台北 美好回憶記錄 ( NOV 2017 )

台北 美好回憶記錄 ( NOV 2017 )

今次真係非常之爆喇   成日話唔會去台北   但呢排成日睇 Vlog   所以又想去番台北喇 ~~~~

第 1 次去台北係 2008 年   覺得好正   第 2 次去係 2011 年   覺得有 d 悶   因為當時個人唔係咁舒服   同埋成日落雨   無咩 mood   之後都唔想再去台北 lu ~

今次快閃台北   我唔會刻意 plan 行程   只係話最主要想去多次九份同淡水   其餘時間周圍行周圍食咁啦   最緊要 hea   因為我又好忙   無咩時間認真睇 ~

星期五夜晚決定去台北   之後去買天書   星期六就決定去喇   星期一番菇場請假   夜晚就訂機票同酒店了 ~~~~

本來仲激 d 架   諗住隔兩星期就出發   不過原來機票酒店係貴好多囉   所以再遲一個星期先出發   價錢就合理喇 ~

又係得最後一間房   係咪咁啱呀   清邁又係咁喎 ~

Book 好哂最緊要嘅嘢   我又睇下行程   買衫就應該唔會架喇   好似無咩買嘢癮   真係唔想太花時間精神睇衫買衫   因為我真係好想抖抖囉 ~

( 正文社出版嘅旅遊書都唔錯 )



天氣方面 : 頭兩日落雨   第三至第四日都好好天   所以勁熱   最後一日就天陰陰   感恩我地坐緊巴士去機場嘅時候先落雨呢 ~

好天就好熱



間唔中都係咁嘅天氣   台北真係一年四季都落雨咁嘅 



住宿方面 : 今次住 Hotel Relax 5   原來仲有 Relax 1, Relax 2 同 Relax 3   但職員話 Relax 5 係最新嘅   開咗 1 年幾   其他幾間就唔記得開咗幾耐   只知道間房比 Relax 5 係大 d 咋 ~

呢間酒店隔音就麻麻   好在我地唔係喺大馬路附近咋   但我兩晚都聽到 bibu 車響   但 bi bu 車就一定要夠響啦   哈哈 ~



間房好乾淨   所以細細間房都無緊要呢



交通方面 : 今次主要坐捷運   所以買咗張優悠卡   按金 NT$100   但兩年之內去台灣就可以再用   每次最少入 NT$100   我覺得好 OK 呀   因為好怕袋袋埋埋好多散銀呢 ~
   
食物方面 : 主要係去夜市   同埋食小籠包   本來我諗住同里奧大人去食烤肉放題   但上網睇資料   話環境嘈同埋好迫   所以唔去 lu ~

今次最開心係狂食炸臭豆腐   食咗 4 晚呀   真係好鬼正囉   其實驚胃痛架   感恩全程好 ok   只係感覺熱氣咗 d   我好少喉嚨痛 (touch wood)   定係我體內太多寒氣呢 ?!    哈哈 ~

鼎泰豐真係無得輸   皮薄多肉汁   服務係 102 分添呀   所以真係值得每次去台北都要幫襯佢呢 ~



炸豆腐真係百吃不厭   外脆內嫩



呢杯黑糖珍珠奶茶   真係好好飲



總括來講   今次我去台北   係極度開心同滿足   可能呢幾個月   我真係心同身都好攰   係時候要出去走走   想食就食   想抖就抖囉 ~

今次都係周圍行周圍食   我地兩個真係食咗好多嘢   飲咗好多嘢咁   但慶幸無肥到呢   因為其實食完嘢番酒店   起碼行 15 分鐘   即係來回其實都行咗 30 分鐘   算徑步啦   哈哈 ~

里奧大人成日問我飲唔飲多杯 ?!   珍珠奶茶喎   喺香港係唔比我飲咁多架   但黎到台北就幾乎每日問幾次   食芋圓又係   成日問食唔食多次 ?!   食炸豆腐直頭陪我食幾次   喺香港係無可能發生   哈哈   咁我之後番香港問佢   喺台灣係咁叫我飲埋 d 無益嘢   佢話比我每日飲 2 杯   5 日都係飲 10 杯   番到香港都唔會咁飲法   所以一定比我飲   不過喺香港都唔咁飲法啦   貴好多架   同埋珍珠係少好多呢   哈哈哈哈 ~

好後期我發現   我第一次去旅行係無話掛住香港呀   咁可能我日日同家姐 Whatsapp   感覺好似無離開香港咁   哈哈   同埋可能我真係好想出去走走抖下氣 ~

HK$5,842.29 
旅行保險 $410
TOTAL HK$6,252.29
旅樂序精品旅館 - 站前五館 (經典雙人房)

No. 20, Section 1, Chongqing S Rd., Taipei

25 NOV 17 (HKG TO TAIPEI) SAT - UO753 (14:35)
30 NOV 17 (TAIPEI TO HKG) THU - UO754 (17:30)