蜜糖煎雞翼 + 蒜片牛柳粒 + 蒜蓉炒豆苗 ( 22-JAN-2014 )

( 22-JAN-2014  WED )

又係 12 度噃   係起身果下覺得凍咋   之後唔覺凍 lu ~

里奧大人今朝又要 7 點起身   因為 9 點半要番到公司開會   呢兩日都係自己一個行番工   無聊打比佢   話我太習慣同佢一齊行   所以好自然咁走入去聖安娜   佢以為係真呀   之後我喺度笑   佢就話係我自己要買包食之入去呀嘛   哈哈 ~

今朝叫沙爹牛肉包餐   但就好奇怪點解無咗張餐牌喺玻璃入面   原來加咗價呀   上星期食係 $18   依家 $21   一加就加 $3   我唔會食咯   感覺加得太過份咁囉 ~

菇場唔忙喇   今日已經勁有 holiday mood   勁想快 d 放新年假呀 ~

無啦啦超級餓   唔知係咪餓得滯   一出大堂覺得係超級勁凍   係凍到想翻轉頭果隻   所以即急急腳行去食米線喇 ~

室外凍到暈   室內焗到暈    我仲食酸辣米線   食完個身暖哂   所以一出去又覺得超級勁凍囉   慘 ~

放工即走喇   我好鍾意去買家品 d 散貨場睇嘢   因為咩都有嘛   不過依家已經唔係平 lu   但我非常之感恩買到枱布夾呀   仲要係 $12 咋   我搵咗個幾月喇   終於買到   超勁開心呀 ~ 

買埋聽晚嘅餸就番屋企喇   今晚勁有 mood 煮嘢呀   好耐無呢 d 感覺   哈哈 ~

浸完菜就燉肉汁   之後再拖地   搞掂哂都 7 點喇   啱啱好要煮飯呢 ~

今次 d 肉汁都好清   

差唔多 8 點先煮完呀   里奧大人打黎話放工   不過我自己食先喇   好鬼餓 ~

是日懶餐 - 蜜糖煎雞翼 + 蒜片牛柳粒 + 蒜蓉炒豆苗  

蜜糖煎雞翼 - 呵呵   順便清埋之前買嘅丸   我好有心機煎雞翼架   明明熟哂架噃   係咁桔都無血水出黎   不過里奧大人食嘅時候話有紅色   咁即係唔熟囉   好奇怪   下次都係光波爐焗算喇   嘥我心機   嗚嗚 ~   

蒜片牛柳粒 - 媽咪買咗 d 牛扒比我   咁就要食啦   唔係又唔記得食   咁諗住試下炸蒜片   炸到差唔多燶添呀  之後我好期待試下係咪脆   點知唔脆仲要苦   驚 ~     

蒜蓉炒豆苗 - 街市收檔   所以 $7/ 份咋   我買 2 份   食到好滿足   同埋真係好有心機慢慢炒   不過炒到好鬼攰   本來想炒埋飯架   最後都係蒸翻熱就算喇   哈哈 ~

里奧大人食飯嘅時候   又話飯多菜多咁咁咁   又慢慢食   真係勁想打巴佢    大佬   已經 9 點幾啦   阻鬼住哂我沖涼 ~

唉   個咀唇勁痛   應該係生唇瘡啦   上次喺泰國食完熱氣嘢就生咗咀瘡   我從未試過架   慘   好痛家嘛   連食嘢都痛呀 ~ 

沖完涼都 10 啦   食埋生果   真係睇陣電視又要瞓喇 ~