潮州手打牛丸泡菜麵 + 大白菜 ( 16-MAR-2024 )

 

( 16-MAR-2024  SAT )

今朝同里奧大人瞓到 10 點半自然醒   我仲要係一覺瞓到醒為止   瞓咗接近 12 個鐘咁滯   原來我都係需要補眠呢   哈哈哈哈 ~

沖埋涼先食早餐   咁樣啲時間好似好用啲 ~

食完番屋企抖陣   諗住出門口   但家姐 Whatsapp 問我方唔方便打比佢 ?!   原來係講爸爸媽咪買位啲嘢   真係比佢嚇死 ~

之後話我無 Whatsapp 佢講今朝嚟唔嚟 ?!   但見我 9 點都無話上咗車   咁就知我唔嚟   哈哈   因為我之前講咗話可能星期六去唔到佢屋企   要改為星期日嘛 ~

因為里奧大人今日放假   中午就會同阿 mi 喂 Gathering   如果我去家姐屋企   啲時間唔係咁好用咁   所以我話唔去家姐屋企喇   不過因為尋晚 mi 媽入咗院要取消 Gathering   咁改為同里奧大人去荃灣行街喇 ~

同埋里奧大人話如果阿 mi 佢哋突然話可以 Gathering   咁我哋都可以即時聚會   但就唔同佢哋講入荃灣啦   始終佢哋尋晚搞咗成晚   佢哋休息緊要啲 ~

差唔多 12 點出門口   今日等咗 15 分鐘小巴   但我話唔搭地鐵   其實等車加去到荃灣   唔塞車嘅話   我覺得點都快過搭地鐵去荃灣咁囉 ~

今次喺川龍街落車   里奧大人話呢個名好易記呀   叫 "穿窿街"   哈哈 ~

里奧大人用 Google Map 搵路   我話好似去旅行呀   無計啦   無地膽帶路   每次一行出天橋去另一個商場   里奧大人就會話記得阿 mi 帶佢行天橋去邊度邊度 ~

去荃新天地 2 期行下   去咗 MUJI 買咗支紫色筆   之後再行荃新天地 1 期   其實荃新天地都有印象   好多年前同糟糟去個呢個商場泊車   但同阿 mi 佢哋都可能有去過   但因為成日一路行一路傾   真係無記到啲商場名囉 ~

行到 2 點 45 分左右開始餓   喺天橋見到地面啲食店幾吸引   所以落去睇喇 ~

惹味香葉肉碎煎蛋拌飯 ($44) - 里奧大人第一時間話要食呢個飯

基本上每次食泰菜   我必會加辣椒粉   但今次完全無加呀   覺得完全唔係我自己   哈哈

 

香茅雞翼泰式冬蔭公湯粉 ($46) - 我就想食湯粉   估唔到有 3 隻雞翼   我諗住 2 隻㗎咋

泰式手標凍奶茶 (+$9) - 茶味唔夠濃   覺得奶味特別重   因為我話想要正宗嘅   所以唔想少甜少奶咁囉

食完又行番商場附近   咁啱見到馬莎又入去睇下   里奧大人買咗 2 件線衫   其實 3 件特價有額外 85 折   不過最後都只係買 2 件就算   其他款真係唔太啱 ~

有位小朋友話馬莎執笠   佢媽咪好溫柔同佢講話係搬遷   大人就知咩事啦   但咁樣同小朋友講又幾好喎    始終執笠真係唔好聽   哈哈 ~

落到地面完全唔記得去荃灣廣場邊個方向   所以我叫里奧大人問警察點去荃灣廣場呀   哈哈哈哈 ~

最後行埋千色滙都已經 4 點 45 分左   里奧大人話對腳有啲攰喇   咁搭車番屋企 lu ~

好鍾意呀呢期   所以肯定唔會買   哈哈哈哈

個碌都印小新

番屋企抖陣   飲埋中藥就番崇拜喇 ~

崇拜完畢都即番屋企 lu   今晚真係唔太餓   所以我話煮個麵 Share 食 ~

是日懶餐 - 潮州手打牛丸泡菜麵  + 大白菜

潮州手打牛丸泡菜麵 - 牛丸係 CC 上次比㗎   估唔到真係好好味   唔似平時喺凍肉舖買嗰啲咁 ~

大白菜 - 仲剩少少   聽晚再食 ~

洗埋碗就沖涼   之後開機洗衫

睇陣 Youtube   今晚又係 11 點先瞓 ~