豆腐臘腸蒸水蛋 + 蝦米粉絲脆肉瓜 ( 16-MAR-2021 )

( 16-MAR-2021  TUE )

呢排唔係瞓得好   但又未至於瞓得差   最煩係咁    哈哈哈哈 ~

我排隊等車   但睇緊手機   又有人打我尖   我以為係識得排前面嘅人   因為佢上車好趕   但上車佢哋分開坐   咁真係打尖啦   之後啤住佢   佢笑住話唔該哂   我覺得呢啲人真係好衰格囉   個個都番工想有位坐嘛 ~

Berry 瞓喺家姐隻腳上面   又唔知自己重   哈哈

今朝食芝腿治烘底   真係好好味 ~

放低三文治就即去洗杯再沖嘢飲   咁樣都要 5 分鐘   所以啲芝士實會痴哂落張紙度   我會用匙更慢慢刮啲芝士   都刮得幾多㗎   

菇場忙呀   勁充實 ~

Berry 姐好似陪住家姐做嘢咁

唉   我張櫈嘅碌又爛咗   BG 話好多同事都係咁   其實呢張櫈都坐得唔舒服   同埋真係好多同事都要換碌   不過佢話遲啲都要換哂所有櫈㗎喇 ~

Lunch Time 出去超市買蠔油   特價 $18   所以買 6 樽同定姐 Share   依家鍾意燜餸   所以蠔油用得好快 ~

買牛腩河番菇場食   今日好熱咁呀   要開風扇仔 ~

又唔忙喇   做自己嘢咁啦 ~

放工即走   番到屋企抖陣    今晚只係蒸餸   所以等里奧大人放工先預備 ~

里奧大人 6 點半放工   我都要整晚餐喇 ~

是日懶餐 - 豆腐臘腸蒸水蛋 + 蝦米粉絲脆肉瓜

豆腐臘腸蒸水蛋 - 終於清埋最後 1 條玉子豆腐   儲備呢家嘢   真係有又煩   無又煩   哈哈   我覺得今次唔係水蛋嘅滑嘟嘟口感   但都好味呀   我真係鍾意食老蛋多啲㗎 ~

蝦米粉絲脆肉瓜 - 本身諗住節瓜   但壞咗   所以用埋最後 1 條脆肉瓜整喇   依家腦袋曉得急轉彎   哈哈哈哈 ~

洗埋碗就開機洗衫   之後沖涼喇 ~

今晚睇女神降臨 (True Beauty)   家姐話幾好笑   所以我又睇下   估唔到都幾好笑喎   但就唔會追囉   唔想成日咁夜瞓 ~

我 11 點都瞓覺喇   里奧大人就靈修 ~