蒜蓉豆豉蒸排骨 + 瑤柱燜節瓜 + 芫茜皮蛋魚片湯 ( 27-JAN-2014 )

( 27-JAN-2014  MON )

星期一喇   雖然有 d 眼瞓   但一諗起今個星期番 4 日工就勁開心喇 ~

今朝唔駛飲中藥   所以唔餓都要食米粉餐   哈 ~

菇場勁忙呀   因為要做番星期六嘅嘢   做做下嘢   無啦啦要同 Partner 入阿 head 房   勁驚呀   原來係 Partner 唔做   咁我要接手啦   不過都會請人   但唔知幾時有人番工呢   如果有排都無人黎做   我有排都請唔到假去旅行   慘 ~

做到 lunch time 都未完   所以我要出去抖抖   食完再行陣   今年諗唔到買咩比媽咪做新年禮物   因為佢好多嘢唔食得   咁我就買衫比佢啦   買呀買   又比我買到 6 件衫   真係 " 三三不盡   六六無窮 " 喇    嘩哈哈 ~

繼續忙忙忙   真係忙咗成日   放工都未做完添呀   不過就唔趕嘅   可以留番聽日做呢 ~

放工去街市買餸   買完即番屋企預備喇   因為又要燉肉汁   又要開機洗衫好鬼多嘢做呀 ~     

今晚 8 點先食呀   咁里奧大人打黎話放工   不過我都係自己食先喇   等佢番黎就一齊飲湯呢 ~     
是日晚餐 - 蒜蓉豆豉蒸排骨 + 瑤柱燜節瓜 + 芫茜皮蛋魚片湯  

蒜蓉豆豉蒸排骨 - 諗住買 $15 飛排   但切咗 $18   咁都要嘅   因為我諗住買 $20 嘅   哈哈 ~     

瑤柱燜節瓜 - $12/ 斤節瓜   買咗 3 個節瓜   要 $21 呀   貴過食肉   不過想清咗樽瑤柱先買黎食咋 ~  

芫茜皮蛋魚片湯 - $5/2 扎芫茜   咁買 $5 啦   之後佢塞多扎比我呀   所以覺得勁抵呀   哈   咁我買 $15 大魚肉   佢又切咗 $18   咁我都要架   因為我又係想買 $20   哈哈 ~   

搞掂哂就沖涼   今晚 10 點先燉好肉汁   又要灘凍先入盒   想早 d 瞓都唔得添 ~

以為 11 點瞓   點知原來已經係 11 點半   喺屋企 d 時間真係過得勁快呢 ~