黑椒金菇豚肉卷 + 忘不了蒸茄子 ( 26-OCT-2017 )

( 26-OCT-2017  THU )

今朝起身都 OK 精神   唔通天氣涼涼哋   個人想瞓耐啲 ?!   所以成日唔想起身 ?!   但最慘係又早瞓唔到   差唔多 11 點半先有啲啲想瞓   不過瞓唔到都照瞓㗎喇   始終第日要番工嘛 ~

早餐食餐蛋治   超勁 Heavy   所以食到一半已經唔想食   哈哈 ~



菇場忙爆啦   諗住 Hea 下都唔得添 ~

Lunch Time 仲未餓   所以出去行下   番到菇場 1 點幾   要食 Lunch 喇   今日食 K + 乳酪   食完有啲胃痛添   可能啲乳酪酸得滯 ~



仍然忙忙忙   好鬼攰添   所以放工即番屋企喇 ~

今晚里奧大人番香港   咁我番到屋企都即刻預備晚餐   諗住我食先   之後徑步   但搞掂哂都已經 7 點   咁我食飯先啦   差唔多 7 點半打比里奧大人   原來佢已經喺九龍灣   咁我要煮麵比佢食   即係要搞掂哂先可以徑步 lu ~

是日晚餐 - 黑椒金菇豚肉卷 + 忘不了蒸茄子 

黑椒金菇豚肉卷 - 用 5 塊豚肉包 1 包金菇   所以條條脹卜卜 ~    

忘不了蒸茄子 - 買咗 2 條茄子   蒸起上嚟咁鬼多   下次買 1 條算喇   今次好懶   用忘不了就咁蒸熟就算喇   辣辣哋好味道呀   下次食完會再入貨   咁我用 1 包金菇墊底嘛   因為買咗都成個幾星期   唔想擺咁耐   所以清埋佢啦   依家食金菇食到好驚   嗚嗚 ~         

8 點半去徑步   之後家姐 Whatsapp 我食咩   平時佢都會咁問   但之後再問有無食剩 ?!   我話講到好似想嚟咁   佢話真係想嚟喎   呵呵 ~

姐夫約咗朋友   所以家姐話上嚟傾下偈   佢仲買咗煎釀上嚟食   之後我再比個雪糕月餅佢食   因為佢次次都比我哋食   佢都無食過呢 ~

傾下傾下就 10 點 15 分喇   係時候走人啦   咁我送佢搭車   佢話諗住快啲上樓上即同我拜拜   但架車開得好快   所以拜唔到   咁又真係喎   我望住佢上樓上   之後架車都飛走了   真係好少開得咁快呢   哈哈 ~

里奧大人都瞓覺喇   咁我沖埋涼就上 Youtube 睇嘢   係睇 "爸爸去那兒" 呀   我都好驚訝自己會睇   哈哈   見到啲小朋友想講就講   想喊就喊   咁純真嘅表現   真係小朋友階段先做到   真係唔好講笑   有時大人都會從小朋友身上領會到啲嘢㗎 ~

今晚差唔多 12 點先瞓呀   好夜啦 ~