別府 @ 九龍灣( 19-NOV-2013 )

炒野菜

吉列豬扒拉麵 ( 2 辣 ) - 辣呀   今次連家姐都話辣   但上次食 8 辣就一 d 都唔辣 @@

九洲拉麵

三文魚壽司

( 19-NOV-2013  TUE )


尋晚又比隔離單位嘅 bb 喊到我無覺好瞓   佢係出盡力咁喊架   真係勁想叫佢地關窗   不過實無可能啦   所以之後我都要開番冷氣   佢咁喊法真係人都顛 ~


依家都會搽遮暇膏   因為黑眼圈實在太勁   好在我唔係瘦   唔係 d 人以為我吸毒   哈 ~


超勁餓呀   所以食腿蛋治烘底 ~

菇場有嘢做   做完諗住抖   點知又有嘢做   咁又再諗住做完再抖啦   之後又有嘢做   係咪咁邪呀 ~


做到差唔多 lunch time   今日有肉醬意粉 lunch box   咁加咗 tabasco   同埋 d 芝士又溶哂落意粉度   勁好味呀   有芝士真係好味好多呀 ~


本來要去倉執箱   不過勁多嘢做   所以 partner 同其他同事去執   我就係咁繼續做做做呢 ~   


做到放工都未完   如果要做哂   咁起碼要 8 點先放得工   所以我會留番聽日做 ~


今晚睇中醫   咁家姐又睇   所以就去排隊先   估唔到差唔多 7 點先有得睇   之後里奧大人打黎話同我食   不過我應承咗家姐喺鰂魚涌食嘛   所以照陪番家姐啦 ~   


咁家姐又記錯咗自己黎睇過   所以明明到佢   佢都要去隔離登記 check 嘢先   咁到佢睇果時都已經 7 點半 lu   好在佢唔駛等執藥   唔係仲耐 ~


趕唔切搭巴士   咁就搭地鐵囉   所以又約番里奧大人一齊喺九龍灣食算喇 ~


搭緊地鐵嘅時候   家姐話我眼圈好黑呀   嚇啦   我已經搽咗遮暇膏架噃   我話咁黑係因為比隔離 bb 嘈到無覺好瞓囉 ~ 


地鐵車程好快   但行嘅路真係好多   上上落落   行路時間可能仲耐過車程   哈 ~


8 點 20 分終於去到別府   咁里奧大人已經攞咗位   因為我地勁餓   所以叫咗里奧大人幫我地 order 三文魚壽司   去到即刻有得食   呵呵 ~


呢兩日特別餓呀   家姐同里奧大人話天氣凍特別易餓   之後家姐無啦啦講冬天食臘腸真係可以食一碗飯   但夏天就真係唔想食臘腸   記得有次自己夏天煮臘腸潤腸飯   仲切粒   所以成碗飯都充滿油份   食到一半已經覺得好滯   有 d 驚呀 ~


家姐格言係食完鹹嘢要食甜嘢   所以又去麥當勞食新地喇   食完就各自歸家喇 ~

雖然番到屋企都 9 點半   不過我都照煲中藥   唔想偷懶 ~


11 點幾瞓喇   今晚堅持要開冷氣   唔係唔掂呀 ~