土司工坊 @ 九龍灣 ( 16-JUL-2016 ) + ( 17-JUL-2016 ) + ( 18-JUL-2016 )

小魚椰漿飯配雞翼套餐 ($54) - Sambal 醬都辣   但啲飯唔夠熱    

巴東牛肉配黃薑飯套餐 ($56) - 啲飯又係唔熱   我最驚囉 

( 16-JUL-2016  SAT )

今朝 10 點鐘都自己醒 lu   所以沖埋涼就出發食早餐喇 ~

我問里奧大人   如果佢自己比細心度分數   佢會比幾多分 ?!   佢話 9 分   我話我都會比 95 分   之後我話人哋多數 100 分為滿分   咁你比自己幾多分呀 ?!   佢仍然話 9 分   而我就好自然話即係 90 分   之後笑到佢差啲噴嘢呀   話妙問妙答   話我點解係都要話 90 分喎   佢諗住我會發脾氣話 100 分呀   點會得 9 分咁少呀 ?!   之後我話我依家脾氣好咗好多啦   估唔到佢都話係   咁我又開始喊喇   我話之前成日鬧媽咪   依家唔想成日鬧人呀   嗚嗚 ~

食完就去 Taste 買生果   好感恩買到開箱美國車厘子呀   $28.8/磅   買咗 $67   都應該夠食 ~

買完番屋企   今日都唔出街喇   想喺屋企執下嘢 ~

終於的起心肝執零食櫃   之後又抹下嘢咁啦 ~

我多數咩都入哂櫃先   如果細細包嗰啲就會袋埋一袋   之後先慢慢執  

易碎嘅又會擺去另一袋

將啲薯片棟起去   咁就嚟到期嘅擺最前   等里奧大人易拎啲

2 點半左右里奧大人話餓   咁陪佢食啦   其實我都唔餓   但可以輕食   加上又比啲佢   咁就唔駛咁飽喇 ~

勁攰咁呀   原來每月一到   今次算好   唔太谷住個肚   同埋食到嘢   聽日就知死   哈哈 ~

6 點半到我餓喇   即落樓食嘢   試下新開張無耐嘅土司工坊   我地坐中間張枱   點知左右兩邊大聲傾計   嘈到呢   真係有啲頭痛   所以要快快食完快啲走人呀 ~

行多陣商場就番屋企喇   沖埋涼就休息 lu ~

感恩個肚都 OK   所以睇下電視   里奧大人 8 點幾又食薯圈   我其實好鍾意見佢食零食   佢覺得 Relax 先會咁呢   但就唔可以比佢成日食啦   好無益嘛 ~   

喺泰國買嘅洋蔥味薯圈   里奧大人話無煙肉味咁濃味呢   19 Baht 一包咋   下次一定要入貨呢 

        
睇下電視   又睇下 Recipe   成 12 點幾先瞓呀 ~

( 17-JUL-2016  SUN )

尋晚瞓到半夜又嘔   但嘔完之後   個胃又舒服啲   再沖埋個熱水涼   咁仲更加舒服   但其實個肚都有啲痛   但就唔係劇痛   感恩 ~

瞓到 11 點幾都醒喇   個肚仲有少少痛   但成日想嘔   之後叫里奧大人即刻去買芒果比我食呀   食咗又好似好啲咁   可能甜甜哋又有啲水份 ~

里奧大人早餐食麥記   晏晝就自己煮雲吞福麵   咁屋企有東東雲吞嘛   一包有 8 隻   佢好驚咁話食唔哂咁點呀 ?!   我話食唔哂咪包番好去囉   可以留家嘛 ~

我仍然唔想食嘢   但又唔想入房瞓   咁就睇 "歡樂頌" 啦   睇下瞓下又 6 點 ~

差唔多 8 點   我叫里奧大人快啲買嘢食喇   不過我無胃口   佢又話煮雲吞米粉算喇   真係慘   連續兩餐味精嘢 ~

咁之後我都沖涼喇   10 點幾都自己瞓先 lu ~

( 18-JUL-2016  MON )

瞓得勁差   所以今朝都請 S/L 喇 ~

個肚唔太痛   真係好感恩 ~

11 點起身   之後去睇醫生   我其實最怕自己咁情況下睇醫生   因為無咩力呀   次次睇完一出診所   我就覺得好辛苦好暈咁 ~

番到屋企真係覺得有虛脫感覺   開埋冷氣即灘喺梳化瞓呀   平時我一定要沖埋個熱水涼先瞓㗎   今次真係好辛苦呢 ~

瞓到 1 點先醒   咁睇 "歡樂頌" 啦   唔係無咩好做 ~

個肚其實都有啲啲痛   但都接受到嘅   但如果唔痛就更好啦 ~

無啦啦好餓   所以食埋個芒果同車厘子   濕下個口真係舒服啲呢 ~

里奧大人 6 點半即放工   但我個肚無啦啦又痛   無胃口囉   佢自己買叉雞飯番屋企食算喇 ~

咁我沖涼喇   之後又睇下電視   里奧大人 9 點半約咗姑奶去滿記   最搞笑佢完全唔記得囉 ~

我 11 點都瞓先喇   里奧大人仲睇緊 "偽裝者"   咁佢起碼 12 點先瞓 lu ~