蜜汁叉燒 (外賣) + 金銀蛋娃娃菜 ( 6-JUN-2017 )

( 6-JUN-2017  TUE )

又係瞓住咳   之後咳住瞓   同埋咳都好熱咁呀 ~

感恩起身唔太攰   同埋我唔比自己懶床   咁樣就好快搞掂   可以出門口呢 ~

仍然咳   但感冒又好番哂喎   無打噴嚏流鼻水喇   感恩感恩 ~

早餐食腿蛋治   呢排食包食到好悶   但又唔想食米粉餐   唉 ~

菇場忙爆呀   但要快快手做埋個長命 Report   無諗過今朝咁鬼忙   哈哈 ~

Lunch Time 去買指天椒   個衰佬叫佢比 $5   佢係都要我買一份 $6 嗰啲   我見啲指天椒好多都黑色   我一定唔買囉   之後即走   最憎呢啲人 ~

買埋一份雪梨   幫里奧大人買埋麵包做早餐   咁就買燒賣粉果番菇場食喇   真係又要番轉頭食番佢   但真係無以前咁好味 lu ~


菇場仍然忙爆   Send 埋個 Report 又要做其他 System 嘢   其實係仲更加煩   好唔想做囉   嗚嗚 ~

里奧大人 3 點喺太子見客   所以佢都番屋企先   我就放工即走   買埋叉燒同羅漢果就番屋企喇 ~

浸好菜就拖地   之後淥埋拉麵   煲埋羅漢果雪梨茶就搞掂   差唔多 7 點先可以開餐 ~

是日懶餐 - 蜜汁叉燒 (外賣) + 金銀蛋娃娃菜

蜜汁叉燒 (外賣) - 喺大家樂買半斤叉燒   要 $51 喇   勁貴   又唔係話好好食先慘   但我又唔食得燒肉同油雞 ~

金銀蛋娃娃菜 - 非常後悔星期日買咗 2 Pack 娃娃菜   如果唔係會出去食   一了百了唔駛煩   哈哈   仲剩 1 Pack   聽晚食埋去啦唯有 ~

洗埋碗就開機洗衫   沖埋涼   都已經 9 點   唔怪得有啲攰啦 ~

飲埋杯羅漢果雪梨茶   真係好飽   又食唔落個木瓜   等我仲揀熟嗰啲添   聽晚又要每人食一個   唔係會惹蚊滋㗎 ~

今晚 11 點幾都瞓喇   希望唔好又係咁咳啦 ~