生炒排骨 + 麻辣菜心 ( 2-JUN-2016 )

( 2-JUN-2016  THU )

尋晚瞓得唔錯   感恩感恩 ~

我今朝特登放 "Pair" 挨住里奧大人   話如果我暈咗就會咁   佢嗌哂救命話好重   之後話祝我身體健康   千其唔好暈   因為要 Call 去泰國搵大笨象先扶得起我   咁我話遠喎   同埋要加錢   佢話啲街坊實會夾錢   因為實在太重   無人扶得到   哈哈 ~

早餐食豬扒包   點知家姐 Whatsapp 問我食咩   兩次食豬扒包都問我食咩   佢以為我好鍾意食呀   哈哈 ~ 

菇場唔太忙   但唔知點解個人硬係好攰咁   唉 ~

Lunch Time 出去買零食比家姐同媽咪工人   之後行多陣就番菇場喇   食埋前日嘅提子麥包就開工 lu ~

里奧大人 2 點半上深圳見客   希望快啲見完快啲番屋企啦 ~    

放工即走   去埋養和堂買雞骨草就番屋企 lu   依家每支要 $25 喇   之前買開仲係 $23   真係乜都加哂價   出去食嘢飲嘢   真係出哂血   哈哈 ~  

今晚勁喇   的起心肝拖地   我覺得呢個月超級懶   真係唔願做家務咁   所以今晚點都要拖地同熨衫   要 Warm Up 一下做家務的心呢 ~

里奧大人 6 點 15 分坐直通巴番香港   佢話 7 點 15 分左右番到屋企   咁我諗住拖完地抖下   6 點半問里奧大人喺邊   佢話已經喺馬鞍山   咁即係好快番到屋企   所以要即煮飯喇 ~

是日懶餐 - 生炒排骨 + 麻辣菜心 

生炒排骨 - 上次整唔到   今晚一定要整到   里奧大人差唔多食哂成碟   果然好鍾意食肉   之後叫佢食埋啲菜就即刻話飽   咁 Whatsapp 比家姐睇   佢問係咪生炒排骨 ?!   我話係   佢嘅語氣好驚訝咁   之後係咁話好勁   我話其實好易   易過焗蛋糕   但味道當然唔似出面咁好食啦   同埋無咁火候   佢話因為我要番工   放工仲有心機整   可能佢呢排晚晚開 OT 到 10 點幾   所以佢放工一定無時間整嘢啦   唔同我放得早嘛   哈哈 ~    

麻辣菜心 - 將尋晚啲麻辣汁淋上面   當新菜式   哈哈   不過我覺得麻辣同菜心嘅味道係唔夾   我覺得油麥菜或者生菜會夾啲咁囉 ~

搞掂哂都 8 點半   沖埋涼就熨衫喇   熨咗個幾鐘   又攰又熱 ~

今晚 11 點幾瞓   希望仍然瞓得好啦 ~