煎鷹鯧魚 + 杏仁香麵包 + 菜心 ( 17-APR-2015 )

( 17-APR-2015  FRI ) 

今朝里奧大人又喺九龍灣見客   所以又陪我食早餐   勁開心呀 ~

法蘭克福腸 / 煙燻豬肉腸 / 早餐腸 / 炒蛋 / 烤蕃茄 / 意大利包多士 - 食呢個早餐係最想食佢嘅拖鞋包    但係凍嘅   嗚嗚     

炒蛋輕盈早晨全接觸 - 個早餐名好搞笑

菇場勁忙啦   做到 12 點呀   對到眼花   真係最驚對數字   一錯就大鑊嘛 ~

Lunch 又要食豬軟骨   加多個超米   勁正 ~

實在太好喇   可以 hea 過等放工 ~

放工走人   今晚去 Taste 買菜   唔想行去街市   最搞笑我上電梯嘅時候   見到隔離落電梯嘅人拎住杯綠茶雪糕   好似好好味咁   我諗住叫里奧大人買黎食嘛   點知原來拎住雪糕係水草阿姐   我又落番去同佢傾幾句   好耐無見佢喇   佢問我仲有無養魚   哈哈   我話無啦   原來佢都無喇   條條走哂都唔想再養   我話養魚都好困身架   同埋一去旅行就要安排家姐黎餵佢地   哈哈 ~          

丫  依家無咗百佳廣場同惠康廣場   迫住去 Taste 買嘢   好在有 d 都同百佳價錢一樣   但有 d 又會貴幾蚊同十幾蚊   所以有時睇完唔買住架   睇埋百佳惠康咩價先買   唔係唔抵丫嘛 ~

番到屋企即浸菜   6 點 45分開始煮嘢   7 點幾食得 lu   點知里奧大人打黎話放工   不過我都唔等佢 lu ~

是日懶餐 - 煎鷹鯧魚 + 杏仁香麵包 + 菜心  

煎鷹鯧魚 - 媽咪尋晚買比我架   里奧大人次次見到有魚就問點解有魚   因為佢知我驚魚   無理由會買呢 d 魚   哈哈      

杏仁香麵包 - 牛油過期呀   聞咗又無臭味   所以買麵包搽囉   我次次買一盒細牛油   用得一次就過期   之前掉咗無限次   依家真係唔想嘥嘢   唔壞都照食呀   同埋上網 d 人話過咗期但無臭都食得   咁我信佢地啦 ~   

菜心 - $6.9/包   份量都唔小   但勝在乾淨   估唔到都甜喎   不過有 d 就有渣 ~

里奧大人話 9 點一齊出去徑步   咁佢食完   我就即洗碗   搞掂都 8 點 45 分喇   之後里奧大人喺梳化度瞓咗   之後話好攰唔徑喇   咁我自己即去徑喇 ~

徑咗半個鐘就走喇   出哂汗好熱呀   想快 d 番屋企沖涼 ~

沖埋涼就睇電視同雜誌   11 點 15 分要瞓喇   勁攰   不過里奧大人就自己繼續睇 "心計"   佢一睇呢 d 劇就會追架喇   係越睇越精神架   所以我都唔知佢幾點瞓 ~