滋味館 @ 九龍灣 ( 22-JUL-2016 )

麻辣口水雞飯 

吉列豬扒 + 炸蝦飯 (咖哩汁) 

蠔油芥蘭

( 22-JUL-2016  FRI )

尋晚又係碌到差唔多 4 點先瞓到   慘   仲要碌下碌下有啲餓添 ~

今日大暑   又唔係話勁熱囉   因為呢排已經熱慣咗呢 ~

好餓呀   咁食米粉餐啦   但要少米粉   真係小咗 2/3 呀   食完好似無食咁添   哈哈 ~

菇場唔忙   繼續整相 ~

好餓呀又   所以出去食豬潤魚滑生滾粥   唔知係咪今日大暑關係   無咩人食粥   但呢間粥店嘅冷氣好強勁   次次一入去都覺得凍   加上我又慢慢食   所以真係唔會覺得熱囉 ~

食完行超市   睇定啲強宅   問埋里奧大人買邊款   咁放工先去買 ~

仍然整相   都開始有啲亂添呀   人老了   無乜記性   如果唔影相   其實真係好多嘢都唔記得 lu ~

放工即走   諗住一次過喺 Taste 買餸同強宅   簽夠 $100 就有 92 折嘛   頂佢  居然無我要嘅牌字   但百佳反而仲多選擇   激死我   唔鬼買喇   一陣先再去百佳買 ~

今晚決定唔煮飯   因為要清潔廚房   成日見小強出沒   真係要搞一搞去呢 ~

番到屋企已經 6 點 10 分   咁一陣又要出去   所以唔開冷氣添呀   但就開風扇   我覺得自己都勁架   唔開冷氣抹廚房呀   好在無咩出汗 ~

抹完爐底就再抹下廚房用具   里奧大人 7 點唔夠打黎話放工   咁我都出門口喇   去埋百佳買嘢   想了咗心事   唔想成日心掛掛 ~

我差唔多買完嘅時候   里奧大人已經到咗九龍灣添喇   所以叫佢去滋味館等我啦 ~

食到 8 點就走喇   去萬寧買嘢   之後番到屋企   我叫里奧大人沖涼先   同埋叫佢睇 "偽裝者"   因為我要清潔廚房   唔得閒陪佢呢 ~

Olay 高效透白光塑粹油 (價碼大優惠價 $148 ) 

我成日以為放豉油樽油樽嘅位置   就係小強成日出沒嘅位置   所以我再用消毒藥水抹呀抹   無啦啦走隻小強出嚟   嚇死咩   即殺   咁我着裙嘛   裙尾間唔中掂到隻腳   嚇到以為小強喺我隻腳度   真係人都顛 ~

好啦   執開有條路   學阿 mi 話齋   要搵源頭嘛   咁執個廚櫃啦   唔係成日開㗎   因為都係放啲盒呀   唔多用嘅廚具咁囉 ~

首先抹一個廚柜先   將唔用嘅嘢即掉   之後仲比我見膠袋上面有隻強蛋   個膠袋係裝住除塵紙   如果除塵紙唔係白色   真係永遠都見唔到啦   仲要係綠豆咁大粒㗎   勁驚啦   居然有強蛋   所以即掉個膠袋呀 ~   

再抹另一個廚櫃   真係無諗過原來個柜好多黑色一點點囉   點解會有咁多強屎㗎   真係頭暈手震啦   但點都要抹家嘛   最慘係啲角落位   好在我隻手啱啱抹到咋   抹抹下又見到小強   即殺 ~

一路抹一路掉嘢一路噴 Bio Kill   人都顛呀   因為真係一路抹一路驚囉   嗚嗚 ~

今晚掉咗廚柜 2/3 嘅嘢   多數係啲膠盒同 Lock Lock 盒   其實有啲可以用得番   但唔鬼要喇   驚有強屎   之後索性連打蛋器 菜刀 削絲盒保溫杯都掉埋   一了百了 ~

希望已經滅咗強族啦   今晚殺咗 4 隻小強呀   算好多㗎喇   我估今晚唔大清潔   仲更加多強喺度   頂 ~

10 點半搞掂哂喇   勁攰啦   唔覺唔覺企咗 2 個鐘呀   咁里奧大人負責放強宅嘛   佢叫我幫手拎膠紙   我真係頂唔順鬧佢   叫佢自己拎啦   啱啱抹哂廚房已經又攰又熱   仲叫我拎依樣嗰樣 ~   

沖埋涼就抖啦   隻右手真係無哂力   手震震添呀   之後里奧大人都知我辛苦   叫我快啲抖 ~

佢就嘆啦   仲飲埋啤酒食薯片   雖然食埋飲埋啲益嘢   但見佢咁 Relax   其實我最開心呢 ~   

之後我喺 Line 谷傾偈    睇下有咩更好方法滅強族   傾到成 12 點   咁要瞓喇   聽日要番工嘛 ~