蕃茄辣肉腸扁意粉 + 墨魚丸印尼撈麵 ( 7-JAN-2014 )

( 7-JAN-2014  TUE )

今朝幫菇場買嘢先食早餐   因為間超市嘅嘢唔齊   咁我再另一間超市買   攰鬼到我呢   之後去到餐廳   飲中藥果陣   感覺好似飲寶礦力咁飲呀   一口氣飲哂呀   完全都唔記果支係苦嘅中藥   因為我實在又餓又熱呢 ~

番到菇場又忙咗陣   好攰呀 ~

Lunch 去幫家姐睇金象米幾錢   所以順便去食韭菜餃上海麵   之後再周圍行下先番菇場呢 ~

菇場好凍呀   但我着咗厚身衫   所以唔想着件外套   點知 4 點幾打咗幾個乞痴   之後鼻塞呀   勁驚感冒呀 ~

好在今晚唔駛買餸咋   不過就去咗聖安娜買 3 支蠔油   抵嘛   $20/支咋 ~

番到屋企即飲 Hot Lemon   之後開機洗衫   再燉埋肉汁就抖下先喇 ~ 

諗住早 d 煮早 d 食   由 6 點 45 分開始煮   到 8 點先有得食呀   慘 ~

是日晚餐 - 蕃茄辣肉腸扁意粉 + 墨魚丸印尼撈麵  

蕃茄辣肉腸扁意粉 - d 車厘茄係尋晚喺鰂魚涌買架   $18/2 磅   其實唔係抵   只不過等家姐去買包   我無嘢做先買囉   今晚又係邪呀   因為家姐又整 Johnsonville 芝士腸   不過唔會再邪架喇   因為我已經清哂呢   呵呵 ~

墨魚丸印尼撈麵 - 因為我覺得自己作感冒   所以想食生蒜   但又無買到丸喎   所以就食撈麵囉   可以撈埋生蒜一齊食嘛 ~

里奧大人 8 點先放工   叫佢幫我喺聖安娜買多 4 支蠔油先番屋企   佢話最後 4 支比佢買哂呀   開心開心 ~

佢一入屋就問我係咪唔舒服   因為我無話佢知我作感冒嘛   我問佢點解知   佢話見到盒 Hot Lemon 喎   之後又叫我早 d 瞓   煩   8 點幾點瞓呀 ~

奇異果好似買咗 2 個星期   諗住 shake 家嘛   不過又無動力去 shake   咁問家姐幾次要唔要   佢又唔要喎   咁要食啦   咁啱我又需要大量維他命 C   唔食唔得啦

洗埋碗就沖涼   之後食生果   睇下電視   11 點就瞓喇 ~