( 27-JUN-2015 SAT ) Day 1 ( Part 3/3 )
沖埋涼 double check 哂所有証件 關哂水喉煤氣制 其實都只係 5 點 10 分 我地 call 咗的士 5 點半 諗住 hea 下 點知司機叔叔打黎話已經喺停車場 咁我地 5 分鐘之後都落去坐車 lu ~
出發喇 ~~~~
去到唔知邊度 無啦啦有警車指示所有車要慢駛 第一次遇到咁情況咋 好在預早出門口 慢駛咗 10 分鐘左右就暢順番哂啦 之後差唔多到機場 無啦啦有架私家車停低搵路 痴佢孖根 得一條路去之嘛 我同司機都忍唔住啤佢呀 害人害物 落車之後我同里奧大人講 好在司機叔叔唔係跟車太貼咋 唔駛炒埋都似 但里奧大人話唔駛驚 因為我地坐果架的士係超級安全 ( 慢到呢 ) 同埋架架車都過我地 咁其實又係真係好慢嘅 不過我其實果時都未瞓醒 只係奇怪點解我隔離啲車好似架架都快過我地咁解啫 哈 ~
塞車呀 都咪話唔驚囉 飛機唔等人嘛 @@
去到已經 6 點 好在集合時間係 6 點 10 分 無遲到呢 ~
今次都係帶 1 中 1 細喼 雖然越南未必有嘢買 但我都覺得帶 2 個喼穩陣啲囉
6 點到機場喇
咁即去同領隊報到啦 原來我地係第一個 party 之後有個 party 見到里奧大人 同佢講得佢一個男人 因為佢地去茶會時係得全女班 哈哈 唔係咁搞嘢呀嘛 不過阿奧唔駛驚 因為妳老婆都係麻甩型 有我陪你 哈哈 ~
今次去越南 5 天團 搭 CX 機 起程係 6月27日嘅 8:40am -> 11: 20am ( 當地時間) 回程係 7月1日嘅 19:00pm --> 22:45pm ( 香港時間 )
我次次都係睇完個團嘅目的地 之後就睇個領隊名 唔會睇下係咩團 因為我根本唔會記住 哈哈
之後去埋 counter 放行李就去食早餐喇 諗住去美心飲杯奶茶 估唔到摺埋咗 咁我地去離境區內食囉 ~
最搞笑 6 點半有個人打黎 但係打錯嘅 咁之後電話又響 里奧大人話又係果條友 不過我當然會拎電話出黎睇下啦 點知原來係媽咪打黎 哈哈 因為我無諗過媽咪咁早打黎呢 我同佢講 我上機前會打比佢嘛 ~
因為國泰 counter 未開 我地就坐低等下囉 所以又影下肥寶先 真係覺得佢樣衰得黎又幾得意 哈哈 但里奧大人同家姐就話佢好肉酸 呵呵 係嘅 我鍾意啲嘢比較另類 呵
@ 6:30am
乜都影一餐 影咗 10 分鐘先離境 哈
希望之後你多啲出場啦下 ~~~~
好多人排隊呢
無諗過有薯蓉 所以食到非常之飽呢 呵
里奧大人嘅小愛人出場喇 改佢名叫 "紅 mo 仔"
我特登買本薄黎寫遊記架 跟團真係識到好多嘢 但自己老人痴呆 所以真係要寫得去囉 仲特登買定 2 支筆架 好穩陣呢
今日非常好天 希望越南都係啦 ~~~~
香港去越南大約 2 個半鐘 去河內只需 45 分鐘咋
坐定定 lu
yeah 起飛喇
好乾淨嘅玻璃窗
好在我都有 zoom 黎影咋 原來堅係橋墩 嘩哈哈
好平靜嘅感覺
無嘢做就睇電視啦 我揀 "發現大絲路" 因為主持人又靚仔 今集仲介紹新彊添 正
9 點半派餐 原來已經換哂紙盒包裝
里奧大人食伊麵 我就食芝蛋包
坐飛機係勁口渴 所以紙包飲品先係最吸引呢
熱辣辣唔錯喎 我覺得自己好勁 可以咁短時間內食到兩餐 衰里奧大人又話 share 食 點知最後話只食伊麵 我一個人食哂成個芝蛋包好滯家嘛 @@
如果唔反光就好啦
@ 10 點半已經見到山喇 應該到咗越南呢
雲海呀
衝入雲海 當下係 feel 到有啲阻力架 震震地咁 平時我無留意架 哈哈
開始好興奮喇 ~~~~~~~~~~
差唔多降落
平安到越南喇
出面 33 度 我仲諗住起碼 40 度添 因為個個都話越南好熱好熱
里奧大人一馬當先
去到越南係 10:27 am ( 當地時間 ) 等咗 20 分鐘先拎到行李 再 Check-in 咁搞掂哂都 12 點 10 分 旅程正式開始喇 勁開心呢 ~~~~
是日行程 ~
香港 --> 胡志明市 --> 平貴風景區 (越式風味餐 - 越式酸湯 / 蔗蝦 / 特色炸糯米飯) --> 古芝地道 --> 中日泰越式 BBQ 海鮮自助餐 --> Windsor Plaza Hotel (胡志明市住宿五星級)
越南慢香港 1 個鐘 所以一定要 set 番好時間 唔係就大穫 哈哈 ~
機場都好多人喎
@ 10:47am ( 當地時間 )
Check-in 喇
一出機場見到有個男人舉康泰牌 原來係當地導遊 咁跟住佢行去坐車 lu ~
離遠已經見到康泰牌喇
wow 好好天呀 開心開心
今次香港領隊係小石小姐 當地導遊係賓尼兔先生 全團只有 14人 ( 有 5 個 party - 我 & 里奧大人 + 1 對夫婦 + 1 對女性朋友 + 4 個 Auntie + 2 對母女 ) ~
小石同賓尼兔介紹完自己之後 咁賓尼兔就開始講解越南生活文化 話當地電單車黨猖獗 第一樣係叫我地唔好拎手袋出街 因為電單車黨以為係成袋美金 第二樣係唔好拎相機同手機影相 如果企喺馬路邊影嘅話 妳好開心咁影呀影 就會一嘢比電單車黨扯走 追都追唔到呢 同埋要小心過馬路 最緊要行得快喎 嘩 好驚啦 ~
講到咁 我同里奧大人講 好感恩我地今次唔係自由行 唔係呢兩樣嘢我地會做足呢 哈哈 ~
出發去胡志明市喇
救護車 ?!?!
點比錢呢 ?! 4-8 CHO 係 4-8 人 ?!
啲電單車好似亂黎咁 @@
無英文地方名 咁其實去越南都唔係咁方便噃
賓尼兔問我地覺唔覺機場好多人接機 佢話其實佢地係接一個人機嘅啫 但佢地習慣係十幾廿個人一齊接你機囉 都幾搞笑 ~
跟得團 咁導遊一定要介紹一下越南啦 我都好有心機聽寫架 ( 我真係覺得自已好勁架 呢幾日全程係又聽又寫又影相喎 唔怪得我晚晚咁好瞓啦 哈哈 ) ~
今次特登買本記事薄做旅遊筆記 因為我好鍾意聽當地啲人點生活 文化係點 但次次聽完都唔鬼記得 對上果次去台中同張家界 我好後悔無寫低呀 所以今次點都要寫 因為真係記得番好多嘢呢 咁樣跟團先有意思嘛 ~
我真係寫低賓尼兔講嘅嘢架 里奧大人都話我勁 駛乜講 哈哈
至於咖啡排名就係巴西 越南同埃塞俄比亞喇 ~
呢張相係上網搵嘅 因為賓尼兔話越南係漁米之香嘛 有山水河海 而呢個 Logo 嘅上面代表漁米之香 下面就代表運輸 真係唔講唔知 哈哈
仲有佢地食唔哂啲米就會比非洲 非洲國家又會送番啲動物比你 最搞笑係話送動物 餵佢地食嘢要錢家嘛 講緊嘅仲要係獅子老虎呢啲 食量好大家嘛 所以係唔化算呢 哈哈 ~
越南地型係 S 型海岸線 有 3,200 公里 講到地型呢家嘢 我真係唔識喇 ~
整個越南人口 ( 九千一百萬 ) 女多男小 7:3 比例呀 同埋重男輕女 但為咗提供女性地位 所以越南就出咗第一位女總理呢 ~
胡志明市有 ( 19 郡 ) = 香港嘅 19 區 64 個省份 南越首都係西貢 北越首都係河內 咁南越之後統一咗 為紀念胡志明呢位黨主席 所以改為胡志明市 讀音係 "開之 min" 越南仍都係共產黨國家呢 原來胡志明本身姓阮 ( 1890-1969 ) 真係唔講唔知呢 ~
越南文係 "F" "W" "Z" 加拉丁拚音咁讀嘅 佢地嘅 "ABCD" 係讀 "鴉啤些呢" 因為我係寫低家嘛 佢讀"鴉"音 我諗咗好耐先諗到點寫呀 執筆忘字真係慘 哈 ~
打仗都經歷過 真係分分鐘連命都無嘛 所以佢地仲有咩嘢驚丫 佢地生活態度係 " 天跌落黎當被冚 水浸眼眉當酒飲 " 呢 佢地唔太注重物質生活 覺得 3 餐溫飽已經好足夠呢 ~
1945 年經歷咗 9 年抗法戰爭 1955 年抗美到1975年 前前後後打仗 30 年 唔落後先奇啊 咁打仗 30 年 和平 40 年 即係無咗 70 年 搞番好都有排搞 又落後喎 咁一定無乜人去啦 係近呢 10 年先開放咋 ~
去越南要簽証家嘛 老實講 我覺得貴架 仲要得 1 個月有效期 之後賓尼兔話越南人黎香港 簽証要 HK$1,000 ( 5 日 only ) 仲要放 HK$2,000 ( VND1,040,000 ) 喺銀行 2 個月 之後先批 所以我地算平喎 但越南打贏咗美國 東盟國家就唔駛簽証呢 ~
好似想落雨咁喎
PHO 呀 希望食到啦
越南人唔興 shopping 因為無錢嘛 佢地習慣係買就買 唔買嘅話直頭唔會睇 唔似香港人唔買都摸下 好似講緊我咁 嘩哈哈哈哈 又叫我地買貴嘢好啲 始終一分錢一分貨咁話喎 ~
佢地有午睡習慣架 番工時間係彈性嘅 總之朝早做 4 個鐘 下午做 4 個鐘 中午就瞓 2 個鐘 同埋好多都係朝早 7 點已經開舖做生意架喇 所以越南無乜夜生活 因為早開早收 ~
見到 WASECO 我諗起 WASABI 哈哈
露天 CAFE
依家仲未算係最多電單車呢
好多人都着長袖 勁呀 我知着長袖係無咁易曬傷皮膚 但我真係頂唔順囉
好喇 最重要嘅一環就係兌換錢喇 賓尼兔話公司兌換率統一用 VND260,000 因為之前有啲團友兌換嘅時候係HK$100 : VND250,000 之後第日就回落到 HK$100 : VND240,000 覺得蝕咗咁 所以就統一用 VND260,000 呢個兌換率喇 ~
佢地分好咗 HK$500 一份 ( 唔同銀碼嘅越南盾 ) 佢建議我地兌換 HK$500 先 即係 VND1,300,000 百幾萬噃 希望好好駛啦 其實我最驚咁多個零 好似去韓國咁 真係要用計數機篤篤篤架 ~
無高樓 真係好開揚好舒服呢
我想買越南人帶嘅帽
賓尼兔叫我地唔好亂食街邊嘢 一陣水土不服就慘喇
沙塵滾滾
呢度就乾淨啲
四眼嘅女人 由我拎起相機佢已經對住我笑 叫埋隔離朋友一齊望我添呀 之後同我 bye bye 添
呢對母子就怕怕羞羞 好搞笑
但其實有啲人會好好奇望住我影相呢 好似呢個細路仔咁 哈
啲蟹咁樣擺法 好易食到肚屙喎真係
喺生豬肉面前食飯 我真係唔得呢
油站唔小得
黎料 @@
感覺真係好落後咁 但我鍾意 哈哈
12 點到平貴風景區食飯 落車前無啦啦落勁大雨呀 好感恩落咗10 分鐘左右就停雨呢 ~
終於見到越南傳統打扮嘅女仔
我地坐 Golf 車入去 仍都可以行入去 只係 7-10 分鐘左右呢 咁我當然坐啦 唔想行到成身汗呀
大蓮蓬
好多裝備 個籃好似有幾棵菜咁 哈哈
廚房 ?!?!
呢個地方好有田園 feel 噃 即係無冷氣 哈哈
我地就係坐呢啲草屋入面開餐呢
勁呀呢 快快手手影相先 因為我仲未慣用部新機呀 哈
頭先落咗場雨 真係無咁熱喎
就係坐呢架 Golf 車出入架喇
我地得兩圍枱 我同里奧大人 + 1 對夫婦 + 1 對女性朋友坐一圍 我地 6 個人一圍枱實在太正 可以傾計 好感恩大家都好啱傾 又鍾意去旅行 最開心係一齊飲啤酒呢 哈哈 ~
今次又同里奧大人講 叫佢同團友講 "我要影相做記錄 唔好意思" 咁當然我都會講啦 好感恩團友都鍾意影相 咁我就唔駛就住就住嘛 同埋我仲未慣用部新機 有時都影得唔好 所以叫埋里奧大人一齊影呀 ~
我仍然喺度影緊碗魚露 嘩哈哈 影咗成分鐘
6 個人一圍枱 爽呀
呢碟魚露都放咗好耐下 有好多蚊滋 叫佢地換過另一碗呢
濕紙巾好厚架 唔似香港嗰啲薄切切
好大個煎埋 比妳影完相就拎去另一枱 佢地都了解相機食先呢個文化呢
里奧大人好似影得大個啲咁 哈哈
之後剪開一片片 脆脆地又煙棧 不過好油 唔敢食咁多呢
蔗蝦都幾好味
春卷都好味 因為我最愛香口嘢
炒豬肉都好味 哈哈 乜鬼都話好味
炒菜
呢個酸湯 我覺得係泰式辣雞醬加水嘅味道 係甜嘅 唔知點咁 @@
切到細細粒又唔錯喎
呢日未完架 ^^
这个旅程看起来不错，但，5只点解|～这里的朋友去过都话5好玩哦哦！
回覆刪除打令...我覺得越南幾好玩喎 食又唔錯 哈哈 ~~
刪除忘记讲，你的背影好”失事”啊！哇哈哈。
回覆刪除背面失時 正面嚇屎 嘩哈哈哈哈
刪除