翡翠拉麵小籠包 @ 將軍澳 Popcorn ( 2-NOV-2013 )

上海小籠包 - 勁想食好耐啦   所以覺得好味呀

四川口水雞 - 都係勁想食呀   但好辣   woo  

宮保雞丁 - 里奧大人話等埋 3 姑奶先再叫其他   我話佢實叫宮保雞丁   果然不出我所料   呵呵   不過我只食咗 d 腰果    

錦鹵炸雲吞 - 里奧大人話我鍾意食香口嘢喎   所以特登叫比我喎   係咪架 

糖醋魚柳 - ok 啦   呢餐太多肉   所以我食咗一嚿仔咋   

叉子燒餅配榨菜肉末 - 我完全無食添呀   因為可能頭先太口渴   飲咗 3 杯茶 2 杯水   飽鬼哂   哈

榨菜肉末都好多   又抵食喎   不過當然食唔哂啦   佢地已經塞咗好多喺叉子入面   但都剩番半碟   所以我就打包拎番屋企喇 

( 2-NOV-2013  SAT )

今朝 8 點起身   meme 犘犘又滾埋中藥   差唔多 8 點 35 分出門口   不過唔理 lu   今日大粒全部唔番   遲小小都無咩問題 ~

早餐食芝腿治   其實我鍾意星期六食麵餐架   感覺唔同平時咁嘛   但飲完杯中藥真係食唔落個麵   但假期就可以   因為瞓得夠嘛 ~

番到菇場諗住當去網吧咁勁上網啦   點知居然超多急嘢做   嗚   做到 12 點半呀   忙到連外套都唔記得着   凍鬼到呢   不過有嘢做又好似過番正常生活咁   可能呢幾日成日狂上網   有 d 驚咁呢   哈哈 ~

放工即走喇   因為里奧大人同大姑奶飲茶   不過佢地 12 點已經飲緊   里奧大人話大姑奶想見一見我喎   咁我去到剔點心   想食嘅嘢同佢地食咗嘅嘢一樣   無理由重覆食家嘛   咁酒樓又勁凍   咁我話唔食喇   同埋最緊要係未餓嘛   所以最後都埋單走人 ~

之後叫里奧大人陪我去拎麵包機   又唔係好重咋噃   同 Panasonic 差好遠   Pan 果部成 8 kg   真係真材實料   不過算啦   我部都唔弱架   JNC   哈哈   我可能玩幾次唔玩家嘛   所以唔會買貴嘢囉 ~

里奧大人想去北角買 cream   咁就去啦   坐 619 都好方便   唉   坐坐下聞到 d 盅頭飯味   有 d 想嘔   我超勁怕 d 人喺車度食 d 咁大陣味嘅嘢   陣味困喺車廂係好臭架   有 d 人食魚肉燒賣同麥記   d 味仲勁   點知食飯果個人原來喺坐我前面   佢最勁係飲埋例湯   其實飲湯仲危險啦   架車一 chok   成碗湯就倒落塊臉到家嘛   之後落車問里奧大人問唔問到有人食飯   佢話就係聞到陣味所以醒咗 ~

好   去到新都城百貨就即入貨喇   買到可以做會員   最勁係做埋新都城百貨會員   我完全無諗個會喺呢 d 舊式百貨公司買到嘢呢 ~

Day Cream & Night Cream ( $258/pk ) - 防敏感 + 防縐   勁啱我
Face Lotion ( $78/支 ) - 買咗 3 支   里奧大人搽架咋   佢之前搽咗幾次   話縐紋好似小咗咁呀      
Hand Lotion ( $68/支) - 買 1 支先   因為佢話 Body Lotion 都可以搽手   1 大支抵用喎
Lanolin Cream ( $68/罌 ) - 我覺得呢隻超好用   潤得黎又唔立痴痴   一年四季都啱用
Body Lotion ( $68/支 特價 ) - 原價 $98   今日特價 $68   所以買支黎試下 

之後再去買線衫外套   又做特價   $199/2件咋   超抵   質地又好   之後里奧大人話要食嘢   驚我餓喎   其實佢自己餓   因為已經 3 點幾呢   佢話我買嘢真係買到唔知餓   呵呵 ~

又食到越南嘢喇   仲要有下午茶餐   同埋份量唔細喎   有驚喜 ~

春卷 - 都 ok 架

香茅牛肉撈濛 - 餐轉 $3   不過我實在太想食 d 醋   所以一定轉呢   但唔夠凍  唔係仲好食

香茅牛肉湯河 - 里奧大人話 d 牛肉口感好怪   話好似落鬆肉粉咁   講講下又好似係   嚇到我之後唔想食呀

凍珍珠奶茶 - 加 $8   珍珠都好煙韌   不過呢間嘢超勁小家   我話要小冰   一擺上枱都嚇一嚇   駛唔駛連茶都小埋呀   其實之前有間都係要小冰又係茶都小埋   以前點會咁架   果小小茶值妳幾多錢呀 ?!   好在我無唔舒服咋   如果咁啱里奧大人行開咗   番到黎見到杯嘢小咗   一定以為我偷飲添呀    

食飽有氣有力     同里奧大人去咗附近行下   成條街感覺好似去咗深水埗唔知咩街咁   不過無嘢啱買 ~

一場黎到   又行埋華豐百貨   其實我好鍾意行呢 d 舊百貨公司架   因為 d 嘢真係好懷舊下   同埋 d 傢俱超級靚   不過閒閒地都 1 萬幾千呢 ~

又買到筍嘢喇   就係買咗 2 件衫比媽咪   又抵喎   原價 $268   之後半價   之後仲搞笑   因為有個婆婆又買 2 件嘛   所以個 sales 話如果買 2 件   就 $90 一件   真係超抵   質料又舒服 ~

我買衫嘅時候   里奧大人自己都買咗褲仔   因為係公價   所以邊到買都一樣   買完再去番新都城百貨   估唔到喺 Milan 買到對 boots   半價 $399   里奧大人買到對鞋   半價 $388   實在太開心喇   咩都半價 ~

真係走喇   經過美味棧   我就買咗 3 pack 榨菜同菜甫 ( $28/3 pack ) 同 3 罐午餐肉 ( $29/3 pack )   里奧大人話每停低一個地方都買到嘢   呵呵   咁特價咪買囉   同埋上次試過佢嘅榨菜都好味   我好驚喺南貨舖一大嚿果 d 榨菜   又唔冚實   有烏蠅飛黎飛去   好烏糟咁呢 ~

搭地鐵去將軍澳   因為今晚同 3 姑奶去 Popcorn 翡翠小籠包拉麵食嘢   完全估唔到啦   仲諗住海港添   真係好驚喜呀   哈 ~

6 點去到   食到 8 點   之後上姑奶屋企坐陣   佢比雪糕機我地   又比咗成疊惠康同聖安娜 coupon 比我   真係發達喇   不過佢就黎搬屋   佢唔比我   好過佢唔見咗   咁佢要就問番我拎黎用仲好 ~

傾傾下計   feel 到有 d 嘢郁   原來係叻叻   嚇死人咩 @.@

我覺得呢張影到佢對眼好靚 ^^

 串到呢   影咗十幾張啫   駛唔駛啤我呀   哈

之後仲擰埋臉添呀   衰

搭地鐵番屋企   番到屋企又煲中藥喇   之後沖涼休息   里奧大人又睇劇   我就上 youtube 聽歌   今晚聽蔡依琳嘅布拉格廣場   好聽到爆   聽咗起碼 50 次   哈   今晚又成點先瞓 ~