招牌生煎包 - OK 啦 可能我凍咗先食
碧綠炒什菌 - 姑姐叫㗎
砂窩雲吞雞 (1/4隻) - 熱辣辣 正呀
榨菜肉末配叉子燒餅 - 味道係好 但好油呀
( 6-NOV-2017 MON )
今朝 7 點 15 分起身喇 里奧大人就話佢 7 點起身沖涼先 其實好多時都係佢起身先 咁會比我瞓多陣 咁講到去玩 我早起身都無所謂嘅 哈哈 ~
沖埋涼就去食早餐 之後番上屋企抖陣 8 點半出門口喇 ~
今日係同叔叔 嬸嬸 姑姐 家姐 姐夫 + 糟糟爸媽 + 3 個朋友們 一行 13 人 一齊入大澳一日遊 所以約咗 10 點喺東涌地鐵站 B 出口集合 糟糟佢地就 9 點去到東涌食早餐 家姐姐夫就搭巴士 我同里奧大人就搭地鐵 叔叔都係搭地鐵 咁我要去商場嘅洗手間嘛 估唔到我一出洗手間 嬸嬸就入來 咁其實我地應該係同一班車 因為地鐵車廂好嘈 所以無打比佢哋 ~
之後一齊行出去 B 出口喇 一出去就見到糟糟 Daddy 十幾年無見喇 佢認到我喎 但糟媽就認唔到我喇 哈哈哈哈 ~
咁我去 Pret A Manger 買咖啡比叔叔 咁嬸嬸同姑姐同我一齊去嘛 嬸嬸話同叔叔 Share 一杯 咁佢哋叫完 我就比錢啦 之後姑姐無啦啦自己又買 1 杯 仲話叫我飲我買嗰杯 但我都話明唔飲㗎啦 同埋叔叔唔要有奶嘅咖啡嘛 咁頭先妳叫嗰杯係有小奶家嘛 都唔知做乜鬼 古古怪怪 兩杯咖啡成 $82 㗎 我自己都唔捨得飲 真係呢 咁最後我買嘅兩杯都係叔叔嬸嬸飲囉 個個都食完早餐 點會無啦啦再飲咖啡喎 ~
呢個姑姐真係好神秘咁 嬸嬸同里奧大人講話佢來香港修行 3 個月 但姑姐就話唔係 里奧大人問佢係咪學下嘢 ?! 佢就答係學下嘢 ~
同埋我問一句佢就答一句 好似唔想比人知道啲嘢咁 所以無咩必要 我都唔會同佢一齊行啦 最怕 Dead Air ~
人齊再去埋洗手間 之後一齊出發去大澳喇 ~
平日同假日去大澳真係兩回事 今日真係無咁多人呢 爽 ~
10:32am 開車 成架車都 full 哂 同埋幾乎站站停 有啲人去拜山 有啲去露營 咁我哋差唔多 11:10am 就到大澳 都算快呀 ~
最緊要見唔到排隊人龍 哈哈
11 號巴士 $11.8/程 我覺得抵喎 初初以為要廿幾蚊
轉彎轉彎再轉彎 望景都還可以 但玩手機就一定唔得囉 會頭暈呢
我扶住各位 Auntie 落車
首先一齊行啦 之後糟糟 Daddy 就揀海鮮 我地就周圍影下相 ~
唔多人入大澳 所以行得好舒服呀
我同里奧大人行最尾 怕佢地會失散
其實我鍾意食花膠㗎 但醫生叫我唔好食呢
銀魚仔
一個字 "腥"
成日以為係 "隱世茶果"
繼續行
呢日無咩陽光 但又無咩風
船屋真係好有特色
佢哋 Order 海鮮喇 我就走去 8 下 我話我唔煮新鮮魚㗎 糟媽話唔識煮無得食 哈哈
每人有 2 隻蝦 咁啲蝦跳咗出來 離遠睇都好大隻
一袋袋送去酒樓
好多魚仔
成日向上望 條頸好攰㗎
佢又係劏緊魚
吊我上太空
鯊魚標本
好多蒼蠅
必影 哈哈哈哈
烤肉乾
買完又行去唔知邊喇 其實都係得一個方向 哈哈 糟媽話茶果好味喎 所以糟糟買咗 12 個 每人半個唔同味道 但最後食剩 2 個 我拎番屋企 呵呵 ~
食完又行啦 但好鬼口渴呀 糟糟又係勁口渴 所以話一陣去酒樓要叫 10 支可樂 哈哈 ~
呢日天陰陰又無乜風 行行下仲有啲熱添呀 ~
前面呢度有檔買茶果嘅 糟媽話好味道 所以糟糟買咗 6 個鹹同 6 個甜
好似 $7/個
每個切一半 咁每人都可以食鹹同甜呢
我食花生甜茶果 都好多料 同埋估唔到係咁熱辣辣
姐夫就同我哋一齊行 但家姐就同糟糟一齊行另一邊 其實家姐應該同我哋一齊行啦 話哂今個 Trip 係陪叔叔家嘛 ~
食完又行下啦 糟爸媽 & 1 個朋友就唔行 去酒樓坐下傾偈 其他人就繼續向前行
一身行山打扮 勁熱呀 哈哈
裝修 ?!
荒廢嘅屋
Y 型樹
唔知咩來
有隻蝴蝶飛緊
行到呢度 熱到呢
啲人話係無花果
喺度住 會唔會成日感覺浮下浮下咁呢 ?!
爛屋
開始有啲曬喇 里奧大人驚我中暑 所以一定一定要我帶頭巾
好大條鹹魚
切得好靚嘅蝦膏
好多響鈴
大飛 嬸嬸話唔坐得大飛 我就無咩問題 只係驚囉 哈哈哈哈
里奧大人又影蝴蝶 我行嘅時候 都見到黑蝴蝶 成日飛埋來咁 嚇死我 我 "揚" 開佢哋㗎
行到 Police Station 就走喇 因為都成 12 點 45 分 我哋 Book 咗 1 點食 lunch 呀 ~
叔叔好鍾意周圍睇嘢 又行得快 真係好好呢
里奧大人就自己行到呢度 佢應該見人上去 佢又跟住上去睇啦
請進
上到去就係咁喇
咁以為酒樓喺碼頭附近啦 點知原來要行條新橋 行到去酒樓都要 15 分鐘 不過行下傾下影下相 又好快行到去咁喎 ~
家姐同糟糟喺碼頭等我哋
今日都係天陰陰 不過就無落雨
幾咁寧靜
無諗過要行咁遠喎 唔怪得佢哋話要行 15 分鐘啦
舒服
新橋
邊行邊傾 所以好快去到
有隻白鷺
跟住呢個方向
我唔明點解個背囊成日都脹卜卜 但其實裝得唔多嘢㗎喎 影相嘅時候唔知 "high" 咗啲咩 整到背囊污糟哂 嗚嗚
到 "東方小祇園" 喇
家庭式營業 ?!
西芹炒龍躉片 - 啖啖肉又厚身 第一次食龍躉食得咁滿足咋 第一碟餸已經咁巨 所以剩咗 10 幾件 糟媽又夾埋比我 所以我起碼食咗 10 件呀
走地雞 x 2 - 肉質好嫩 但有部份就鹹咗啲
腐皮卷 - 所有素食都係糟媽特登 Order 比我姑姐㗎 但其實個個都有食 哈哈 呢個超級好味道呀 我真係可以食好多件㗎 不過呢餐只能夠食 1 件呢 哈哈
好似叫做素鵝 外脆內嫩嘅腐竹 我覺得麻麻哋 無咩特別
炸芋頭魚 - 里奧大人同家姐都好鍾意食 我一見到就話好味呀 之後糟媽即刻啤住我 哈哈哈哈 驚我食哂咁呀 所以我即刻話唔好味囉
炒頭腩 - 一擺上枱真係嚇一嚇 勁勁勁大碟呀 里奧大人夾咗 1 件食啦 見到係啖啖肉 最後食剩大半碟 所以嬸嬸拎比姑丈食 姑丈好鍾意食呢啲骨呢
唔知咩蟹 但見到好多膏呀 不過我同里奧大人就無食
右手面呢碟係送 咁我聽到個送字嘛 仲以為所有蟹係送嘅添 原來只係呢碟咋
到最後 頭腩食剩咁多呀 所以真係唔想浪費囉
薑汁炒芥蘭 勁好味 好重薑汁味道
豉油王炒蝦碌 - 勁大隻呀 有人唔食 所以我可以食 3 隻 正呀 呢排真係好鍾意食蝦 唔知點解
腰果露 好香腰果味呀 又唔甜 好味道
糟糟真係勁有心 每人都有份小禮物 外國團友就有禮物包 ( 念慈奄川貝枇杷糖 / 清熱酷 / 撒龍巴斯 / 環保袋 / 虎標萬金油 / 2018 福字月曆 )
香港團友就有大利是 勁咯 金額由 $40 - 8 百幾萬不等 哈哈哈哈 我同糟糟同家姐講話中咗 3 個字 佢哋勁開心 但我話分開 2 注中喎 之後比佢地妖到上天花板 哈哈
一路食一路傾 美加團友仲特別好傾添 不過其實間酒樓都好嘈囉 因為全場爆滿 ~
糟媽成日招呼我哋 咁斟水比里奧大人就好溫柔 里奧大人飲熱水吖 一到我呢 就叫: 喂 攞個杯出嚟 我話囉 做咩叫我喂喎 佢話我唔叫妳做乜水已經好好 哈哈哈哈 糟媽非常玩得 仍都霸氣非常 哈哈 ~
差唔多 2 點半就走人喇 食飽就有氣有力行啦 ~
靜哂
慘慘眼神 好得意呀 不過我唔敢摸佢呢
只係個頭郁咋 手腳無郁 好得意
好多狗呀
一路行一路同糟媽傾偈 問我有無同家姐見面 ?! 佢咁問 我覺得好有親戚 Feel 哈哈 不過佢都好關心我同家姐嘅 佢仲同我講咗啲嘢 我都好 Shock 糟媽都係一個挑通眼眉嘅人 ~
佢最搞笑話糟糟次次都唔陪佢嚟大澳㗎 係今次妳哋一齊嚟 佢先嚟咋 咁我話糟糟都好孝順啦 成日都陪妳哋去旅行 又車出車入 算係咁啦 ~
之後經過見到有人唱 K 我問糟媽有無喺屋企唱 K 呀 ?! 佢話無啦 糟糟唔比我唱㗎 話大聲會刺激隻狗 因為佢隻狗狗心臟係好差 唔可以受刺激 又話糟糟唔比佢地開大聲電視 要佢哋用藍牙 Head Phone 聽 笑死我呀 ~
沿途
"番鬼塘" 個名好搞笑
但呢日就換咗做 "梁屋" 了
諗起台南架劏車 哈哈
4 點開車 開車無耐都瞓着咗喇 仲勁好瞓添呀 係差唔多落車先醒 ~
估唔到好多人排隊呀 要等第 2 部車先上到
4 點 45 分到東涌 之後各散東西喇 糟糟就同家姐去睇中醫 我咪同里奧大人講囉 睇醫生幾時都有得睇 但叔叔唔係成日見 點會走去睇醫生 一係妳一早講比叔叔知 唔係比人感覺都唔係咁好啦 同埋好在我同里奧大人係預咗陪叔叔成日啫 唔係叫人地去完大澳 自己番屋企先咩 始終難得一齊放假去玩 點都要安排一下嘛 所以我真係好感激里奧大人 佢次次都會同我一齊陪叔叔嬸嬸㗎 ~
同叔叔佢地行東薈城 好多 Outlet 但其實好多價錢都貴過加拿大 叔叔想買薄身風褸 但只 For 喺香港着 不過唔啱心水 咁再睇羽絨 姑姐話唔會買 因為驚唔夠暖 相反我哋香港就唔需要咁暖嘅羽絨 所以厚嘢要番加拿大買了 哈哈 ~
估唔到姑姐同嬸嬸最期待係行超市 呢間 Taste 真係好大 不過佢地睇完啲價錢 就覺得真係貴 同埋唔新鮮 所以我成日話香港生活唔易 不過咁 我仍然都好愛香港 話哂係成長嘅地方嘛 ~
行到 6 點幾就去食飯 里奧大人去攞位先 我哋等埋姑姐 我話唔識去嘛 所以由叔叔帶路 呵呵 ~
其實大家唔太餓 但我覺得點都要同佢地食啲嘢 坐低傾下偈咁囉 ~
8 點幾走人 一齊坐地鐵番屋企 我哋地轉 2 程 叔叔轉 4 程 ~
番到屋企都 9 點半喇 沖埋涼就休息 今日都幾攰 哈哈 ~
睇多陣電視 11 點幾都瞓覺咯 ~
沒有留言:
發佈留言