西檸雞拚生炒骨 + 炸雞膇拚豉椒炒雞 (外賣) ( 18-MAR-2024 )

本來想夾哂所有餸出嚟放喺碟   咁樣好睇啲   但真係好攰   所以原封不動咁算喇   哈哈

我覺得呢幾個餸都好味道   下次可以單買   兩個餸都係 $100   點都算係抵食啦

( 18-MAR-2024  MON )

感恩一覺瞓天光呀   星期一多數 7 點 45 分先起身   所以會比平時瞓多咗   咁樣會更加精神   哈哈哈哈 ~

焗完麵包再煲埋薑茶   差唔多 8 點 15 分先開始食早餐 ~

早餐食個全麥合桃牛油卷就算喇   好似唔係咁餓咁   所以個衛星包又要留番聽朝再食 ~

菇場忙咗陣   之後又可以做自己嘢 lu ~

Lunch Time 行咗陣就去食牛筋河   食完又再行多陣就番菇場喇   今朝隻右腳抽筋呀   所以行路有少少痛   唔想行咁耐呢 ~

我好鍾意拍 Berry 中眼瞓嗰樣   咁 Send 條片比家姐睇   再備註話其實 Berry 好似陪住我哋咁   家姐之後話就咁睇字   好似講到 Berry 啱啱走咗   但仍然陪住我哋咁   我其實寫嘅都係咁諗㗎   哈哈   不過又諗唔到點寫好喎   之後家姐話可以寫個衰女點都唔瞓   我話妳依家先咁講啫   呵呵 ~

唔忙就做自己嘢   所以好快放工 ~

放工去睇中醫   今晚好多人睇呀   可能星期一關係   下次都係星期二先睇好啲   哈哈 ~

中醫話我個脈好弱   即係仍然無電   要休息多啲   星期五再嚟覆診 ~

6 點半先睇完   即去 360 買 3 Pack 罐裝咖啡   我上星期六先同里奧大人講話呢隻咖啡貴呀   如果有特價就會買   今晚比我睇到做特價   所以真係非常之感恩呢 ~

買完去買兩餸飯   再買 3 磅豬腰芒就番屋企 ~

食完飯抖陣   開埋機洗衫就沖涼喇   里奧大人就熨 2 機衫   因為我條腰仲係好痛 ~

HKTV Mall 買嘅摩洛哥藍莓   估唔到好甜喎

睇多陣 Youtube   今晚 10 點 40 分都瞓覺 lu ~