蒜蓉豆豉蒸排骨 + 臘腸鵝肝腸 + 菜心苗 ( 6-NOV-2013 )

( 6-NOV-2013 )


今朝沖涼   個熱水爐壞咗呀   一開爐係 37 度   之後唔夠 2 秒就變咗 14   即係凍水   好在佢有次喺 37 度維持咗  10 秒左右   咁即刻沖頭同沖身   不過最後都要用凍水沖多次   woo ~


早餐食奶油多   不過佢比咗奶醬多   尋晚同家姐先講完花生醬   邪 ~

打去煤氣公司叫人黎維修   最快可以聽朝 9 點   不過唔想請假   所以改夜晚 6 點   咁我放工番屋企都趕得切嘛   之後同佢講番咩 case 啦   佢話 14 係一個 code   我仲以為 14 度添   哈 ~


菇場忙到 10 點半就搞掂哂喇   可以 hea 過 ~


晏晝同 8 卦出去譚仔食米線   今次我一樣叫小辣   但食咗幾啖   下唇有 d 麻痺呀   又會咁勁嘅   我第一次喺譚仔食到咁樣架   因為佢地間間 d 辣度都唔一致嘅   8 卦就食清湯米線   我話多數人去譚仔都食麻辣   食清湯真係好小見囉 ~

我好飽呀   所以叫佢自己番菇場先   我去一田行陣   又比我買到筍嘢   呵呵 ~

放工去買餸   之後番到屋企即煲中藥   醃排骨同浸菜   之後再煲雪梨蘋果茶   今次衰咗呀   因為煲出黎係好小   我記錯落水份量   煲埋出黎得 2 支仔   真係嘥 gas 咯 ~  


今晚知道得一個爐煮食   所以就咁淥菜   排骨就放落電飯煲度蒸   d 時間真係好用好多架   唔駛理佢嘛 ~


7 點半啱啱開始淥菜   原來里奧大人已經喺九龍塘   又係問我食咩   我仍然會答佢係好嘢   係佢好鍾意食嘅嘢   之後我話等埋佢先食啦咁   佢話唔好啦   d 麵會林哂   我話我都無話煮麵   佢話因為我答佢好鍾意食嘅嘢   以為係麵喎   痴線 ~  


今晚 8 點幾先食   不過算啦   因為我啱啱先開始覺得餓嘛   同埋一齊食係開心 d 嘅 ~ 


是日懶餐 - 蒜蓉豆豉蒸排骨 + 臘腸鵝肝腸 + 菜心苗 


蒜蓉豆豉蒸排骨 - 懶餐首選   不過今次整得好好食   因為 d 排骨好林   唔通因為唔要骨 ?!   因為豬肉榮問我要骨定唔要骨   我話唔要骨   因為抵 d 嘛   有骨會重 d   哈哈   最搞笑係里奧大人問我係咪我整   我話係呀   佢話好味喎   其實睇得出佢個樣覺得以為係出面買   我好小整排骨咁林嘛   之後佢同我講話唔夠辣   我 R 哂頭   我話不嬲整蒜蓉豆豉都唔辣架啦   佢居然同我講話以為係五香肉丁   我暈喇   之後佢叫我整五香肉丁   大佬   我識鬼咩 ~      


臘腸鵝肝腸 - 鵝肝腸又係喺金飯碗買嘅   因為好抵   口感又鬆化   第時買臘腸潤腸呢 d 真係會幫襯佢   唔係因為係 frd   而係口感真係同榮華果 d 差好遠   榮華仲要唔平添喎 ~  


菜心苗 - $9/斤   好甜呀   我仲將蒸排骨 d 肉汁林喺面   雖然好肥   但好好味呀   哈 ~


搞掂哂都 9 點半喇   今晚沖涼就煩 d 嘢   要倒 d 熱水落個盤度先可以沖涼   唉丫   希望聽晚檢查完之後可以用得番啦 ~


今晚都幾攰   所以自己 11 點瞓先喇   難得有睡意   唔係過咗就瞓唔到架喇 ~