雜丸鍋 + 叉燒炒麵 + 唐生菜 ( 8-JAN-2014 )

( 8-JAN-2014  WED )

里奧大人今朝 9 點去灣仔見客   所以教咗 6 點 45 分起身   諗住食早餐   點知佢又話唔食喎   繼續瞓   瞓到 7 點   之後鬧鐘又響   另一個又響   佢終於要起身啦   咁好喇   到我 7 點半起身   佢又教埋電話鬧鐘又響    痴線咩   45 分鐘響咗 5 次鬧鐘真係人都顛   好在瞓得都 ok   唔係一定鬧爆佢 ~

都唔係好凍啫    不過就勁有回南 feel 囉   但點都要着厚褸   因為作感冒呀   我唔會比佢出黎   哈哈 ~

早餐又食沙爹牛肉餐包   仍然覺得好味   不過咁食法會好快厭呢   嘿嘿 ~

菇場唔忙   我都唔想忙   個人暈暈地咁 ~

今日有 lunch box   叮完之後幾鬼香呀   今日再飲埋燉肉汁   所以非常之飽喇 ~

食到咁飽都無眼瞓喎   但食飯太飽就真係會眼瞓囉   定係肉汁真係有提神補氣作用呢   哈哈 ~

無啦啦望下出面    完全係濛哂呀   我仲以為落緊雨添   突然間好想見到藍天白雲呀 ~   

放工即走啦   要去街市買餸   番到屋企覺得熱添呀 ~

開機洗衫之後就抖陣   之後預備晚餐   又係 8 點自己食先 ~

是日懶餐 - 雜丸鍋 + 叉燒炒麵 + 唐生菜 

雜丸鍋 - 我要食生蒜   又想有打邊爐 feel   所以就淥 d 丸喇   不過太多喇   食完好鬼滯   唉   頭先番到屋企好餓嘛   所以咩都加多 2 粒   覺得自己實食得哂   點知原來咁鬼滯 ~  

叉燒炒麵 - $8/2 個炒麵餅   煮埋出黎又係成座山咁   好驚啦   因為我又要食 2 日 lunch box 呀   最慘炒炒下又無哂老抽   我鍾意深色嘅炒麵嘛   今晚去太興買叉燒   師傅切咗 $28   佢之後再切細嚿 d   切出黎係 $22   之後好有禮貌問我好唔好   我話好   因為我心目中切到 $25 都 ok   咁先係家嘛   諗番起上次個師傅真係衰格 ~     

唐生菜 - 見到菜檔 $5 斤唔買住啦   因為想行入街市睇下仲有咩嘢菜   點知見到有個菜檔   一份唐生菜 ( 3 個 ) 只係 $4/份   所以真係要買喇   實在太平喇   仲要係靚架喎 ~

里奧大人 9 點先放工   等佢食完又要幫佢洗   好在唔眼瞓咋 ~

丫   鼻塞塞都係早 d 瞓   所以 11 點就瞓喇 ~