燻蹄 (外賣) + 齋滷味 (外賣) ( 4-JUN-2017 )

( 4-JUN-2017  SUN )

今朝 9 點起身   沖埋涼就去食早餐   之後番教會喇 ~





崇拜完畢   里奧大人就去剪髮   我就去買燻蹄同木瓜   再去超市買盒齋滷味   話咁快過咗半個鐘   咁打比里奧大人啦   如果佢仲有排   我就番屋企先   但佢話差唔多搞掂   咁就去大快活食下午茶喇 ~

食到咁上下   有人叫里奧大人個名   我以為係教友   原來係安安   之前食早餐間唔中見到   估唔到我哋咁耐無嚟大快活食下午茶   咁都比佢撞到   佢係一名口水佬來   所以我食完都走先喇   等佢哋慢慢傾啦 ~   



阿安安搽哂牛油喺塊麵包度   里奧大人話佢好唔健康   其實安安已經瘦咗 1 個碼   安安話有時都要放縱下   唔係咁樣做人會好辛苦   所以一星期會食兩餐勁嘢   我覺得最搞笑係里奧大人囉   又唔望下自己面前食緊啲咩   係炸肶 + 西多士 + 紅豆冰呀   唔 Heavy 得過一塊牛油 ?!   仲有今朝仲食丁丁喎   仲同人哋講唔健康   最唔健康就係你呀   哈哈   不過咁   里奧大人假期食咩我都唔會話   因為佢真係放假先咁樣食   平時番工食好少嘢㗎咋

番到屋企諗住抖   但又想熨衫   咁即熨埋 2 機衫   郁下有好啲咁喎   條命唔係咁苦呀嘛   哈哈 ~

無耐里奧大人都留嚟   佢問我點解唔抖   我話郁下反而無咁辛苦 ~

搞掂哂就抖陣   開始好唔舒服喇   勁咳同打噴嚏   不過抖到 6 點半都煮嘢喇  快食快休息 ~

今餐勁簡單   兩樣餸都係外賣   就咁淥個拉麵就搞掂 ~

洗埋哂嘢就就沖涼   奇怪點解啲熱水係暖暖哋   之前啲熱水係熱到辣肉㗎   我越沖越驚   唔係發燒燒到成身滾熱辣呀嘛   定係里奧大人校細咗 ?!   但我唔覺佢校過喎   我一沖完涼即問佢啦   佢話佢係校細咗呀   仲笑住問我係唔係好啲 ?!   我話頭先嚇死呀   真係呢 ~

諗住抖啦   點知大食打嚟傾偈   佢話婆婆日日係咁打比阿姨   但阿姨去緊旅行喎   咁番到嚟香港無聽到婆婆電話   婆婆又叫大食打比阿姨   之後大食話阿姨好鬼激氣   日日打嚟做乜 ?!

嗰時我去大陸又係咁   講咗話喺大陸都打嚟 2 次   咁媽咪喺醫院   問我媽咪咩情況 ?!   我真係一句頂番佢   我去緊旅行點知呀 ?!   我真係覺得好煩   去旅行最怕收到長途電話   因為驚唔知發生咩事呀   妳就日日係咁打嚟   真係唔發火都唔得 ~

好啦   諗住食木瓜   點知又到媽咪工人 whatsapp 我   聽完個唔好消息之後   我都完全無哂心機   咁我叫佢開心啲啦   健康最緊要   番到嚟香港一定要搵我同家姐呀   之後佢喊咗幾秒   嚇鬼死我咩   以為咩事   佢話好開心我哋仲咁錫佢   咁我話佢都好錫我同家姐同媽咪嘛   總知   依家最緊要係開開心心   養好身體 ~

如果佢喺香港   我反而唔擔心   因為我隨時會知佢近況   但依家佢喺印尼   我成日搵唔到佢喎   其實我 2 月已經問佢近況㗎喇   但佢又無覆   以為佢改咗號碼添   咁家姐又叫佢工人幫忙問下咩近況   佢又無覆   仲以為佢唔想再同我哋聯絡添 ~

平復情緒之後就食埋個木瓜   睇多陣電視   9 點 20 分自己瞓先喇 ~