茄汁蝦碌 + 黑椒金菇肥牛 + 香煎墨魚餅 + 蒜蓉炒油麥菜 + 淮山百合杞子山斑湯 ( 11-dec-2011 )

( 11-dec-2011 sun )

里奧大人成 3 點幾先瞓   搞到我都瞓得唔好   醒咗幾次   不過好在可以瞓到自然醒啫 ~

瞓到 10 點幾   之後同里奧大人去麥當勞食早餐   其實我想煮麵   不過真係好想同里奧大人一齊食下早餐   一齊傾下計 relax 下咁囉 ~

唔番教會喇   里奧大人仲未做完尋晚份 Table   要博命啦   咁我就抹廚房   熨衫   開機洗衫   之後家姐打黎話同我 lunch   順便一齊睇衫 ~

我同家姐就去睇衫   去到一間 Shop   個人掛住玩電腦   正常有人入黎應該會話隨便睇   走嘅時候會講聲下次再睇睇呢 d 說話家嘛   佢一句說話都無   我同家姐講   就算見衫幾咁鍾意都唔會幫襯佢呢   咁之後去另一間   我地每睇一件衫   佢都講一句   我同家姐睇睇下都話好煩   所以即走   兩間嘢咁極端嘅   我好怕我一路睇   d 人一路係咁 Sale   大佬   要比人靜靜睇諗下家嘛   係咁講係咁講咁 Hard Sell   真係怕鬼咗妳呀 ~  


睇到差唔多 3 點就叫埋里奧大人一齊食車仔麵喇   食完家姐又上黎坐   佢依家好鍾意玩夾公仔呢個 game   所以里奧大人都 download 咗喺佢手機   又幾好人喎   家姐坐到 4 點半就走 lu ~  

我就拖地再執冬天衫   之後 hea 多陣就煮飯   今晚煮嘅全部係尋晚食剩嘅   其實我真係覺得自己算幾叻架喇   由一個飯都唔識煲嘅人   到依家都叫做可以煮到一兩樣見得下人嘅餸   不過如果我敢整新鮮魚同海鮮就更好啦   無咁悶嘛 ~   

是日晚餐 - 茄汁蝦碌 + 黑椒金菇肥牛 + 香煎墨魚餅 + 蒜蓉炒油麥菜 + 淮山百合杞子山斑湯

茄汁蝦碌 - wow   好有成功感架   因為我唔會買新鮮蝦呢   里奧大人唔食蝦同蟹架   因為要剥殼嘛   咁我叫佢食蝦   佢縐哂眉頭話有殼唔想食   咁好啦   我拻埋殼   佢就即刻夾黎食   所以我都承機讚自己幾咁細心呀   邊樹搵呀   嘩哈哈哈哈 ~

黑椒金菇肥牛 - 我好鍾意食金菇肥牛架   不過又好小要買肥牛   因為真係好肥呢 ~

香煎墨魚餅 - wow今次煎得好金黃呀   超開心呢   加埋泰式甜酸醬超勁好味呀 ~ 

蒜蓉炒油麥菜 - 呢個炒菜真係超易無難度呀 ~ 

淮山百合杞子山斑湯 - 媽咪尋日特登煲比我地架   不過我地太飽飲唔落   留番今晚飲就最好呢

依家天氣凍   所以煮完 d 食物都好快凍   下次都係煮兩樣算喇   搞掂哂所有嘢就沖涼   又無咩電視好睇   索性熄電視睇雜誌好過呀