芝士肉醬焗扁意粉 ( 18-NOV-2013 )

又煮埋一大碟   又要食 3 餐 lu 

( 18-NOV-2013  MON )


嘩   星期一喇   嗌下精神 d   哈 ~


又天氣乾燥   快 d 冬天啦   可以一次過執埋 d 衫嘛   同埋又可以着新衫同新 boot   依家間唔中會落雨   唔鍾意第一日着就整烏糟呢 ~    


早餐又食芝腿治烘底啦   懶得諗 ~

菇場唔忙喇   阿 head 又放 3 個星期長假   實在太 free 喇 ~


家姐放假   所以晏晝同我去 CPK 食 lunch 呀   上星期已經 whatsapp 定個 set lunch 資料比佢   咁頭先佢坐車就同我一齊 whatsapp 想食咩   其實咁都好   快 d 嘛   因為想去埋一田買嘢   點知   今日個 set lunch 係唔同上次果個   搞咁多嘢都係得個桔   哈哈 ~

墨西哥粟米湯 - 好杰   同埋酸酸地   第 1 次飲呢 d 湯   哈

青豆薏米蓉湯 - 都係杰架   同埋都好多料   唔錯唔錯

夏威夷燒烤雞肉薄餅 - 雖然厚批   但都好脆   又煙煙韌韌   好味呀

秘製肉腸 + 甜椒長通粉 - 酸酸咪咪好開胃

咖啡 x 2 - 估唔到係即磨咖啡   有驚喜   我基本上係唔落糖   但家姐話落好味 d   其實我朝早飲咖啡都唔落糖嘅   

同家姐食嘢好開心架   因為佢咩都食   我意思係指   如果食唔哂   佢一定包底   唔會嘥嘢   如果里奧大人係咁就好咯 ~


話咁快已經 1 點 15 分喇   所以要走喇   家姐諗住比錢   點知佢電話響   咁其實我根本就諗住我請   我地頭嘛   佢之後話真係邪   唔拎銀包出黎就電話唔響   好似人地借尿循唔比錢咁喎   痴線 ~


今次我又衰咗啦   一早同家姐講話一田瘋狂大減價   所以家姐帶定冰袋同環保袋   嘩哈哈   頭先佢同事打黎傾計   家姐話一陣去一田掃貨   有咩要買   之後佢同事話一田係 21 號先開始瘋狂減價喎   嘩哈   佢應該一早打比家姐嘛   咁遲先講   呵呵   不過家姐都話佢阿妹睇嘢係咁上下   嘩哈哈哈 ~


無計啦   唔平唔會特登家嘛   之後同家姐睇 d 蔬菜片零食   上次睇一樽要 $6x   咁今次又睇下有無平   咁家姐一睇個樽嘅價錢就話 : 嘩   咁貴嘅   我話係咁貴架   佢話原來要 $199 架 ?!   我話咩呀   點會咁貴呀   睇真 d 真係 $199 喎   無可能   咁我拎另一樽啦   原來係 $40 咋   如果叫佢幫我買就死得啦   不過一田又會咁離譜嘅   $40 變 $199 @@


陪家姐去巴士站   一出到去就有巴士   感恩感恩 ~


食到好飽   好在唔眼瞓咋   又有 d 嘢做   所以都好快放工咁呢 ~


等到 5 點 50 分先有車   平時已經番到屋企有餘添喇   咁邪今晚又要去街市買餸   其實今日勁攰唔想煮架   不過里奧大人又多嘢做   唔會咁早番屋企   咁我即係大把時間   唔煮好似好衰咁 ~


買完餸就去許留山買龜苓膏劵 $248 ( 10 張 )   我好似由佢 $150 買到依家 $248   以前仲正呀   每套會有額外龜苓膏 coupon 同 cash coupon   依家只係額外多 2 張龜苓膏 coupon   丫   都好過無啦  哈 ~


買完再去埋麥當勞買 " 薑餅人暖意保溫杯 " 比家姐   其實上次買嘅時候都諗住買比佢   不過佢太多杯   驚佢唔用又嘥   咁今日講起薑餅人杯好得意   又有咖啡劵好似好抵   佢又話諗下先   又問九萬樣嘢   咁即係鍾意啦   如果唔係佢唔會答諗下先架   既然係咁   我當然會送比佢啦 ~       


$100 有隻杯 + 5 張細杯裝咖啡 coupon   其實真係抵   家姐話係買咖啡送杯   我話係買杯送咖啡  哈哈 

番到屋企就勁喇   無停過   預備好晚餐之後就燉肉汁   再開機洗衫同拖地   差唔多 8 點先開餐   咁啱里奧大人打黎話放工   不過我食先喇   唔想太夜食 ~   


用肉排燉嘅肉汁係甜 d   但真係油 d 咁囉   下次都係用瘦肉煲好 d ~

     
是日晚餐  - 芝士肉醬焗扁意粉


芝士肉醬焗扁意粉 - 好耐無整意粉喇   唔係樽芝士粉過期   我都唔整    我依家目標係清哂所有醬料 ~


里奧大人生痱滋   所以拎咗龜苓膏比佢   真係要提佢食架   唔係佢又會唔記得   食完之後又即刻食咗 2 條香蕉   我話佢痴線   龜苓膏係涼   香蕉又係涼   因住食屙   之後佢仲笑喎   當我流丫嘛   咁我之後好認真話 : 你知唔知龜苓膏同香蕉係唔可以一齊食架   佢個樣驚一驚   之後問我係邊個講   我話無人講   哈哈 ~ 


搞掂哂都 9 點幾   即沖涼按摩喇   唔夠瞓成日腰骨痛好慘 ~


里奧大人睇電視   我就話我要休息打陣機先   佢喺度笑   打機休息好特別 ~