茄汁豬扒 + 菜心 ( 11-MAR-2014 )

( 11-MAR-2014  TUE )

尋晚狂玩 Pokopang   連發夢都玩 Pokopang   真係人都顛   哈 ~

諗住去去開間茶餐廳食早餐   不過爆哂   所以即轉場   呢間新嘢唔錯架   無咩人   可以好安靜咁享受個早餐呢 ~

菇場忙下停下   所以 d 時間就好快過   正呀 ~

同同事 PMS 出去食   同 8 卦渠王一齊同 lift   佢地勁愕然啦   估唔到我同 PMS 咁熟嘛 ~

冬蔭功蝦金邊粉

香葉肉碎飯

去食泰國嘢   一路食一路傾   d 時間又係過得好快   之後再行陣就番菇場喇 ~

我頭先同 PMS 講   8 卦實會問我頭先食咩   但我呢排好多時都出去食   佢都無問   點知一開工   8 卦真係問我頭先食咩 ~

放工走喇   番到屋企就勁忙啦   煲中藥燉肉汁   之後浸菜   開機洗衫   完全無停過手 ~

差唔多 7 點就食粥   衰里奧大人啦   又唔食   依家一煲粥要食兩晚   好驚囉 ~      

食飽就抖陣   然後就煮晚飯喇 ~

是日懶餐 - 茄汁豬扒 + 菜心 

茄汁豬扒 - 上次煮咗勁鞋豬扒之後   真係好驚煎豬扒架   今次 d 豬扒喺百佳買架   3 塊薄嘅   只係 $13 咋   同埋真係鍾意佢夠薄囉   之後我再勁 "dir" d 豬扒   但唔記得落生粉醃   所以里奧大人都話仍然係 overcook   不過無上次 overcook 得咁勁   嘩哈哈 ~

菜心 - 諗住 2 磅菜心會好快食哂   點知尋晚淥咗 1/3   今晚再淥埋剩咗果 d   不過都食唔哂   如果我無食粥   我都會盡量食埋   但食粥食到成肚水   我已經無食豬扒架喇   就咁食菜   但真係好飽   所以又要剩番小小聽晚食   慘 ~

里奧大人差唔多 8 點半先放工呀   所以我都沖涼先 lu   因為好鬼凍呀 ~

洗埋碗   等埋里奧大人沖涼就一齊睇心計   今晚成 11 點半先瞓   遲咗喇   呢排天氣勁潮濕   搞到個人真係好攰   瞓極都唔夠咁 ~