2017年10月21日星期六

大快活 @ 九龍灣 ( 21-OCT-2017 )




正宗肥牛啦   哈哈   不過咁都好   好易咬嚿肥膏出來    



我要辣雞湯底   無味唔緊要   最緊要有指天椒同蒜蓉同豉油就夠了   



里奧大人好開心咁話要叉燒糯米飯   個糯米飯好煙韌呀   但又好似帶點生生哋咁



( 20-OCT-2017  SAT )

今朝里奧大人幫水姑搬屋   所以 6 點都要起身喇   咁我都起身去廁所嘛   之後佢笑住話發夢見到我   係拍拖時嘅樣同身型   咩料呀   嗰次我比番瘦嘅相佢睇   又話我個樣好串   真係咩都佢講哂   之後我話幸福嘅人   每年肥 1.5 Kgs 㗎   所以我依家咪咁身型囉   你應該開心先啱啦 ~

佢出完門口   其實我都瞓得唔係幾好   始終我 7 點半又要起身   我應該 7 點 10 分先瞓番   但瞓得 20 分鐘又要醒 lu ~

今朝同家姐食早餐   兩星期無同佢食早餐喇   所以今朝零舍開心呢 ~



傾傾下偈   佢無啦啦話: 阿妹   妳塊臉咁多紋嘅 ?!   我話係呀   笑就多紋啦   之後佢話: 唔係喎   係塊臉唔笑都有紋喎   咪嚇我好喎姐姐   今朝里奧大人話我肥   妳又話我有紋   雙重打擊啦   嗚嗚   好在之前買咗 Mask 啫   真係要密密敷先得了 ~

食到 8 點 45 分就去搭車   番到菇場 9 點 10 分 ~

菇場其實有嘢做   不過無 Mood 做囉 ~

里奧大人同姑奶 & 水姑朋友一齊飲茶   咁我放工都 Join 埋佢哋   好怕喺菇場附近打的   次次要等好耐   今日算好喇   等咗 5 分鐘就有車 ~

去到酒樓   佢哋都走喇   要幫手執嘢   咁我同里奧大人就繼續食啦 ~

佢哋食剩咗啲雞同豬扒   咁我食埋啦   再叫份薑蔥牛柏葉   因為我想食熱嘢呀  



食完去水姑舊屋清潔   我同里奧大人講囉   我幫佢清潔   係挑戰人體極限   但其實只係吸塵   不過我講明一定一定唔會幫佢抹嘢同清洗廁所   唔明點解一個女人間屋可以咁超級勁污糟   里奧大人直頭話佢間房有幾條細細地嘅虫添呀   好恐怖呀 ~

整完舊屋   又要搬番啲嘢去新屋   都已經 5 點 45 分   勁攰呀   不過里奧大人慘啲   次次都搬到出哂汗   加上又早起身   所以佢搬完之後   行得都好慢   真係好攰呢 ~

咁去到大快活   同水姑交收鎖匙   佢話係咪搞掂哂 ?!   里奧大人話搞掂哂舊屋   新屋無搞過   水姑好大反應話: 乜你哋唔係幫我入埋好哂啲櫃桶㗎 ?!   里奧大人話根本入唔到屋   點搞 ?!

佢走咗之後   我同里奧大人講話佢講埋啲嘢令人好反感   間屋係妳㗎   啲嘢係應該妳自己執   唔係旨意人哋執囉   不知所謂   其實之前里奧大人都話叫佢叫啲兒甥幫手   佢自己又唔叫   如果唔係就可以好快搞掂啦 ~

食食下嘢又叫里奧大人買界刀   里奧大人話用較剪開箱咪得囉   之後打嚟又話好難 Cut   麻鬼煩   所以里奧大人最後都幫佢買再拎去佢屋企   話費事煩 ~

咁繼續食嘢啦   里奧大人一有電話響   都未睇來電顯示就嗌咗一聲先   佢都好驚聽水姑電話囉   我覺得妳叫人幫妳手做嘢   唔該有啲系統啦   唔係想到咩就叫人買咩   人哋唔係 Stand-by 等妳   之後仲叫里奧大人幫手做其他嘢   里奧大人話今晚唔得   因為好攰呀   真係黐黐哋   妳自己無幫手搬到屋都算   仲好意思叫個細佬做咁多嘢   真係好不知所謂囉 ~

食完就即走   此地不宜久番也 ~

里奧大人拎咗個新焗爐同企身熨斗   但一開個焗爐已經生哂锈   真係浪費哂   我都叫佢走盒啦   咁就一早見到個焗爐唔用得   唔駛特登打的番屋企嘛 ~

拆哂啲盒就即掉喇   之後拖地   沖涼就即洗衫洗鞋底   里奧大人笑哂話學佢咁洗鞋底   我話頭先去過咩嘢地方先得㗎大佬 ?!   之後佢都忍唔住笑 ~

里奧大人沖埋涼   睇多陣電視   8 點半都瞓覺喇   佢真係好攰呀   我就 10 點 45 分瞓呢 ~

沒有留言:

發佈留言