翠河餐廳 @ 九龍灣 ( 3-JUL-2016 )

魚香茄子煲

豉汁蒸鲳魚

蕃茄豆腐煮蛋

金銀蛋油麥菜

( 3-JUL-2016  SUN )

今朝 6 點 45 分起身喇   因為媽咪今朝要上位   唔可以遲到呢 ~

梳洗之後就出門口   我要去買 4 件鬆糕   兩間粥店無呢啲買   所以我停低諗下有邊度有得買   醒起街市買銀針粉附近有好多糕點   所以即飛去睇   感恩有得買呀 ~

買完即刻打的去媽咪屋企   因為想落大雨咁款呀   真係一上車即落雨   仲要係大大粒嘅雨 ~

家姐 姐夫同工人一齊喺附近食早餐   我哋唔去喇   一袋二袋唔想行咁遠   直接上媽咪屋企好過呢 ~

今朝 8 點儀式開始   係請爸爸走嘅   搞掂哂就去將軍澳喇 ~

家姐揸車嘛   佢以為師傅揸電單車   諗住我哋自己人一車走   不過原來揸電單車係另一個師傅   咁我同里奧大人同師傅一齊打的去將軍澳啦 ~

去到藍田   的士司機突然大叫一聲之後停車   嚇鬼死我哋咩   以為佢心臟病發呀大佬   因為佢係阿伯   個樣都有 70 歲   同埋係入隧道口   後面有車就大鑊啦   好在後面無車   佢向番後 "tun" 囉   佢仲好輕鬆話好在後面無車   唔該你揸車打醒十二分精神啦 ~

去到都係 8 點 45 分   原來 9 點先開門   之後家姐都到埋 lu ~

搞掂哂都係 10 點左右   估唔到咁快   咁師傅自己走先   我地就去海港飲茶喇 ~

金粟墨魚餅 - 好彈牙呀   有驚喜   哈哈 

XO 醬蘿蔔糕

鮑汁鳳爪 - 幾隻鳳爪之嘛   都唔明點解用咁大隻碗   真係坐得矮啲都睇唔到囉 

水晶潮州粉果 - 家姐鍾意食水晶皮   係咁話好味   哈哈  

流汁奶皇包 

豐料珍珠雞 - 里奧大人同姐夫至愛   家姐話次次姐夫都叫   所以家姐要陪食   咁今日家姐第一時間話好嘢   叫里奧大人一齊食   哈哈   

今日家姐工人飛番印尼喇   我問家姐佢有無咩同妳講 ?!   佢話叫家姐唔好做咁夜喇   早啲番屋企食飯啦   之後家姐講到眼濕濕   搞到我又眼濕濕   咁我再問工人有無話唔捨得妳呀 ?!   佢好唔捨得咁嘅語氣話: 都做咗咁耐啦   咁又係   真係日見夜見   有時佢星期日同假期又唔放假就會留喺屋企抖下   真係一家人咁款   哈哈 ~

糟糟阿姨都係今日上位   因為呢日係好日   但佢哋就係中午囉   如果唔係都可能會見到 ~ 

之後講開糟糟   家姐話之前約佢食早餐   家姐講講下媽咪就喊   又話阿妹成日喊   之後糟糟無啦啦勁喊添呀   嚇親家姐   因為糟糟好少會咁喊   家姐話佢喊濕咗兩張紙巾   眼淚鼻涕一齊流嗰隻呀   家姐話人地唔知以為佢哋咩事   晨早流流喊成咁   哈哈 ~

老實講   媽咪走咗之後   真係知道邊個係真心朋友   個個都好擔心我   但又唔敢問   知我一問就喊   依家心情算係平復咗啲   會想見番朋友   我同里奧大人講話依家開始會見番想見嘅人   但我無話想見嗰啲   你就唔好叫我見佢喇 ~

飲到 11 點幾   送埋姐夫同工人番屋企   再送埋里奧大人番屋企   我就同家姐去媽咪屋企喇   因為約咗媽咪工人呢 ~

佢真係好信家姐   咁佢出咗糧嘛   但好似出少咗糧   家姐即同佢計   真係扣咗佢糧   家姐直頭話真係好鬼慶   了解咗之後就打比 Agent   原來係工人自己誤會咗   佢唔想問佢太太條數點計   所以點都想等埋家姐先傾囉 ~

之後佢又喊   話做得唔開心   又話好掛住媽咪   我同佢講   依家妳番新工係從新開始   唔好再諗番以前   總知新太太叫妳做咩就做咩   兩年時間好快過   最緊要賺錢嘛 ~

話咁快又已經 2 點   本來家姐想叫佢去家姐屋企   咁等佢哋兩個工人見下面   傾下偈   再食埋飯先番走   但媽咪工人一早約咗朋友   咁無計啦   家姐車我地去九龍灣   佢去寄錢   我就番屋企喇 ~

唔知係咪今朝喊完關係   個人好似有啲攰   所以 Hea 喺梳化都瞓着咗 ~

感恩里奧大人差唔多做哂公司嘢   所以 3 點落樓食下午茶喇 ~

同番里奧大人講番媽咪工人單嘢   之後話如果有新工可以轉   咁都叫佢轉   Agent 費佢負責   因為依家 Agent 費係貴咗好多   所以我聽到里奧大人咁講都好感動呀   佢話媽咪工人咁好   都想佢做得開心   我哋唔係有錢   但我哋成日都同工人講話錢方面一定唔駛擔心   實幫佢搞掂   最緊要一出糧就要寄錢比爸爸   佢爸爸知我哋幫佢好多   最搞笑媽咪工人成日話打比爸爸   叫爸爸同我哋講多謝   我哋話唔識聽印尼文喎   哈哈 ~

食完精神啲   咁熨 2 機衫啦   唔想成日坐 ~

今晚約咗姑奶食飯   所以 6 點出發 lu ~

食埋之後就去拎嘢   原來都 8 點半喇   打的番屋企喇 ~

番到屋企即沖涼   里奧大人 9 點幾同姑奶去滿記   不過我唔去喇   想熨衫   之後熱到條頸又出汗   頂唔順再沖一沖身 ~

睇多陣電視   11 點幾瞓喇 ~