燒汁洋蔥炒豚肉 + 腐乳通菜 ( 6-JUL-2016 )

( 6-JUL-2016  WED )

尋晚瞓得唔錯   感恩感恩 ~

好熱呀   好在間茶餐廳冷氣夠   所以飲熱嘢都無問題   里奧大人今朝居然飲凍奶茶添呀   連佢都話熱就真係好熱㗎喇   所以佢同呀 mi 最夾   佢哋覺得熱   我就覺得更熱   佢兩個成日都咁話我   但其實真係熱吖嘛 ~

今朝食雪菜肉絲米   因為早到茶餐廳   如果唔係唔想食米粉餐   之後 8 卦嚟咗   佢食完就番菇場先   我就繼續 Relax 下   哈哈 ~   

菇場唔太忙   咁都好   唔係咁想郁 ~

Lunch Time 出去買麵包比里奧大人   好餓呀   順便買個菠蘿叉燒包同吞拿魚包做 Lunch   食完個叉燒包都好飽下   之得買 1 個算啦 ~       

又要做 Report   做到 3 點幾就食埋個吞拿魚包   人哋唔知以為我好得閒   哈哈 ~

放工去街市買餸   如果街市有冷氣就好啦   因為真係乾淨好多 ~

番到屋企浸好菜就抖喇   今日個 Body 好似好攰咁   想熨衫都唔熨住喇   同埋每晚熨一機衫   不如留番聽晚   一次熨兩機好過   成日做同一樣嘢   好似好辛苦咁 ~

差唔多 7 點 40 分就預備煮嘢喇   想快啲食   點知里奧大人話已經喺九龍塘   咁就要快快趣煮喇   今晚食泰國即食米粉   勁好味 ~           

是日晚餐 - 燒汁洋蔥炒豚肉 + 腐乳通菜  

燒汁洋蔥炒豚肉 - 用辛辣燒汁醃肉   再用唔辣嘅燒汁做汁   因為想清哂啲醬汁   都唔明點解自己成日都係咁   買完又唔用   次次差唔多過期前先用 ~           

腐乳通菜 - $6 有 2 大扎   超級勁抵   雖然我唔係咁鍾意食呢啲淺色通菜   但我又好想食腐乳   所以買啦   仲可以分兩晚食   呵呵 ~

搞掂哂都 9 點幾   即沖涼再開機洗衫喇   睇多陣電視   今晚好似有啲作感冒咁款   所以 11 點都即瞓喇 ~