煎釀三寶 (外賣) ( 22-MAR-2024 )

( 22-MAR-2024  FRI )

感恩一覺瞓天光呀   我覺得臨瞓前開定冷氣係最好   對於我嚟講   成間房涼浸浸係比較易入睡啲㗎 ~

今朝都係同里奧大人出去食早餐   開心開心 ~

菇場唔忙   又做下自己嘢 ~

Lunch Time 出去整嘢   之後見有時間去惠康買鈣思寶   諗住用 Coupon 買都叫做平咗    因為家姐買 Coupon 有折   咁我買 4 Pack 鈣思寶同香蕉   總共 $112   之後 Cashier 問我用唔用埋張優惠 ?!   我再睇原來 $120 減 $18   所以再買多 2 Pack 鈣思寶同 2 盒炒麵   總共 $155   即係比 $5 搞掂 ~

本來我買其他野但總數 $145   咁我不如買多樣嘢超過 $150 用 3 張 Coupon 好過 ~

我成日覺得自己無咩氣力   但依家買咗 6 Pack 飲品   我當堂覺得我狀態開始好番少少   哈哈哈哈 ~

買埋麵包就番菇場喇   因為真係超級重呢 ~

丹麥條真係好大條   我真係好少見到咁長㗎

菇場唔忙   我真係要抖下呀   隻手係咁震   哈哈哈哈 ~

又係好日唔打去里奧大人公司搵佢   點知佢又去咗開會   之後阿妹話有咩可以同佢講   我話唔方便喎   佢話妳咪問佢今晚食咩 ?!   我話真係諗住問佢食咩喎   哈哈 ~

傾咗 10 分鐘   里奧大人就出嚟   佢都估到我哋傾電話   呵呵 ~

放工即走   今晚叫里奧大人買煎釀三寶   佢知我想食就好緊張   會即刻去買㗎   我話無咪下次食囉   真係唔駛搞到咁緊張㗎 ~

里奧大人今日同姑奶食午餐   所以 Lunch Box 無食到   我話今晚食埋去啦   我就食個香辣撈麵   咁樣好過出街食   反正都無係益嘢   哈哈 ~

今日姑奶一見到里奧大人   就即比封生日利是比我   里奧大人話都過咗一個月啦   姑奶話擺咗好耐㗎喇   不過見唔到我哋   估唔到里奧大人會咁話姑奶   哈哈 ~

開埋機洗衫就再飲中藥   抖陣就番祈禱會喇 ~

完畢之後要去里奧大人公司   等佢做埋啲嘢   差唔多 9 點鬆啲先走 ~

諗住去惠康再買鈣思寶同洗衣珠   點知原來用哂 Coupon   激死我   咁唯有聽日先買啦 ~

番到屋企   里奧大人諗住沖涼   但點知突然有 Urgent 嘢   又要即刻番公司整   咁我話我都出去買嘢喇   屋企管理員見到我哋就吖大個口   再話又出去 ?!   因為上咗樓唔夠 3 分鐘又落樓呀   哈哈 ~

今晚再買多 4 Pack 鈣思寶 ($98)   2 包洗衣珠 (買一送一 $140) 送 2 支洗潔精   我再買 3 排益力多 ($33)   我唔知點解自己會計咗 6 Pack 鈣思寶+洗衣珠+益力多啱啱好 $250 囉   我心諗真係好啦   可以用 5 張 Coupon   但其實總數係 $271   我仲驚係收銀機出錯   所以拎埋張單嚟睇   我成日將買一送一價錢   係用除咗 2 個價錢囉   真係好豬兜 ~

真係唔好講笑   雖然一個環保袋可以裝哂   但真係超級重   好在喺屋企樓下見到里奧大人   佢即刻幫我拎呀   第一句就話妳買乜鬼嘢呀 ?!   咁重嘅 ~

今次佢真係可以沖涼喇   之後我就煲熱尋晚食剩嘅蕃薯糖水   但都已經 10 點   都好少咁夜食糖水   哈哈 ~

睇陣電視再睇 Youtube   有時睇到啲有話題性嘅片   雖然攰但仍然會睇   所以今晚 12 點 02 分先瞓呀 ~