辣汁焗雞翼 + 大白菜 ( 13-MAR-2024 )

 

( 13-MAR-2024  WED )

感恩一覺瞓天光呀   好耐無試過啦   哈哈 ~

今朝都係出去食早餐   有時比自己抖下都唔錯㗎 ~

比錢嘅時候   里奧大人問我有無一張五十 ?!   我話想點先 ?!   想拎番哂尋晚嗰三百蚊呀 ?!   佢陰陰咀喺度笑   之後我話呢幾日食早餐要去有八達通或者支付寶嘅地方   唔係就唔入去食   哈哈 ~

番工搭 Lift 嘅時候   有個男人成日同人傾偈都就傾公事   所以對佢好有印象   因為好心啦   入到公司傾都未遲啦   駛唔駛急到喺 Lift 入面講呀   無嘢講咪唔講囉 ~

有時夜晚見到佢   佢都係只同同事傾公事   呢啲人就真係生活只有工作   里奧大人有個朋友又係咁   見親面都講公司嘢   所以我之後都話唔去食飯   因為真係好悶   哈哈 ~

菇場唔忙   可以做自己嘢同抖下 ~

Lunch Time 出去下陣再去惠康買嘢   買咗 1 大袋就唔出去食喇   所以買腸粉番菇場慢慢食呢 ~

仍然唔忙   咁 4 點嘅時候   家姐叫我打比我   佢好少叫我打去佢公司嘛   之後問我係咪過咗數比佢 ?!   我話係呀   佢問做咩唔講 ?!   我話等妳見到戶口多咗錢會開心啲嘛 ~

之後原來我係比少咗錢呀   哈哈哈哈   我仲諗住如果家姐話我比咁多   我會話佢成日買嘢比我添   今次真係勁樣衰喇   哈哈 ~

不過我頭先見櫃員機無人   咁即過數囉   但又無睇係幾多錢   因為同家姐喺 Whatsapp 傾太多嘢   同埋可能係語音講幾錢   所以懶得搵   點知就出事   哈哈   不過係家姐慘啲   出咗錢先但最後又蝕埋 ~

放工即走   番到屋企都預備晚餐喇 ~

里奧大人又問今晚出去食咩 ?!   我話煮飯呀   佢話無啦啦又煮飯   又話呢個星期出去食嘅   我話煮到咪好囉   哈哈 ~

浸菜嘅時候   就快手快腳煮個牛肉炒烏冬比里奧大人   咁佢聽日就有 Lunch Box 喇

 

是日晚餐 - 辣汁焗雞翼 + 大白菜

辣汁焗雞翼 - 里奧大人見到碟雞翼話好香呀   無咩幾何咁快講呢句   哈哈 ~

大白菜 - 買咗大半棵   諗住食得哂   但最後都係要留一半 ~

里奧大人知我鍾意飲珍珠奶茶   食午餐特登叫嚟飲   之後就留比我   所以今晚我都唔食飯   留肚食珍珠呀

洗埋碗就做陣小清潔   開埋機洗衫就沖涼喇 ~

里奧大人要熨 2 機衫   等佢搞掂就睇 "餐餐有宋家" ~

今晚飲咗杯珍珠奶茶   所以 11 點幾先想瞓呀 ~