稻香 @ 九龍灣 ( 1-APR-2015 )

四式湯丸煲 - 我想試鹹湯丸好耐架喇   呢個有驚喜   因為夠煙韌   哈哈   同埋估唔到份量咁多囉   我其實諗住今晚去客家好棧都係食茶粿   點知媽咪無啦啦話想去稻香   仲諗住無得食茶粿添   估唔到呢個湯太仲好食   實在太感恩喇

順德無骨污糟雞 - 仲以為咩咁特別添   原來係冬菜蒸雞   不過都幾好味   因為已經叫咗嘛   唔通話唔好食咩   哈  

乳豬 / 燒鵝 ( 例 ) - 鵝肉好羶呀 

媽咪至愛嘅杏仁茶   佢依家出去食飯都要飯後甜品   仲自己叫侍應落 order   心急到呢

( 1-APR-2015  WED )

仲以為今日係 3 月 31 日   仲諗緊點解自己寫錯日子   時間呀   真係過得好快呢 ~

今朝上天橋   有人扯我件衫尾   原來係 Ivy   我同里奧大人講話如果爭 Ivy 錢就慘   間唔中就見到佢   真係好似追債咁款   但里奧大人話咁見法   應該好快還哂 d 錢比佢就真呀   哈哈 ~

依家多數 9 點前番到菇場   就黎要拍卡架喇   不過其實都無咩所謂   對我都無咩影響   咁事實我地又係 9 點開工   遲到係唔啱嘅 ~

仍然要做 report   希望放工前搞掂啦   做呢個 report 一定要專心   唔係好易打錯數目字   20 打錯 50 都好大鑊呢   咁就成條數錯哂   死得   哈哈 ~

呢兩日都忙   係時間比自己開心下   就係食酸辣米線   依家小辣都覺得辣   所以應該唔會再食住   抖 3 個月先   同埋堂食呢   食完個身成陣酸辣米線味咁好難頂囉 ~

食完去 Panash 買丹麥酥比家姐   佢好鬼鍾意食包同蛋糕同曲奇   我就真係麻麻地喇   依家條芝士包加到 $32   超勁貴   同埋又小芝士   我唔會買囉 ~   

做做做   做做做   做做做   終於 5 點做哂啦   了咗心事   因為成日有嘢 hold 住咁   我會瞓得唔係咁好架 ~

今晚約咗媽咪 家姐去稻香食飯   坐喺後面個阿伯講嘢大聲到暈   好似同人鬧交咁   我真係頭都痛   之後我要轉枱啦   我咪同媽咪講囉   明知咁嘈就唔好坐呢度啦   全場咁多枱   駛咩坐佢隔離呀   媽咪話等我黎坐先轉喎   我話第時唔駛等我黎坐先掉   因為洗哂 d 嘢先轉枱仲煩   之後就話佢黎嘅時候得阿伯一個人   唔知佢講嘢係咁大聲   原來如此 ~~~~        


好感恩家姐今晚 6 點 45 分就到   不過條友去錯舊地址   打黎問我點行   其實只係佢去過一次飲茶   仲係由我帶路添   但我休養期間   就同媽咪黎飲過幾次茶   所以媽咪都以為家姐黎過好多次   哈哈 ~   

食到差唔多 8 點就走喇   送埋媽咪搭車   再送埋家姐搭車   我就去爭鮮買壽司比里奧大人喇 ~

今晚唔徑步喇   因為番到屋企都差唔多 9 點   想開機洗衫同睇旅遊書 ~

沖埋涼   諗住玩一陣 Pokopang 開金蛋   點知要按 40,000 次先開到金蛋   暈啦 ~

里奧大人 9 點幾先番到屋企   佢食完抖陣都沖涼   我就仍然要玩 Pokopang   順便叫佢幫手按下   不過佢 11 點唔夠就瞓啦 ~

頂   我玩到 11 點 45 分先開到金蛋呀   d 手指庳哂   人生第一次咁打機囉   按 4 萬次   好痴線呀 ~