豐璟雞煲燒烤吧 + 227 甜棧 @ 太子 ( 8-NOV-2013 )

麻辣雞煲 ( 小辣 ) - 唔辣架噃   mimi 話下次可以叫大辣

見到 d 雞肉咁深色就勁開心   因為好似好好味咁

滾起喇   流哂口水

配料最正   但成日食到 d 籽   細細粒好硬

蒜蓉蒸扇貝 ( 送 )

炸魚片頭 - 無咩嘅

炸魚皮 - 好碎呀   好在 mimi 都覺得   呢碟 mimi 唔吼   所以差唔多我食哂   用手拎黎當薯片食   呵呵   

金菇 - 索哂 d 汁就最正啦 

燒原條茄子 - 好香孜然粉味呀   不過凍咗之後食呢   就超級油 @@

打邊爐孖寶 - 就係見到呢兩碟   所以勁想打邊爐啦

藍妹啤酒 - mimi 至愛   一見啤酒上枱   佢就笑哂口啦   嘩哈   我地叫咗 2 枝大嘅   我最勁只可以飲 1 杯   仲要係慢慢嘆   所以基本上我 feel 唔到點解 d 人成日話飲啤酒有涼快嘅感覺   嘩哈哈

我嘅仙草涼粉 ( 手工芋圓地瓜圓 + 黑糖寒天凍 + 養生黑糖水 ) @ 227 甜棧 - 如果要讀出黎   真係講完都無氣   哈

芋圓地瓜圓同寒天嘅份量都好小   

mimi 嘅仙草涼粉 ( 杞子龍眼肉 + 珍珠 + 薑汁黑糖水 ) @ 227 甜棧 - 我掛住講嘢同影相嘛   之後想 "北" 粒珍珠試下   佢話比咗我啦   拎多一粒啫   咁唔捨得   嘩哈哈哈哈

有杞子龍眼   mimi 話覺得好滋陰養顏

黃色係沙冰   估唔到黑糖沙冰係黃色   mimi 話我知係沙冰   我先知咋   我覺得外型好似海膽 ^^

花多眼亂

古色古香   我發覺依家好多食店都係咁呢 

( 8-NOV-2013  FRI )


終於 happy friday 喇   尋日同 cc skype   傾傾下我以為係星期五   家姐又以為星期五   可能因為多數日星期五先同媽咪食飯呢   嘻嘻 ~


今朝叫完件芝腿治烘底就打機   有個男人問我對面個位有無人   我望一望佢之後就答無人   原來係 8 卦   佢 whatsapp 問我喺邊   我都唔知呀   因為聽緊歌   好日唔聽   一聽佢就 whatsapp 我 ~

好忙呀   忙到 lunch time   本來諗住食牛腩米   點知又休息   所以即轉食酸辣米線   其實一早已經想食   不過驚太飽   點知最後都係酸辣米線呢 ~


其實係小辣之嘛   個個同事一望到碗米線就會嘩一聲   以為好辣 @@

好啦   忙到 4 點   寫咗篇 blog 又再忙過呀   充實到呢 ~


忙到放工   其實仲未做完   不過唔理喇   又唔係急   留番星期一先做 lu ~


今晚約咗 mimi 去太子食飯   所以搭地鐵   差唔多 6 點 15 分就到喇   佢又去恆生攞錢   次次都係咁嘅   唔通驚我大食唔夠錢找數   哈 ~


之前約好食飯架喇   我話想食辣雞煲呀   因為未試過嘛   好似好大鄉里咁 ~


咁我就話想去太子區   因為中間點   又無尖沙咀同旺角咁多人   咁 mimi 就搵食店喇   雖然佢 whatsapp 咗食店資料比我   但我完全唔記得睇添呀   所以佢帶我去邊就去邊架喇 ~


Book 左 6 點半   去到無人架   幾咁好呀   之後開始多人啦   有班男仔坐喺隔離枱   嘈到呢   好在後尾無咁嘈咋 ~


點咗雞煲之後   一路食一路傾啦當然   差唔多食到一半就再叫火鍋料   因為我未試過嘛   哈 ~


今晚傾得好開心呀   咩話題都傾一餐   今次 mimi 講好多嘢添呀   唔比我插咀 (講笑)   我就一路聽一路食   幾鬼正呀 ~


傾呀傾   講開中醫   mimi 話我臉色好咗呀   我話其實係搽咗唇膏   咁唔駛臉青青咁   不過 mimi 話唔係   臉頰係紅咗   之前見我唔係咁喎   實在太好啦   真係要 keep 住睇呢個中醫   因為我真係好耐無比人話我臉色好喇   哈哈 ~ 


我今晚勁呀   飲 1 杯啤酒   杯啤酒由頭飲到尾   不過一睇 mimi 應該唔夠喉   飲得唔多暢快   佢最後都按捺不住叫多枝   不過我真係唔飲得架   佢最後留番小小比我   1cm 左右到啦   話驚我口渴   其實真係有 d 口渴   不過我唔想飲王老吉同汽水   之後我飲咗 0.5cm 到啦   剩咗果 d 比番佢   一飲果下   d 啤酒係凍嘅   超舒服呀   佢都飲得好快喎   成枝差唔多飲完都仲係凍 ~


差唔多 9 點   老闆都問我地叫唔叫嘢食   我地唔叫喇   其實佢都好好架喇   因為限時 2 個鐘架咋   呢餐都抵食   $280   因為我都好飽   但 mimi 可能唔飽   因為佢好似食好小   可能知我想食   哈 ~


講好話食甜品   所以又由 mimi 帶路喇   佢睇住個 map 搵路   同我講話係呢度呢度   我都未睇得切   已經到咗目的地   如果靠我就慘喇 ~


又食喇   呢排食太多刺激嘢   塊臉爆哂瘡   所以我都唔理暈唔暈   食涼粉呀   我好小食呢 d 涼嘢架  ~


又傾喇   食到半路想爆肚   真係覺得超勁飽   同埋開始又凍喎   仲諗住坐門口無咁凍添 ~


之後阿喂打比 mimi   原來已經差唔多 11 點喇   我以為 10 點咋   mimi 太多嘢講啦   嘩哈哈哈 ~


好喇   一齊行去地鐵站   好在佢都搭地鐵   唔係我都唔知自己喺邊   夜媽媽好難認路家嘛   我覺得 ~


大家路線唔同   搭住電梯 say goodbye 啦   之後我等車嘅時候   feel 到成陣雞煲味   我仲以為自己形住   無耐 mimi 問我係咪成身雞煲味   原來佢都有    我估唔到食雞煲都咁大陣味添 ~


番到屋企要 whatsapp 比 mimi 報平安   里奧大人仲以為我地仲傾唔夠   哈   咁我執 d 文件嘅時候   佢無啦啦搓我個肚腩   話妳睇下妳肚腩幾大   嘩哈哈   係呀   我個肚真係想爆咁架   唔知係咪飲咗啤酒有啤酒肚呢   哈哈 ~


沖埋涼   又睇下電視   因為太飽   真係唔敢即瞓   所以差唔多 1 點先瞓呀 ~