梅菜蒸鯇魚 + 蔥油菜心 ( 4-JUL-2016 )

( 4-JUL-2016  MON )

終於回到現實喇   好在唔眼瞓   呵呵 ~

其實我最唔慣唔係要番工   始終我都鍾意賺錢嘛   只係最唔慣唔可以成日都見到里奧大人   我次次去完旅行都係咁   我估我都真係愛得佢好緊要   哈哈哈哈 ~

好焗熱咁呀   最驚呢啲天氣   遮又一定要帶   唔係落雨就慘 ~

早餐食芝腿治   其實想食濕嘢   不過又食唔到咁多   唯有食番三文治算 lu ~

菇場忙啦   諗住抖下又有嘢做   總知一抖就有嘢做   邪 ~

Lunch Time 都唔落街喇   食麥皮 + 咸餐包   清下腸胃   同埋最主要係想揀相   想快啲揀哂去   了咗心事 ~

菇場仍然忙   忙到放工都未做完   不過唔 Urgent   所以聽日先做 ~

放工去街市買餸   其實唔想煮   因為手指尾爛哂呀   我真係次次唔夠瞓就濕疹   好煩   不過唔想里奧大人成日食街嘢   所以煮啦   蒸同淥為主   夠方便   哈哈 ~

買好哂餸   里奧大人打嚟話唔好煮飯   佢話知我攰   所以想出去食   我話唔好喇   食啖住家飯好過 ~ 

番到屋企浸好菜就拖地   落機嗰晚番到屋企   有 2 隻小強出現呀   所以今晚用漂白水拖地   希望唔好再見到佢哋啦 ~

搞掂哂就抖陣   里奧大人 7 點放工   我就開始預備 lu ~

是日懶餐 - 梅菜蒸鯇魚 + 蔥油菜心  

梅菜蒸鯇魚 - 之前浸咗啲甜梅菜   食嘅時候無哂味   咁今次唔浸啦   點知好鬼鹹   嘥鬼哂   哈哈 ~  

蔥油菜心 - 加咗蔥花真係好食啲   但落得太多豉油   所以底部啲菜心又變咗好鹹   真係食唔到啦   又嘥咗   太耐無煮嘢喇   樣樣都失哂手   唔掂呀 ~

洗埋碗就沖涼   之後即切西瓜比里奧大人食   呢幾次都喺 Taste 買馬來西亞西瓜   但里奧大人話唔係好甜   有次話無咩味添呀   下次去生果舖買馬來西亞西瓜   睇下係咪真係無咁甜先 ~

好喇  又要熨衫喇   熨完又出汗   所以又要再沖身 ~

好鬼攰呀   10 點 45 分都瞓覺喇 ~