嚟   包住個頭即飛跑去 Apartment 呀   係咁踩水氹   由頭濕到落腳 ~

10 點番到 Phrom Phong

A&W 只係 14B 咋   我好鍾意飲㗎   香港搵唔到   不過就算有   都應該貴囉

落緊大雨

番到 Apartment 門口   收番件衫先入去啦   無理由整到人哋地下濕哂嘛   之後有個 Staff 即刻衝出嚟   叫我哋等陣   之後就拎條大毛巾比我哋包住   好窩心呀 ~

掛好哂啲濕嘅衫   又要洗埋對鞋   之後先可以沖涼呀   我同里奧大人講話今晚個廳要開大啲冷氣   等啲衫快啲乾 ~

搞掂哂   差唔多 12 點幾先瞓   勁攰   哈哈 ~

買咗呢張 SIM Card

頭先喺 Big C 買嘅嘢   冬蔭功麵係 204B   但唔記得係咪有 50 包

喺 Platinum 買嘅衫

呢日行程完畢 ^^