煙鴨胸 + 鵝肝炒飯 + 油麥菜 + 陳皮紅豆沙 ( 14-OCT-2016 )

( 14-OCT-2016  FRI )

又星期五喇   10 月話咁快又過咗半個月 ~

早餐食腿治   呢間茶記都算唔錯架喇   起碼會煎咗塊火腿   咁樣好味好多   里奧大人最唔鍾意啲茶餐廳係烚火腿同腸仔   但其實我又無咩所謂   無咁油膩都 OK ~

菇場唔太忙   呢排勁攰  真係想抖下 ~

Lunch 食酸辣米線   唔知做乜鬼   覺得今次又無咁好食咁   如果係咁都幾好   唔駛成日想食佢呢   哈哈 ~

無啦啦又忙   聽日 Off 嘛   所以一定要搞掂 ~

好在 5 點左右搞掂   咁可以準時放工喇 ~

今日里奧大人又見客   所以好早番到屋企 lu ~

里奧大人終於知道我受委屈唔開心   算佢啦   我成日都話呢單嘢佢地對人唔對事   反而我對事唔對人就係錯   我真係接受唔到囉   一講到錢就入哂我哋數   神經病   所以今次呢單嘢   我真係再肯定確實知道佢哋係啲咩嘢人   咁不知所謂嘅嘢都可以做得出   以前對佢哋已經無好感   依家直頭係反感   完全覺得識佢哋係影衰我添呀 ~

好在里奧大人都聽我分析   我叫佢同佢哋   唔好成日一廂情願暗地裡做嘢   有啲嘢唔駛你哋講   但個天會好自然會比我知道   所以有咩嘢就光明正大咁講   自把自為係無可能行事呢 ~

講完就去煮飯   今晚終於放開哂   講清講楚   所以好開心 ~

是日懶餐 - 煙鴨胸 + 鵝肝炒飯 + 油麥菜 + 陳皮紅豆沙  

煙鴨胸 - 之前喺商場見到 Ocean Three 有鴨胸   咁買咗 2 件   $9/件好抵   仲係 Product of Japan   不過我覺得無咩味噃   唔通要自己用黑椒醃 ?!   咁我又唔會喎   我成日覺得買呢啲現成嘢係貪佢夠方便   一煎就食得   所以我唔會加工再醃囉    如果唔係駛咩要食佢喎 ~        

鵝肝炒飯 - 我同里奧大人話鵝肝無咩味   佢話擺咗年幾喇   咩味都無啦   我話唔係應該越耐越有味嘅咩 ?!  

油麥菜 - 終於清埋呢幾棵油麥菜喇   其實就咁蘸 ABC 甜豉油都好好味   如果我有時間   其實想加埋蒜頭紅蔥頭一齊炒   咁仲正呢 ~  

陳皮紅豆沙 - 今朝臨出門口先浸紅豆   都唔腍嘅   好在我試咗口感先咋   咁無辦法啦   唯有壓爛去扮起沙   自欺欺人   哈哈   但可惜   味道苦苦地   唔通太早落陳皮 ?!   最衰自己懶睇 Recipe 啦   依家煲咗一大煲   真係死得   哈哈   但唔理喇   我照食架   聽晚再食埋去   唔想嘥嘢 ~

搞掂哂就沖涼   之後休息喇 ~

里奧大人聽朝要見客   11 點幾都一齊瞓喇 ~