韓汁焗金沙骨 + 瑤柱燜節瓜 ( 14-JAN-2014 ) + ( 15 & 16 & 17-JAN-2014 )

( 14-JAN-2014  TUE ) 

尋晚開電毯瞓   不過瞓瞓下覺得好熱   所以瞓得唔係咁好   里奧大人話簡直有個火爐喺佢隔離添呀   可能我地無開窗   所以咁鬼熱   哈哈   因為第一次用電毯係好舒服家嘛   完全唔會有熱嘅感覺   但當時係有開窗囉   呵呵 ~

今朝食芝腿治烘底   好耐無食   覺得都幾好味咁呢 ~

菇場唔忙   好在又精神喎 ~

今日有 lunch box   其實次次叮完 d 菜都唔想食   因為好林   最鬼驚   但無菜又唔慣喎 ~

放工幫媽咪去價真棧買保鮮紙   再幫家姐去阿信屋企花生醬   鬼咁重   所以即番屋企喇 ~

番到屋企就開機洗衫再預備晚餐喇   6 點半里奧大人打黎話走得   所以今晚想去打邊爐   不過我話唔好喇   又醃咗嘢   咁早 d 番黎食仲好啦   同埋我覺得太耐無煮飯   真係唔係咁想成日出去食囉 ~

好啦下   以為 7 點半可以一齊食   咁見佢又無再打比我   我就打比佢啦   點知佢話個煩客打黎傾咗好耐   之後 d 同事又捉住佢唔放   所以仲未走得   嘩   好在真係無出去食咋   唔係有排等   不過喺屋企都唔等佢一齊食喇   我要食先呀   餓呢 ~ 

是日晚餐 - 韓汁焗金沙骨 + 瑤柱燜節瓜 

韓汁焗金沙骨 - 用韓國醬料醃一晚   不過都唔係咁夠味   同埋無咩心機焗   所以燶燶地   哈 ~

瑤柱燜節瓜 - $12/斤節瓜其實都算貴   但勁想食   所以先買囉   買咗 3 個 $18   真係食瓜菜仲貴過食肉呀 ~

里奧大人 8 點幾先番到黎   煮埋個丁麵比佢食   之後就抖   等佢食完   我就先洗碗啦   差唔多洗哂嘅時候先記得飯壺有節瓜呀   所以叫里奧大人拿拿聲食埋佢呢   佢話食麵嘅時候覺得好奇怪喎   點解我 lunch box 有節瓜   佢又無得食   因為好小只得肉無菜   咁我咪話佢囉   早 d 講嘛   又要我等你食埋先再洗   嘥我 d 時間   佢話我惡人先告狀喎   呵呵 ~

沖完涼就熨衫   之後就休息喇   今晚 11 點瞓喇   但又好想開住電毯瞓   不過里奧大人叫我瞓上床之後就熄電毯   咁之前已經開咗半個鐘嘅   所以瞓上去嘅時候   成張被都已經暖哂   試下咁樣好唔好先   因為半夜熱醒真係幾慘呢   哈哈 ~    

( 15-JAN-2014  WED ) 

都唔係好凍咋噃   可能一起身就沖熱水涼   又吹頭   成身滾熱辣呀   哈 ~

里奧大人 10 點要見客   所以陪我去食早餐 ~

菇場忙呀   攰到呢 ~

晏晝有 lunch box   但太多飯喇   食完好滯 ~

忙忙忙呀   個肚又谷住谷住   原來每月一到   唔怪得突然間咁攰啦 ~

放工睇醫生   買幾個蛋糕同利賓納就番屋企喇 ~

差唔多 8 點就餓   里奧大人又無打黎話放工   咁我食杯麵啦   最緊要快嘛   點知正想放啖麵入口嘅時候   佢居然打黎話放工   唉   佢早 5 分鐘打黎就好啦 ~

佢買咗唐記番屋企食   之後同佢傾下計   10 點就瞓喇 ~       

( 16-JAN-2014  THU ) 

瞓到 9 點就打番菇場請病假喇   了咗心事就好好瞓呢 ~

瞓到差唔多 7 點   不過無胃口食嘢  ~ 

咁里奧大人買咗車仔麵番黎食   其實勁想食   不過佢落咗辣汁就咪搞我喇 ~

抖到 10 點就食藥再瞓 lu ~      

( 17-JAN-2014  FRI )

尋晚瞓嘅時候無肚痛   所以瞓得好舒服   點知半夜先黎痛痛地   搞到我都瞓得唔好添 ~

瞓到 8 點幾都痛   所以都係請病假休息喇 ~

沖個熱水涼再瞓   瞓下醒下   之後都係食埋藥止暈止嘔藥   因為想熟睡呀   嘻嘻 ~

瞓到 6 點幾就餓醒   咁里奧大人上咗大陸   我都無可能等佢番黎買嘢食   又食杯麵喇   開始有 d 驚 ~

今晚都唔番媽咪屋企食飯喇   不過媽咪蒸咗 2 樽瑤柱比我   咁家姐就拎比我囉   8 點幾黎到   佢又開包朱古力食   次次一黎我屋企就會第一時間開零食柜搵嘢食   哈哈 ~

佢坐到 9 點幾就走喇   里奧大人都差唔多番到屋企   但我勁餓   咁叫佢幫我買個豬柳蛋漢堡比我食   佢番到屋企嘅時候   佢話家姐話管理員話佢知里奧大人幫老婆買嘢食   所以家姐去麥記搵佢喎   佢自己買杯冰雪新地   又請埋家姐食雪糕就走 lu ~

聽日要番工   11 點就瞓喇   其實唔太眼瞓 ~