Green Monday 榨菜木耳炒肉碎 + 菜心苗 ( 20-JAN-2014 )

( 20-JAN-2014  MON )

之前里奧大人喺我臨瞓前個幾鐘就開定張電毯   之後到我瞓就熄咗佢   咁我瞓入去嘅時候就暖笠笠   之後都唔會凍架   好鬼正 ~

不過佢尋晚校咗 3 度   所以我瞓入去嘅時候係覺得熱   因為佢平時開 1 度之嘛   就係咁   所以瞓得唔係咁好   哈哈 ~   

Green Monday 啦要  好耐無 green 喇 ~

早餐食芝蛋治烘底   飽到上喉嚨添 ~

菇場忙呀   所以雖然係星期一   但 d 時間都唔難過呢 ~

Lunch 出去食白粥 + 炸兩   又係好耐無食   好鍾意食熱辣辣嘅白粥   食完個身同個肚即刻暖哂   好舒服架   但同枱個男人超勁煩   因為佢碗生滾粥等咗好耐   之後又比錯   佢又要等   又話今次特登比多次機會呢間粥舖   依樣果樣咁咁咁   好喇   碗粥黎到又話無味   咁更係啦   咁嘅心情會食到好味咩   煩   我食咁耐佢哦咁耐   煩鬼到暈 ~

食完行陣   買埋菜心苗添呀   咁今晚唔駛去街市買菜   里奧大人話我係咪傻呀   哈哈 ~  

忙到 4 點就搞掂哂   不過老闆喺我隔離房開會   搞到我無得上網   唉 ~

放工去超市買豬肉同蘋果就走喇   番到屋企煲中藥同浸菜拻菜   好攰呀 ~   

諗住自己食先嘛   不過里奧大人 7 點打黎話放工   咁我就等埋佢一齊食啦 ~
   
是日懶餐 - 榨菜木耳炒肉碎 + 菜心苗  

榨菜木耳炒肉碎 - 特登煮比里奧大人食咋   不過咁都好   我可以帶埋聽日 lunch box ~  

菜心苗 - 好似 $8/斤   不過好搞笑係夾雜幾條菜心囉   呢檔菜心苗都好甜呀   下次再買 ~ 

條腰骨無啦啦好痛   本來諗好今晚熨衫都係唔熨喇   搞掂哂就即沖涼休息 ~

今晚 11 點唔夠就瞓喇   真係好健康呢   嘻嘻 ~