Day 3/6 ( Part 1/2 ) 幸運感恩食食食精華遊 @ 馬來西亞.吉隆坡.雲頂 ( 26-dec-2011 )

( 26-dec-2011 mon )

行程 : 酒店早餐 --> 萬利肉骨茶 @ Ipoh Road --> 黑風洞 --> 雲頂 -->
半山 - Awana Resort -->  SS2 Pasar Malam --> Lok Lok --> Durian Musang King

今朝 9 點起身   落到 Lobby 先知無帶早餐券   要上番房拎   點知上房就見到有人執房好驚囉   因為我地係打開哂 d 喼   電腦又放喺枱   好奇怪會咁早執房   可能我地無掛 Clean Up 牌以為執得房啦 ~

我次次去旅行食早餐都會食飽   呢朝食咗一碟就算   仲要係有菜   不過最緊要有 Sambal 就得喇   同埋今餐唔飽唔緊要   因為阿表都叫我地食小 d   留肚食肉骨茶呀   之後又影下酒店咁喇 ~ 

10 點幾阿表小寶又黎接我地啦   去萬利肉骨茶   地方好懷舊   超正   同埋無冷氣都唔覺熱呀   我記得第一次飲肉骨茶係好重藥材味   所以覺得非常之唔好飲   不過馬來西亞出名肉骨茶就無理由唔飲囉   阿表之前都勸咗我半日唔好勉強飲   但我堅持要試呀 ~

肉骨茶 ( 2 位煲 ) - 我覺得味道似滷水汁呀   甜甜地又唔立口   幾好味喎   同埋咁多豬骨都無咩油先勁呀   

淨料 = 無肉 ( 1 位煲 ) - 好濃嘅蔬菜味   阿表問我邊樣好飲 d   我覺得各有各好飲啊

油炸鬼 - 個樣好似唔新鮮   口感唔係脆   但又唔係林   不過最正係唔油喎   浸落肉骨茶度好好味呀


豆卜 - 索哂 d 肉骨茶又係好味道   點埋甜醬油更加好味呀 

白飯唔小得啦   不過我堅持只食半碗飯   因為我一食飯就會好飽呢


蒜米 + 青椒粒 + 甜醬油  


其實就咁都可以撈一碗飯


茶   當然唔小得啦   不過如果有白咖啡 or 拉茶就更好喇   因為好想飲呀

( 11:40 am 分差唔多食完   所以影下相 )


( 開到好大火架   未行埋去已經覺得好熱 )

( 懷舊地磚  )

( 黑白夠哂 feel )

食完就出發去黑風洞 ( Batu Cave )  "本身係個鐘乳石   已經有 4 億 4 千萬年歷史   1879 年被發現   依家係印度教嘅聖地" ( 天書咁講 )   我印象係有個大金像   再要行 270 級樓梯先可以睇到鐘乳石 ( 天書話 272 級樓梯 )   所以想里奧大人黎睇囉   第一次去有好多馬騮   食橙食到周圍立痴痴   又成日坐喺樓梯扶手度喎   搞到我無得扶住行   好在團友拖住我隻手一齊行咋   唔係上唔到去架喇 ~  

今次就小寶陪里奧大人行咋   我無行上去呀   人肥好怕上樓梯   阿表迫住陪我周圍行呀   陰公   行到咁上下就喺樓梯底下等佢地   我覺得好有接機 feel   其實呢日都好熱   不過見到藍天白雲就好開心呢 ~

( 我覺得佢個樣有 d 似鄭中基   而佢頭頂成日有白鴿企喺度架 )   


( 好多旅行團團友都餵馬騮 )

( 呢張相係個導友特登拎到隻蕉咁高   等隻馬騮跳起黎拎   搵食艱難   小寶笑笑口叫我試下咁餵喎 ( 明知我驚嘛 )   嘩   我唔制架   一陣抓到我隻手我會顛架 )

( 好多白鴿飛來飛去   好驚鴿屎囉 )

( 有個鬼佬坐喺度影相架 )


( 見到鬼影嗎 ?! )

( 今日天氣好好   同埋都好曬呀 ) 

( 好多加油站都有麥當勞 )

之後出發去雲頂半山喇   一去到已經覺得涼咗   洗手 d 水係凍架 ~

去到 Car Park 仲誇張   一出車覺得凍呀   再望成地下都係濕   所有車都係濕   阿表話似香港大回南   不過我覺得勁過香港大回南囉 ~

( 上雲頂條路開始大霧喇   雲頂 d 路係私家路   係林梧桐先生擁有嘅   阿表話我知一個坊間故事   就係林梧桐先生發夢觀音叫佢開咗山   但當時佢無理到   之後第 2次又發同樣個夢   所以佢最終都開咗座山   就係今日嘅雲頂喇 )

( Car Park 地下同埋全部車都係濕哂架   第一次見到咁情況呢 )  

( 經過酒店 Lobby   覺得好有大陸火車站 feel 呀   人又多又亂咁 )  


( 入賭場必經架   好多嘢玩架   好似嘉年華咁   不過超多人呀 )

( 真人黎架   睇見佢就覺得辛苦呀 )

我好小見到咁大霧   之後當然要影 10 shot 留念啦   點知樂極生悲   里奧大人 pk 係咁向前仆   其實佢想睇位   所以行去阿表度   但唔知點解會仆向前囉   我睇住佢差 d 個額頭就撞埋石角度   好在果時停低咗   唔係爆缸都似   好感謝主嘅保守無撞到   之後見到佢手腳都擦損流血   心都痛埋   問佢痛唔痛   佢又話唔痛   用水洗傷口我覺得都痛架   好在無扭親   唔係手尾好長   阿表仲好眼   見到里奧大人條褲都爛埋   oh no ~

 

( 掛住 set 位   有車黎緊都差 d 唔知   呢條就係里奧大人嘅 pk 路喇 )

( 雲頂酒店 )

真係邪啦   我記得一入雲頂酒店見到有 Watson's 覺得好搞笑   酒店好小有呢 d 商店嘛   就係咁   我先記得有 Watson's   可以買消毒藥水同膠布喇   都算好感恩   因為里奧大人最怕係傷口發炎呢 ~

一來一回再去番賭場都用咗起碼 40 分鐘   我地入咗賭場   玩咗 RM30 老虎機就走喇   同埋玩呢 d 老虎機真係可以玩好多錢   我情願番香港去冒險樂園玩推銀機好過   我地對賭錢無咩興趣   不過黎到就想入去睇下呢 ~   

呢日未完架 ^^