五彩素糭皇 + 黃蘿蔔壽司 + 齋滷味 (外賣) ( 5-JUN-2016 )

( 5-JUN-2016  SUN )

今朝要做事奉   所以 9 點半起身   沖涼之後就落樓食早餐   食完去鴻星拎糭    家姐尋晚比咗 3 張糭劵比我哋   最遲 6 號要拎   所以依家一記得就即拎   唔係就嘥哂㗎喇 ~   

里奧大人第一時間 "北" 一湯匙粟米比我食   佢知我鍾意食嘛   同埋話今次好多喎   其實佢唔講呢句咪得囉   講咗之後   好似因為食唔哂就比我食咁   哈哈

抖到 11 點就自己番教會先   教會弟兄一見到我   安慰我之餘   叫我多啲笑容   我都知自己真係無乜點笑   平時我番教會真係笑哂同人打招呼家嘛   之後到其他弟兄姊妹牧師問我心情 OK 未 ?!   我就忍唔住喊   所以其實我想心情完全 OK 先番教會   不過又無可能   佢哋見我太耐無番都會搵我   始終我都要面對呢 ~

崇拜完畢就去 mega BOX   呢期勁鍾意 Minions 嘅阿 Bob   所以我話想買佢啲嘢   里奧大人即陪我去大眾同 Toyrus 睇   之後我話會將之前鍾意嘅梳乎蛋轉移比佢   佢要好好保管   佢成日話我鍾意黃色嘢   話時話又係  海棉寶寶 梳乎蛋 Minions 都係黃色   佢仲話連食都要黃色   所以我咁鍾意食粟米   哈哈 ~      

去埋 Ikea 睇嘢   之後 2 點半就食嘢   因為我突然間好餓咁呀 ~ 

熱辣辣嘅薯格好味呀 

素菜丸 - 口感腍 Pat Pat    好難食呀   哈哈

好似 $20/10 粒   其實就咁食呢 Set 嘢都夠哂飽   因為薯蓉好飽肚呢 

好奇怪   呢餐突然間好想食肉   

呢個肉醬意粉   真係賣相名味道都唔太掂   哈哈  

我哋坐最入面   中間有 2 個女仔坐   再隔離係一對男女朋友坐   咁中間 2 個女仔一齊去買嘢   但里奧大人同我講話佢哋個袋就咁放喺張櫈度   係咪諗住我哋會看住呢 ?!   老實講   如果我哋 4 個一齊食完   佢又未番   我唔會同佢看袋   因為佢無叫我看住嘛   之後隔隔離個女人同我哋笑住講   話哋應該覺得香港治安好好   之後里奧大人話覺得我哋啲樣老實   所以先夠膽就咁放低   個男朋友笑住話好事   因為我哋個樣老實   哈哈 ~

食飽就再行多陣 Ikea   之後再去 AEON   行到 5 點半左右就搭 Shuttle Bus 番九龍灣   去埋 MP 買黃蘿蔔壽司   里奧大人無啦啦話想食齋   所以再去 Taste 買盒齋就番屋企喇   好攰呀   哈哈 ~

今晚只係蒸糭   所以可以沖涼先   實在太正喇   沖完涼食飯 ~

我問里奧大人 啲糭熱唔熱   之後佢笑   我即食咗啖   係暖咋   佢話驚我辛苦   所以唔敢講話暖   我話一定要講出嚟啦   唔熱會屙㗎   我已經蒸咗 15 分鐘   無諗過唔熱   唉  最後再蒸多 10 分鐘   拆開哂應該快熱啲啦   哈哈 ~

搞掂哂就睇下旅遊書同睇下電視   11 點唔夠就瞓  lu ~