醬爆牛仔骨 + 超甜粟米粒炒飯 ( NOV-2017 )

尋日整天都忙到不可開交   簡直令人心力交瘁呀   好在已經諗好時日晚餐   醬爆牛仔骨 + 超甜粟米粒炒飯   唔係就又要出街食㗎喇 ~

尋晚拎驗血報告   甲狀腺同血液含鐵量都係正常呀   真係好開心   希望中藥真係有果效啦   咁長途跋涉北上   咁辛苦都係值得嘅   當然最重要都係神既保守醫治啦 ~

拎完報告就拿拿林去街市買超甜粟米   $5 有 3 支   好抵呀 ~

由於里奧大人已在途中   所以番到屋企都唔敢怠慢   即刻埋位開工 ~

本來想續粒續粒拻啲粟米   但咁拻法實在太嘥時間   所以用刀切就算喇   之後再切洋蔥同蔥粒   準備就緒   開鑊喇 ~

醬爆牛仔骨- 黑椒汁同蕃茄汁都食到有啲悶   所以就用李錦記 "醬爆牛仔骨" 醬汁   洋蔥爆香備用   之後再煎牛仔骨   再落醬爆汁   洋蔥回鑊兜兩兜就搞掂   好好味呀 

超甜粟米炒飯 - 切既粟米粒有水份流出   而續粒拻既就唔會   仲會有爆既感覺添   今次係一個無肉炒飯   只係用蔥粒 + 粟米粒 + 洋蔥粒 + 生抽 + 老抽咁炒   好簡單又好好食   因為我係超鍾意食粟米呀 ~

尋晚里奧大人都幾好   幫手燙衫同掠衫   如果又要我做我肯定咆哮呀   咩都要我做   想辛苦死我咩 ~

做女真係好好好好好好   想食咩媽咪就煮咩   我放工番到屋企係第一時間沖涼   之後食飯同睇電視   同深愛朱朱玩   咩都唔駛做幾嘆呀   依家放工番到屋企第一時間煮飯 (連坐都無時間)   洗碗 + 做家務再沖涼   可以睇 9 點嘅電視劇已經係奢侈品喇   我都想懶㗎   但都係要自己做   里奧大人次次見親我做家務咁辛苦就會講: 唔好做啦   一星期做一次咪得囉   天呀   咩唔係應該話: 等我嚟啦   一星期唔掃塵唔掃地 ?!   咁我洗碗都辛苦喎   唔通又一星期洗一次 ?!   救命呀 ~

~~~~

今朝塞車呀   所以要買早餐番公司食   牛肉 + 魚肉燒賣 ($10)   (人家想要粉果   但番到公司先知到比錯咗) + 維他 100% 低脂朱古力奶 ($4.6)   今勻真係趕頭趕命食喇   費事遲大到仲施施然咁食啦   之後又好忙喇 ~

晏晝帶飯   食番隔夜餸   不過都好好味 ~

我估忙埋呢一日又會無咁忙   咁我就可以過番我啲優哉悠哉既生活喇 ~