豬肉丸水餃韓國拉麵 + 紅蘿蔔粟米栗子豬骨湯 ( 8-MAR-2020 )

我好鍾意食湯渣   里奧大人就唔鍾意

話咁快就索哂啲湯

( 8-MAR-2020  SUN)

今朝瞓到 10 點自然醒   沖埋涼就去食早餐喇 ~

食完就買湯料番屋企   估唔到出哂汗呀   又要沖多次涼   我覺得今日好熱咁呀 ~

抖陣就執鞋柜   終於掉咗四對鞋   其實都覺得自己好多鞋   但又鍾意買   一見平就買   不過今年已經買咗四對鞋   所以呢幾年都唔駛買了 ~

執咗個幾鐘就搞掂   里奧大人差唔多 3 點番到嚟   咁一齊去食下午茶喇 ~

唔知點解今日情緒有啲低落   所以要飲杯凍奶茶   令自己開心番   飲完啲甜嘢確實開心番啲喎 ~

食完即番屋企喇   因為我要煲湯 ~

里奧大人沖埋涼   由 4 點瞓到 6 點   佢今朝好早起身嘛   頭先一見佢   佢都話一陣要瞓晏覺   哈哈 ~

我覺得好熱   原來里奧大人都覺   但我見佢仲着外套   以為佢覺得凍   佢話瞓醒一定要着番件外套嘛   佢好錫身㗎 ~

是日懶餐 - 豬肉丸水餃韓國拉麵 + 紅蘿蔔粟米栗子豬骨湯

豬肉丸水餃韓國拉麵 - 我將呢兩樣一齊放埋喺 Lock Lock 盒   但我解凍嘅時候   我完全無印象喺街市買過呢啲丸   諗咗好耐都諗唔住   煮完即咬係咩來   原來係 Ikea 買嘅豬肉丸 ~

紅蘿蔔粟米栗子豬骨湯 - 材料有西施骨 ($40) +  兩條紅蘿蔔 ($14.5) + 兩條粟米 ($16) + 一包真空栗子 ($14)   我孤寒咋   唔係呢煲湯可以過一百蚊   但估唔到四十蚊豬骨都好夠味   感恩感恩 ~

洗埋碗就沖涼   開埋機洗衫就休息 ~

今晚 11 點唔夠都自己瞓先喇   里奧大人就繼續追劇 ~